ထဝါဲ၊ ဨပရဴ ၄
ကောန်ထံၚ်ပရေၚ်ဍုၚ်ကွာန်ၜါတၠ ဒးဒုၚ်ရပ်ဖျေံလဝ်ထံၚ် ပ္ဍဲထံၚ်စာတ်ထဝါဲ ရးတၞၚ်သဳဂှ် ဒပ်ဂီုကၠီုစပ်ကဵုလ္ပာ်ပၞာန်ကံၚ်ဇြဳပၞာန် (စရဖ) ကော်ပ္တိတ်နူထံၚ်တုဲ ပျဲပျာံဂစိုတ်လဝ်ဂှ် ဇာဇၞိက်ကောန်ထံၚ်ပရေၚ်ဍုၚ်ကွာန်ထဝါဲ DPPN လလောၚ်ပ္တိတ်လဝ်ရ။
ကောန်ထံၚ်ပရေၚ်ဍုၚ်ကွာန် ကိုဝ်မေန်တူ ကဵု ကိုဝ်ဝေန်သဳဟ ၜါတၠဝွံ နကဵုတၚ်စောဲစပ် ဆက်စၠောံကဵု ဒပ်စဵုဒၞါညးဍုၚ်ကွာန်တံဂှ်တုဲ ပ္ဍဲဂိတုမာတ် ၁၇ အခိၚ်ဗ္တံတုဲကၠုၚ်တေံ ဂလီုကၠေံယာတ်ဂရောပ်ဍိုပ် အရံၚ်ဗ္စံက်က်တုဲ ကော်ပ္တိတ်ဏာလဝ်နူထံၚ်ရ။
ကြဴနူဂှ် အခိၚ်စၟဳတ်ညးတံၜါတၠဂှ် ဟိုတ်နူဂြိပ်တုဲ ဒဒှ်ရဒးပန်ဂစိုတ်လဝ်ဂှ် လ္ပာ်စရဖ ကဵုလဝ်ပရိုၚ် ကုသၟိၚ်တၠအဝဵုထံၚ်တံဂှ်တုဲ ညးတံၜါတၠ တ္ၚဲလဵုဒးဒုၚ်ဂစိုတ်လဝ်ရောဟီုဂှ် ဟွံဂွံတီကေတ်တုဲ လ္ပာ်ဂြောဝ်ဂတာတံဂှ် ဟွံကလေၚ်ဂွံဇွတုဲ ဂၠိုက်ဂၠါဲသၟာန်သၟုက်လေဝ် ဟွံဂွံပုဟ်ဂှ် သ္ဂးရ။
ကိုမေန်တူ (ကော်) မဝ်လဝဳယှက်မေန် အာယုက် ၂၅ သၞာံ ဒးဒုၚ်ဂစိုတ်လဝ်ဂှ်ဝွံ ဒှ်အ္စာပရေၚ်ဘာသာအေဿလာမ်တုဲ အပ္ဍဲထံၚ်ဂှ် သီုကဵုဒှ်ညးပရေၚ်ထတ်ယုက်ဟွံခိုဟ်မွဲတုဲ ဖျေံလဝ်အမိၚ် ဒဏ်ထံၚ် ၁၀ သၞာံ နကဵုသၞောဝ်ပကီုပရာပ်တုဲ ဒးဆေၚ်ဒၟံၚ်မုက်ကဵု သီုၝောံပိုဒ်တၞဟ်ဟ် ၃ ပၠန်ရ။
သ္အာၚ်နူဂှ်ပၠန် ကိုဝ်ဝေန်သဳဟဂှ်လေဝ် ဒှ်ညးဒးဒုၚ်ဖျေံလဝ်ဒဏ်ထံၚ် ၇ သၞာံ နကဵုသၞောဝ်ဗ္တိုက်သ္အးပကီုပရာပ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ထံၚ်စာတ်ထဝါဲဝွံ ထ္ၜးဟိုတ်နာနာသာ်တုဲ ဍဵုဍိုက်ပျဲပျာံဒၟံၚ် ကောန်ထံၚ်ပရေၚ်ဍုၚ်ကွာန်တံ၊ ဟွံကဵုအခေါၚ်လွဳယဲတံ၊ စွံလဝ်ပ္ဍဲထံၚ်ဒမၠုတံ ဒှ်တမ် ကလိလောန်ဒၟံၚ် ပရေၚ်ဍဵုဍိုက်အပ္ဍဲထံၚ် နာနာသာ်ရ။
တုဲကၠုၚ် ပ္ဍဲဂိတုမာတ်တေံဂှ်လေဝ် ပ္ဍဲထံၚ်စာတ်ထဝါဲဂှ် ကောန်ဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ စရဖတံ လုပ်စိုပ်စၟဳတ်လဝ် ဗွဲတၟေၚ်တုဲ ဂွံဆဵုကေတ်လဝ်ဖုၚ်တဲလ္ၚဵုတံ နွံရောၚ်ဂးတုဲ သီုကဵုကောန်ထံၚ်ပရေၚ်ဍုၚ်ကွာန်တံ မပါလုပ် ကောန်ထံၚ် ၂၀ ပြၚ်ဂှ် ၜုၚ်တက်စၟဳတ်တံ ကၠောန်ၜိုတ်လဝ်ဏီရ။
ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်ဗၟာ PPNM ဂှ် ထံၚ်စာတ်ကံၚ်ဇြဳပၞာန်ဂှ်ဝွံ သွက်ကောန်ထံၚ်ပရေၚ်ဍုၚ်ကွာန်တံဂှ် ဒှ်ကၠုၚ်ဒၞါဲဂစိုတ်မၞိဟ်တံရောၚ် သၞာံမံက်တုဲကၠုၚ်တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−DPPN