နေဗျဳဒဝ်၊ ဨပရဴ ၃
ဗော်ညဳသၟဟ်မန် MUP မဒှ်ဗော်ပရေၚ်ဍုၚ်ကွာန်မန်မွဲဂှ် အာတ်ပ္တိုန်လဝ်အခေါၚ်ဒက်ပ္တန်ဗော် နကဵုယၟုဗော်တောတက်မန် မစန်ဒက်အာ အပ္ဍဲတွဵုရးကရေၚ်ဂှ် ကမ္မယှေန်ပေါဲရုဲမာဲ ကဵုအခေါၚ်ယျဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ဗော်တောတက်မန် ပံက်လဝ်ရုၚ်ဗော် ပ္ဍဲဍုၚ်ဘာအၚ် တွဵုရးကရေၚ်ဂှ် စနူသၞာံ ၂၀၂၄ ဂိတုဨပရဴ ၁ တုဲ ကဵုလဝ်အခေါၚ်ပ္တိုန်စရၚ်ဗော် နဒဒှ်ဗော်ပရေၚ်ဍုၚ်ကွာန် ဗွဲမကိတ်ညဳကဵု သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ၝောံပိုဒ် ၉ ဂှ်ရ။
လၟေၚ် အခေါၚ်ဒက်ပ္တန်ဗော် ဗော်တောတက်မန်ဂှ် ၄၈ မဒှ်တုဲ ဗော်ညဳသၟဟ်မန် စန်ဒက်အာ အပ္ဍဲတွဵုရးဍုၚ်မန်ဂှ် ၜိုန်ရအာတ်ပ္တိုန်လဝ် အခေါၚ်ဒက်ပ္တန်ဗော် ပ္ဍဲကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်ဂှ် မွဲသၞာံပြၚ်ကၠုၚ်ကီုလေဝ် ဒဵုကဵုအခိၚ်လၟုဟ် ဟွံစှ်ေဏီရ။
ပ္ဍဲသၞာံမံက်တုဲကၠုၚ်တေံ ဟိုတ်နူသၞောတ်ဗ္ၜတ် သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန် မစၞောန်ပျးလဝ်ဂှ်တုဲ ဗော်ညဳသၟဟ်မန် ဒတူလိုၚ်လဝ် နဒဒှ်ဗော် စန်ဒက်အာ အလုံကၟိန်ဍုၚ်မွဲဂှ် သ္ဂုတ်သွာတ်လဝ် သွက်ဂွံပ္တိုန်စရၚ် ကဆံၚ်တွဵုရးရ။
ဗော်ညဳသၟဟ်မန်ဝွံ သၞာံ ၂၀၂၃ ကၞောတ်ဂိတုဖေဖဝ်ဝါရဳဂှ် အာတ်ပ္တိုန်လဝ် အခေါၚ်ဆက်သ္ဂောံဒက်ပ္တန်ဗော်ကဵု အခေါၚ်ပ္တိုန်စရၚ်ဗော် ဇရေၚ်ကမ္မယှေန်ပေါဲရုဲမာဲ ကံၚ်ဇြဳပၞာန် ခါန်ကၞက်ဂှ်ကီုလေဝ် အခေါၚ်ပ္တိုန်စရၚ်ဗော်ဂှ် ဟွံစှ်ေကၠုၚ်လဝ်ရ။
ဟိုတ်ဂှ်ရ ပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဂှ် သွက်ဂွံလုပ်စိုပ်ပြိုၚ်ပ္ကာန်အာ ပ္ဍဲတွဵုရးကရေၚ်တုဲ သၞာံတုဲကၠုၚ်တေံ ကၞောတ်ဂိတုအဝ်ဂါတ်ဂှ် အာတ်ပ္တိုန်လဝ်အခေါၚ်ဒက်ပ္တန်ဗော် နကဵုယၟုဗော်မန်တောတက် နဒဒှ်ဗော်စန်ဒက်အာကဆံၚ်တွဵုရးရ။
ပ္ဍဲသၞာံ ၂၀၂၄ ဂိတုဂျာန္နဝါရဳ ၂၄ ဂှ် ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ်ဂှ် ဟိုတ်နူစၟဳတ်ဂွံဆဵုကေတ် ဒဒှ်ရဗော်မန်တောတက် ကိတ်ညဳကဵုနဲဥပဒေ၊ သၞောဝ်ပ္တိုန်စရၚ်ဗော်ပရေၚ်ဍုၚ်ကွာန်တံဂှ်တုဲ ကဵုလဝ်အခါၚ်ဒက်ပ္တန်ဗော်ရ။
နူဂှ်မွဲကဆံၚ် ဗော်မန်တောတက်ဝွံ အတိုၚ်ၝောံပိုဒ် ၅ သၞောဝ်ပ္တိုန်စရၚ်ဗော်ပရေၚ်ဍုၚ်ကွာန်ဂှ်မ္ဂး အာတ်ပ္တိုန်လဝ်စရၚ် ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၆ တေံ နဒဒှ်ဗော်ပရေၚ်ဍုၚ်ကွာန်တုဲ ပ္ဍဲဂိတုဨပရဴ ၁ ဂှ် အခေါၚ်ဒက်ပ္တန်ဗော် စှ်ေကၠုၚ်ရ။
ပ္ဍဲဗော်ပရေၚ်ဍုၚ်ကွာန်မန်ဂမၠိုၚ် ပ္ဍဲကဵုဗော် ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက် ကဵုလဝ်အခေါၚ်ဒက်ပ္တန်ဗော် နဒဒှ်ဗော်ပရေၚ်ဍုၚ်ကွာန်ဂမၠိုၚ်ဂှ် ဗော်ညးဗြဴ(မန်) စန်ဒက်အာ ကဆံၚ်ကၟိန်ဍုၚ်ကဵု ဗော်မန်တောတက် စန်ဒက်အာ အပ္ဍဲတွဵုရးကရေၚ်တံ နွံဒၟံၚ်ရ။
ညးခါတ်အကာဲရေၚ်ပၞာန်၊ ပရေၚ်ဍုၚ်ကွာန်တံဂှ် ပရေၚ်ဍုၚ်ကွာန်ဍုၚ်ဗၟာ ဗွိုၚ်ပၞာန်သာသၠဲလးကၠုၚ်ဂှ်ဝွံ သွက်ဂွံကၠောန်ဗဒှ်ပေါဲရုဲမာဲ သ္ၚောဲဒၟံၚ်ဏီဏောၚ်တုဲ ဗော်ပရေၚ်ဍုၚ်ကွာန်တံဂှ်လေဝ် ဂွံဆက်ဒတူလိုၚ်အာ သၟဝ်ကံၚ်ဇြဳပၞာန် သၞောတ်ဗ္ၜတ်ထိၚ်ဒဝ်လဝ်တံဂှ်ဟေၚ် ဒှ်ဒၟံၚ်အကာဲအရာ ဒးရုန်ဂ္စါန်အာဏောၚ်ဂှ် သ္ၚဳဂၠိပ်လဝ်အိုတ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ် စရၚ်မာဲဍိုက်ပေၚ်တုဲ ဍုၚ်ကွာန်ညိၚ်ဝတ်ဗက်ဂှ် မွဲတဲဓဝ် ဟွံသေၚ်ကီုလေဝ် သွက်ဂွံကၠောန်ဗဒှ်အာ ပေါဲရုဲမာဲ ဒကုတ်ဍေံကဵုဍေံမာန် ဂွံရေၚ်တၠုၚ်အာနွံဂှ် ပ္ဍဲဂိတုမာတ် သတ္တာဟတတိယတုဲကၠုၚ်တေံ ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media