ဗြုရမျာၚ်ပၠန်ဂတး ဂကူၜိုပ် မၚုဟ်က္တဵုကၠုၚ် အကြာဂအုံပတေၚ်
ကျာ်မြဟ်၊ ဨပရဴ ၄
အပ္ဍဲပရေၚ်ပၞာန်သီအဝဵုဏံ ဂကူမန်ဗွဲမဂၠိုၚ် မံၚ်ကၠုၚ် ညံၚ်ရဴဟွံဆေၚ်ကဵုဇကုဂှ်ဝွံ အခိၚ်ကွာန်ဓမ္မသ ဇိုၚ်ၜဳဂြာၚ် လ္ပာ်သၠုၚ်ကျာ ပၟတ်တူဒှ်အာဆောံဂှ် ဗြုရမျာၚ်ပၠန်ဂတး ဂကူၜိုပ်တံ ၚုဟ်က္တဵုကၠုၚ်အိုတ်ရ။
ပ္ဍဲကဵုတ္ၚဲပၠန်ဂတးဖက်သေတ် ဒပ်ပၞာန်ဗၟာ ရပ်စပ်ကော်ကၠုၚ်လဝ် တ္ၚဲဒပ်ပၞာန် ပွိုၚ် ၇၀ သၞာံပြၚ်ဂှ် ကံၚ်ဇြဳပၞာန် စံၚ်လဝ်ကွာန်ဓမ္မသ ဒေသၜဳဂြာၚ် ပွိုၚ်ဍုၚ်ၜဳဂြာၚ်၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန် နကဵုလွဟ်ဇၞော်တံရ။
အတိုၚ်တၚ်နၚ် ကံၚ်ဇြဳဖေဝ်ဒရာဍုၚ်မန် MSFC ဂှ်မ္ဂး ပ္ဍဲဂိတုမာတ် ၂၇ တေံ ဒပ်ကံၚ်ဇြဳပၞာန်ဝွံ ပန်ပှော်စုတ်လဝ် ကွာန်ဓမ္မသ ပေါဲဗ္တိုက်က္တဵုဒှ်ဟွံမွဲဂှ် နကဵုလွဟ်ဇၞော်ပန်ဇမ္ၚောဲ နူကဵုကရောၚ်ပၞာန်တိုက်၊ ဍာ်၊ ကျာတံဂှ်ရ သ္ၚိဒၟံၚ် ၃၀၀ ပြၚ် ပၟတ်တူလီုလာ်အာလဝ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ရပ်လွဟ်ပၠန်ဂတးဒၟံၚ် ကုသၞောတ်တၠအဝဵုပၞာန်ဂှ် လ္တူလၟေၚ်ဒဒှ်ကွာန်ဓမ္မသဂှ် အကြာညးဍုၚ်ကွာန်မန်တံ လစွံစိုတ်သ္ဂောံထပိုတ်ရိုဟ်ကၞက် ကံၚ်ဇြဳပၞာန်တံ ပြံၚ်လှာဲကၠုၚ်ဂှ် ဂွံဆဵုကေတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူလၟေၚ်ဒဒှ်ကွာန်ဓမ္မသဂှ်တုဲ အကြာဂကူမန်ပိုယ်တံဂှ် လစွံစိုတ်သ္ဂောံထပိုတ်ရိုဟ်ကၞက် ကံၚ်ဇြဳပၞာန်ဂှ် ပြံၚ်လှာဲကၠုၚ် တၟာဂလိုၚ်ရောၚ် ဂွံဆဵုကေတ်ရ။ ကၠာတေံဟီုမ္ဂး ဟွံဆေၚ်ကဵု ဂကူဇကုပုဟ်။ ဟွံဆေၚ်ကဵု ဇကုပုဟ် နကဵုလညာတ်သာ်ဏံဂှ် နူဂှ် စိုတ်ဓာတ်ဆာန်ဍူ ပ္စာရဏာမၞိဟ်တံဂှ် ပြံၚ်လှာဲကၠုၚ် လ္ပာ်ဒေါသတုဲ ပါကၠုၚ်လ္ပာ်ပၠန်ဂတးဂှ် နွံတၟာဂလိုၚ်ရ။ ဆ္ဂး နကဵုဗ္ၜတ်အလုံကောန်ဂကူပိုယ်မွဲဂှ် ဟွံမွဲဏီရ” သာ်ဝွံ ဟီုရ။
ပ္ဍဲပေါဲရုဲမာဲ သၞာံ ၂၀၂၀ ဂှ် နကဵုတၚ်ထ္ၜးဟိုတ်စရၚ်မာဲဗၠေတ်မှာဂှ်တုဲ ရပ်ဒက်က္ဍိုပ်သ္ကိုပ်ကၟိန်ဍုၚ်တုဲ ပြဝဒပ်ပၞာန် ဂိုတ်ဂ္စါန်လဝ် သွက်သ္ဂောံကလိဂွံ အဝဵုကၟိန်ဍုၚ်ဂှ် ညးဍုၚ်ကွာန်မန်ဗွဲမဂၠိုၚ် ညာတ်လဝ် နဒဒှ်ပြသၞာ ဗၟာကဵုဗၟာရ။
မွဲလ္ပာ်ဂှ်ပၠန် ဗော်ဍုၚ်မန်တၟိ ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော် သြဇာဇၞော် လ္တူညးဍုၚ်ကွာန်မန်တံဂှ်လေဝ် အပ္ဍဲပၞာန်သီအဝဵုဏံ ဒတူလိုၚ်လဝ် သွက်ဂွံဂၠါဲသွဟ်ဆဵုဂဗ ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ရ။
ဟိုတ်နူအကာဲအရာဏံတုဲ ညးဍုၚ်ကွာန်မန် မၞုံအပ္ဍဲဍုၚ်၊ မ္ၚးဍုၚ် ဗွဲမဂၠိုၚ်ဂှ်ဝွံ လညာတ်ဒးပၠန်ဂတး ဒစဵုဒစး လ္တူပရေၚ်ပၞာန်သီအဝဵုဂှ် ဟွံဍတ်ပါ်ကၠုၚ်မွဲသာ် မံၚ်ကၠုၚ်လဝ် အပ္ဍဲဒေသဇကုတံ ဗွဲမၜိုဟ်သြိုဟ် နကဵုပရေၚ်ဂကူ၊ ပရေၚ်သာသနာ၊ ပရေၚ်သ္ပကုသိုလ်ကဵုဒါန်တံရ။
ဆ္ဂး ကုကွာန်ဓမ္မသ ဒၞါဲပရေၚ်ပၠန်ဂတးရပ်လွဟ်ဟွံမွဲဂှ် နူကဵုဒပ်ကံၚ်ဇြဳပၞာန် စွံပွန်ဗ္တိုက် လ္တူညးဍုၚ်ကွာန်ကောန်အရာပ်တံဂှ်ဂှ်ဝွံ ညးဒေသ ဒးဒှ်အာလဝ်ဗွဝ်ပတေၚ်တံသၟးဟွံက ကၠောံထၞာန်တူလၚ်အာ သီုကဵုဂြိုဟ်က္တာန် ညးဍုၚ်ကွာန်မန်တံရ။
ကွာန်ဓမ္မသ ပၟတ်တူဂှ်ဝွံ တုပ်တဴညံၚ်ရဴ ကွာန်ပိုယ်တူဂှ်ကီု ပွမဂိက္တာန် ပ္ဍဲညးဍုၚ်ကွာန်မန် အပ္ဍဲဍုၚ်၊ မ္ၚးဍုၚ်တံဂှ်ဝွံ လညာတ်လစွံစိုတ် အပ္ဍဲပၞာန်သီအဝဵု ပွိုၚ်ပိသၞာံဏံ ပြံၚ်လှာဲကၠုၚ်လဝ်တုဲ လညာတ်သမ္တီပရေၚ်ပၞာန် ဒးပၠန်ဂတးဒစဵုဒစးဏောၚ်ဂှ်လေဝ် လုပ်ကၠုၚ်အိုတ်ရ။
ညးဗြဴဒေသမွဲတၠဂှ် ညးဍုၚ်ကွာန်မန် ဗွဲမဂၠိုၚ်ဂှ်တှ်ေ ဟီုတိုန်ကၠုၚ် ပရေၚ်ဓဇန်ကြမ်ကြ ကံၚ်ဇြဳပၞာန်တံတုဲ ညးသၟတ်တံဂှ်လေဝ် ပရေၚ်ဗ္တိုက် ဒစဵုဒစးဒပ်ပၞာန်တံ၊ လညာတ်ပရေၚ်ပၞာန် သတိပရေၚ်ပၞာန်တံ သာနွံကၠုၚ်ဂှ် ဟီုရ။
“ကြဴနူကွာန်ဓမ္မသ ပၟတ်တူတုဲဂှ် အပ္ဍဲကွာန်အရာပ်တံဂှ် ညးဍုၚ်ကွာန်မန် ဗွဲမဂၠိုၚ်ဂၠေၚ် အရေဝ်ပြံၚ်လှာဲကၠုၚ်အိုတ်ဂှ် ဂွံဆဵုကေတ်ရ။ ကံၚ်ဇြဳပၞာန် မကော်ဂး ဒပ်ပၞာန်ဗၟာဂှ်ဝွံ ၜိုတ်လဵုဓဇန်ရောဟီုဂှ် ဟီုကၠုၚ်အိုတ်ရ။ လ္ပာ်ရေဝ်တေံဟီုတှ်ေ ဗွဲတၟေၚ် ညးဇၞော်ဇၞော် ဟီုပ္တိတ်ကၠုၚ် ဖေက်ဒးဒုၚ်စံၚ်သ္ၚိတံ ဖေက်ပေါဲပၞာန်ဒှ်ကၠုၚ်တံဂှ်မ္ဂး ညးသၟတ်တံဂှ် ဖေက်တှ်ေ လုပ်ဒပ်ပၠန်ဂတးမန်တုဲ သွက်ဂွံဗ္တိုက်ဒစဵုဒစးဂှ် ဟီုကၠုၚ်အိုတ်ရ။ ချိုတ်ပၠိုတ်မွဲဂှ် ဒဒှ်မယုတ်မာ ကံၚ်ဇြဳပၞာန်ဂှ် သာတုဲဟီုကၠုၚ်အိုတ်ရ။ လညာတ်ပရေၚ်ပၞာန်၊ သတိပရေၚ်ပၞာန်တံ သာနွံကၠုၚ်အိုတ်ဂှ် ညာတ်ရ” သာ်ဝွံ သ္ဂးရ။
ဆ္ဂး လညာတ်လစွံစိုတ် ဒစဵုဒစးကံၚ်ဇြဳပၞာန်တုဲ ဒဒှ်ရကၠောန်ၜိုတ်လဝ်သာ်ဏံဂှ်လေဝ် ဆက်နွံဒၟံၚ်ဏီတုဲ ပေါဲပၞာန် ကၠောံထၞာန်ကၠုၚ် ကွာန်ဇကု ဒေသဇကုမ္ဂး ပွမဒစးဒုၚ်ပလေဝ်ပလေတ် ဗွဲမစှ်ေကဵုသၞောတ်တံ ဟွံမွဲမံၚ်ပုဟ်ဂှ် ညးဟီုလဴထ္ၜးရ။
ညးချဳဒရာၚ်ကတိုၚ်ကၟဟ် ပၠန်ဂတးမန်တံဂှ် ညံၚ်ရဴကွာန်ဓမ္မသကီု ကွာန်မန်တၞဟ်သ္အာၚ်တံ ညံၚ်ဂွိုအ်ထပ်က္တဵုဒှ် ပ္ဍဲကဵုကွာန်အရာပ် ဍုၚ် မစုက်ကဵုဒပ်ကံၚ်ဇြဳပၞာန်တံဂှ် သွက်ဂွံဒစးဒုၚ်ပလေဝ်ပလေတ်လဝ်အိုတ်ဂှ် ကဵုဒၟံၚ်သမ္တီတံလေဝ် နွံဒၟံၚ်ရ။
မွဲလ္ပာ်ဂှ်ပၠန် ပ္ဍဲကဵုဒေသကောန်ဍုၚ်အရၚ် ကေုာံ အညာ ဒၞါဲပၠန်ဂတးဇြဟတ်ခိုဟ်တံဂှ် စွံပွန်ကုညးဍုၚ်ကွာန်တံတုဲ ပန်ပှော်လွဟ်ဇၞော်ကီု၊ ဗ္တိုက်တရဴကျာကီု ကေုာံ စံၚ်သ္ၚိဒၟံၚ်တံဂှ်လေဝ် နွံဒၟံၚ်တုဲ သွက်ဂွံကလေၚ်ဗပေၚ် လွဟ်လက်နက် ဇြဟတ်ပၞာန်တံမာန်ဂှ် ဖ္တိုက်ဖ္အောဝ်ဆဝ်မ္ၚုဟ်ဒၟံၚ်တံလေဝ် နွံဒၟံၚ်ပၠန်ရ။
ညးဗြဴမန် ဒစဵုဒစးဒၟံၚ် သၞောတ်တၠအဝဵုပၞာန်မွဲတၠဂှ် စပ်ကဵုလၟေၚ်ဒဒှ်ကွာန်ဓမ္မသတုဲ ရမျာၚ်သ္ဂောံဗ္တိုက်သရိုဟ် တၠအဝဵုပၞာန်တံ မံက်တိတ်ကၠုၚ်ဂှ်ဝွံ သွက်ပၠန်ဂတးဂှ် ဒှ်ဇြဟတ်မွဲရောၚ် ဟီုရ။
“လညာတ်ပၠန်ဂတးဂှ်တှ်ေ အကြာသၟတ်တံကီု အကြာပွဳပွူဗ္ဒါဲဗ္ဒါဲတံကီုဂှ် ရမျာၚ်သ္ဂောံကလေၚ်ဗ္တိုက်သရိုဟ်တၠအဝဵုပၞာန်တံ တိတ်ကၠုၚ်အိုတ်ရ။ ကၠာတေံဟီုတှ်ေ ပ္ဍဲဂၠံသြိုဟ်ညးတံ အရာမဍဵုဍိုက်တံဂှ်နွံ။ ဆ္ဂး သွက်အလုံကောန်ဂကူမန်မွဲဂှ် ရမျာၚ်ဟွံတိတ်ကၠုၚ် ညဳညဳသာသာပုဟ်။ လၟုဟ် စပ်ကဵုလၟေၚ်ဒဒှ်ကွာန်ဓမ္မသတုဲ ရမျာၚ်တိတ်ကၠုၚ်ရ။ အကြာကောန်ဂကူတံ ညးသၟတ်တံသၟးဟွံက Celebrities မန်တံဟီုဟီု ဖအိုတ်ဟွံသေၚ်ဏီပုဟ်။ ရံၚ်ကေတ်တိတ်ကၠုၚ်ဗီုဏံဂှ်တုဲ သ္ကဵုဒှ်တဴဇြဟတ် သွက်ပရေၚ်ပၠန်ဂတးမွဲရဏောၚ်” သာ်ဝွံ သ္ဂးရ။
စနူအခိၚ်ဗ္ဒိုပ်ဗၠာဲသၟိၚ်ကအ်ဗိန် ဒးဒုၚ်သီတုဲ ဒပ်ကံၚ်ဇြဳပၞာန်ဝွံ မွဲဒမြိပ်ပွဳပွူ ကွာန်ကြေဝ်ဏာ နွံဒၟံၚ်လ္တူဂၠံၚ်ကွဳစက်ရမ္မာဝတဳ သၠုၚ်ကျာၜဳဂြာၚ်ဂှ် ဖျေံလဝ်ဒပ် ကရောၚ်ပၞာန် ဇြဟတ်ၜိုတ် ၁၀၀ ပါဂှ်တုဲ အပ္ဍဲၜဳဂှ်လေဝ် ဖျေံလဝ်က္ၜၚ်ပၞာန်ၜါဖ္ဍိုက်ရ။
မွဲလ္ပာ်ဂှ်ပၠန် ဟိုတ်နူဒပ်တိုက်၊ ဒပ်ဍာ်၊ ဒပ်ကျာ ကံၚ်ဇြဳပၞာန်တံ ပန်ပှော်နၚ်ဂှ်တုဲ ညးဍုၚ်ကွာန်မၞုံမွဲဒမြိပ်ကွာန်ကအ်ဗိန် ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဂၠံၚ်တရဴကဵုအရီုဗၚ် ပရေၚ်ဗ္စာရဏာမၞိဟ်တံဂှ်လေဝ် သၞောတ်ဗ္ၜတ်လဝ် နကဵုအမိၚ်သ္ကိုပ်ရး ဌာန်ဂအုပ်ပၞာန်ရးအဂၞဲရ။
ဆ္ဂး အရီုဗၚ်ပရေၚ်ဗ္စာရဏာမၞိဟ် ညးဍုၚ်ကွာန်မန် အပ္ဍဲဍုၚ်၊ မ္ၚးဍုၚ်တံဂှ်တှ်ေ နူကဵုဂၠံၚ်ဂွံဂှ်မွဲကဆံၚ် ပ္တိတ်ဒၟံၚ်ဇြဟတ် သွက်ဂွံပလံၚ်ဗစိုပ် ဇရေၚ်ညးဍုၚ်ကွာန် ဒးဘဲပၟတ် ဒးပါဲဒဴဘဲပၞာန် အပ္ဍဲဒေသၜဳဂြာၚ်တံဂှ်ရ။
စပ်ကဵုအရီုဗၚ်ပရေၚ်ဗ္စာရဏာမၞိဟ်တုဲ သၟာဝေၚ်ဇြဟတ်ရုဲစှ် ဂကောံမခၞံကျာသေံ Eric Pongsakorn မဒှ်ဂကူမန်ဂှ်ဝွံ သွက်ဂွံရီုဗၚ်ထံက်ပၚ် ကွာန်ဓမ္မသ ပၟတ်တူလီုလာ်အာလဝ်ဂှ်တုဲ ပဠောံဂကောံ ညးလ္တက်လဝ်ဂှ် ပ္တိုန်ၚုဟ်သွံတြးလဝ် နကဵုသြန်ၝာတ် ၃၆၅၀၀ ဂှ် Bangkok Post ထ္မံက်ထ္ၜးလဝ်ရ။
နာဲနဂါဂှ် “ဟိုတ်နူလၟေၚ်ဒဒှ်ဏံ (ကွာန်ဓမ္မသပၟတ်တူ) ဂှ်တုဲ သၟတ်မန်တံ ၚုဟ်က္တဵုကၠုၚ် တၟာဂလိုၚ်နွံရ။ ပံၚ်တောဲပါလုပ် လ္ပာ်ပၠန်ဂတးတံတုဲ သွက်ဂွံလုပ်ကပေါဲဗ္တိုက်အလဵုဇကုဂှ် လုပ်ကၠုၚ်တၟာဂလိုၚ်နွံရ။ ဟိုတ်ဂှ်ရ ပ္ဍဲကဵုကျဂှ် ဒှ်ပရဲမွဲသာ်ကီုဏောၚ် နကဵုအဲ မိက်ဂွံဟီုရ” သာ်ဝွံ ဟီုရ။
သ္အာၚ်နူဂှ်ပၠန် ယဝ်ရပြံၚ်လှာဲကၠုၚ် လ္ပာ်ပေါဲဗ္တိုက်ဗၠးၜးဂကူ ကောန်ဂကူမန်တံမာန်မ္ဂး ပရေၚ်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်ဝွံ အခေါၚ်အရာသ္ဂောံတုဲဒှ်အာ ဗွဲမပြဟ် နွံဒၟံၚ်တၟာဂလိုၚ်ဏောၚ်ဂှ် နာဲနဂါ ထံက်ထ္ၜးလဝ်ရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ဂှ် နကဵုဂကူမန်တံ ပွမဂိက္တာန် အောန်စိုတ်ဂှ် ပြံၚ်လှာဲနဒဒှ်ဇြဟတ်တုဲ နကဵုဇြဟတ်ပံၚ်ကောံ ဗ္တိုက်သရိုဟ်အာ ကံၚ်ဇြဳပၞာန်မာန်ဏောၚ် ဒဒှ်ရပတှ်ေစှ်ေစိုတ်ဂှ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−NMSP-AD