နေဗျဳဒဝ်၊ ဨပရဴ ၄
နကဵုတၚ်ထ္ၜးဟိုတ် သၞောဝ်ယိုက်ဂၠေၚ်လျိုၚ်ပၞာန်ဂှ် ဂကောံဗော်သွး ကေုာံ သၞာဲဒဴကေတ်သြန်လှုဲတံကဵု ကေတ်အခေါၚ်အရာတၞဟ်ဟ်တံဂှ် ကေတ်အာဒုဟ်ဒဏ်ဏောၚ် ဒုက္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် သဵုဝေန် ဟီုရ။
ပ္ဍဲဂိတုဨပရဴ ၂ ဂှ် ပ္ဍဲၝောံခန်အံၚ်သာန် နွံဍုၚ်ဒပ်ဗထူဂှ် အခိၚ်ဆဵုဂဗကဵု ကောန်တန်ဗ္တောန် သ္ကိုပ်ဒပ်ကောံ ဒပ်တိုက်တံ၊ အလံၚ်ဗိုလ်တံဂှ် ဟီုလဝ်တုဲ ကေတ်အာအရေဝ် နကဵုဗီုပြၚ်သာ်လဵုရောဟီုဂှ် ဟီုပ္တိတ်လဝ် ဟွံမွဲရ။
ဒုက္ဍိုပ်သ္ကိုပ်ပၞာန်ဂှ် ဘပဠသ္ပအနိၚ်အထက် လ္တူညးဟွံကၠိုဟ်ဟွံတီ နဲဥပဒေ ကေုာံ သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ညးမိက်ဂွံပ္တိတ်ပရဲ သြန်လှုဲတံကဵု အခေါၚ်အရာတၞဟ်ဟ်တံဂှ် သွက်ဂွံကေတ်အရေဝ် ထ္မံက်ပ္တိတ်အာ ဗွဲမဗဗွဲကဵုသၞောဝ်ဂှ် စၞောန်ပ္ညုၚ်လဝ်ရ။
ညးဍုၚ်ကွာန် ဒၟံၚ်တွဵုရးမန်မွဲတၠဂှ် ဒုက္ဍိုပ်သ္ကိုပ်ပၞာန် ၜိုန်ရဟီုဂးဒၟံၚ် လ္ပအာတ်သြန်လှုဲတံဂှ်ကီုလေဝ် ပ္ဍဲကဵုကွာန်ဂမၠိုၚ်ဂှ် သွက်ဂွံထံက်ပၚ် ညးလုပ်ပၞာန်တံဂးတုဲ လၟေၚ်ဂိတု အာတ်ဒၟံၚ်သြန် ကေုာံ မွဲလၟေၚ်တုဲမွဲလၟေၚ် အာတ်ဒၟံၚ်သြန်တံ နွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကွာန်မွဲကဵုမွဲဂှ် ဟွံတုပ်ပုဟ်။ လ္ပာ်ပိုယ်တံဂှ်တှ်ေ လၟေၚ်ဂိတုဏောၚ်။ ကွာန်သ္ၚိမၞုံလ္ၚီပြၚ်တံဂှ်ရ ညအ်ဂှ် ဒးဗလးမၞိဟ်လုပ်ပၞာန် ၜါတၠရ။ ဗလးတုဲ သွက်ညးၜါတၠဏံဂှ် မွဲသ္ၚိ ဒးစုတ်ကဵု ၅၀၀၀ လၟေၚ်ဂိတု။ ကွာန်လ္ၚဵုတံဂှ်တှ်ေ ကေတ်မွဲတဲဓဝ်။ မွဲသ္ၚိ ဒးစုတ်ကဵု ၂၀၀၀၀ ။ အာတ်ဂၠိုၚ်နူဏံလေဝ် နွံ။ အာတ်မိက်ဒၟံၚ်သြန်ဂှ်တှ်ေ ဇၟာပ်ကွာန်ဂှ် ဟီုဂွံရ။” သာ်ဝွံ သ္ဂးရ။
သၞောဝ်ယိုက်ဂၠေၚ်လျိုၚ်ပၞာန်ကဵု သၞောဝ်ဒပ်အရန်တံဂှ်ဝွံ သွက်ဂွံမၚ်မွဲစဵုဒၞါ လျိုၚ်ပိုယ်ပိသာ်ဂှ်ကီု၊ တန်တဴကဵုလ္တူအကာဲအရာ ပရေၚ်ကြံၚ်မ္ၚိုဟ် ကေုာံ ပဋိပက္ခ ပရေၚ်ဍုၚ်ကွာန်ဂၠးတိတံဂှ်တုဲ ကလေၚ်ပၠောပ်လဝ်လမျီုရောၚ် ထ္ၜးလဝ်ဟိုတ်ရ။
အခိၚ်လၟုဟ် သွက်ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်ဂးတုဲ သ္ကိုပ်အုပ်ဓုပ်ကွာန်အရာပ် မဆေၚ်စပ်တံ၊ ဂကောံအုပ်ဓုပ်တံ ကေုာံ အလဵုဒပ်ကံၚ်ဇြဳပၞာန်တံ ပကောံပကေဝ်ကောန်ပၞာန် အတေၚ်အဓမ္မကီု၊ အာတ်မိက် သြန်လှုဲ ဂၠိုၚ်ကဵုဆတံဂှ် ကၠောန်ၜိုတ်ဒၟံၚ်ရ။
ညးဒေသ တွဵုရးဍုၚ်မန် မွဲတၠပၠန်ဂှ်လေဝ် ထ္ၜးဟိုတ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ ပ္ဍဲကဵုသ္ၚိ မၞုံပ္ဍဲကွာန်ရးတံဂှ် ဗက်ဒၟံၚ်လှုဲတံ ကၠောန်သ္ပဒၟံၚ်အဆက်က်တုဲ ကဵုလှုဲဟွံမာန်မ္ဂး ဒးလုပ်ပၞာန်ရဟာ ဒှ်ဒၟံၚ်ဓဝိၚ်တံလေဝ် နွံဂှ် ဟီုရ။
“ကွာန်ပိုယ်တံ ဇၞော်တုဲ မွဲသ္ၚိတှ်ေ မွဲဠက်။ ကွာန်လ္ၚဵုလ္ၚဵုတံဂှ်တှ်ေ ဒးၜါဠက် ဂွံမိၚ်ကေတ်ရ။ ဍေံတံမိက်ဂွံဟီုဂှ်တှ်ေ ကွာန်ဇကု ဟွံကဵုတှ်ေ ရဲကွာန်ဇကု ဒးအာဏောၚ်။ ဍေံတံ လိၚ်ကေတ်ဟွံဂွံပုဟ် မိက်ဂွံသ္ဂးဂှ်တှ်ေ ရဲကွာန်ဇကု ဒးအာဏောၚ်။ အဓိကဂှ်တှ်ေ ဍေံတံသွက်ဂွံလိၚ်မၞိဟ်ဂှ် ဗက်အာတ်လှုဲ။ နကဵုညးဍုၚ်ကွာန်တံ ဒးဖေက်ဒၟံၚ်ဏောၚ်။ အခိၚ်လဵု စိုပ်အလန်ဇကုရော၊ ဇကုဟွံကဵုတှ်ေ ဇကုဒးအာရဟာ ဒှ်သာ်ဏံ” သ္ဂးရ။
အခိၚ်လၟုဟ် ကံၚ်ဇြဳပၞာန်ဝွံ ကၠာနဲဥပဒေယိုက်ဂၠေၚ်လျိုၚ်ပၞာန် ဟွံဂွံတိတ်ဏီဂှ် စပံက်ဒၟံၚ်တန်ဗ္တောန်ကွတ်ပၞာန် ပ္ဍဲဘာတန်ဗ္တောန် ၁၃ ဘာ ပ္ဍဲကဵုရးဒေသ ကေုာံ တွဵုရး ၉ တံဂှ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်အပ္ဍဲဍုၚ် ဗွဲမဂၠိုၚ်ဝွံ တိတ်စ္ဍးဒၟံၚ် ဍုၚ်ဇိုၚ်ဝုတ်ဒိုဟ် ဍုၚ်သ္အာၚ်တံကဵု တိဍာ်ဗၠးၜးတံ နွံဒၟံၚ် အရိုဟ်ဟ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−MOI