ဗြဝတဳ၊ ဨပရဴ ၅
ပပ္တံနူကဵု ဂိတုဨပရဴ ၄ အခိၚ်နူဂယးပြဟ်ဂှ်တုဲ လ္ပာ်ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် တေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ် ကေုာံ ဒၞါဲပွဳပွူဗ္ဒါဲဗ္ဒါဲတံ နကဵုက္ၜၚ်ကျာ ဟွံပိုတ်သ္ကုတ်ဂှ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ညးဒေသတံရ။
ပေါဲဗ္တိုက်ပရေၚ်ပၞာန် ဂကောံပံၚ်ကောံပၠန်ဂတး KNLA ကေုာံ ဒပ်ကံၚ်ဇြဳပၞာန် မစက္တဵုဒှ်လဝ် ပ္ဍဲဂိတုမာတ် ၇ တုဲကၠုၚ်တေံဂှ်ဝွံ စဵုကဵုဂိတုဨပရဴ ၄ ဗ္ဒါဲမွဲဂိတုပြၚ် အကာဲအရာပရေၚ်ပၞာန်ၜါလ္ပာ် ဆက်သ္ကာတ်မြဟ်ဒၟံၚ်ဖိုဟ်ရောၚ် ပရိုၚ်တမ်ရိုဟ်ဂမၠိုၚ် သ္ဂးလဝ်အိုတ်ရ။
ပ္ဍဲဂိတုဨပရဴ ၃ ဂှ် ကွာန် (ဝှေ့ရှမ်း) ဗ္ဒါဲတေန်ဂါန်ညဳနံၚ်၊ ပ္ဍဲဂိတုဨပရဴ ၄ ဂှ် အကြာကွာန် ဝှေ့ရှမ်း ကဵု ကွာန် ဇရပ်ဖျူကုန်း ဂှ် ဒပ်ကံၚ်ဇြဳပၞာန် ထောံလဝ်မခတိုဟ် နူကဵုက္ၜၚ်ကျာတုဲ ဒၞါဲပွဳပွူတေန်ဂါန်ညဳနံၚ်ဂှ်လေဝ် ပန်ပှော်ဒၟံၚ် နကဵုလွဟ်ဇၞော် သ္ကာတ်တ်မြဟ်ဟ်ရောၚ် ပရိုၚ်တမ်ရိုဟ်ဒေသတံ ဟီုရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ တရဴကျာတံဂှ်တုဲ ပ္ဍဲကွာန်ဂမၠိုၚ် မပ္တံကဵုတေန်ဂါန်ညဳနံၚ်၊ ဝှေ့ရှမ်း တံဂှ် သ္ၚိဒၟံၚ်ညးဍုၚ်ကွာန်ဗွဲမဂၠိုၚ်ဂၠေၚ် ဇီုကပိုက်လီုလာ်အာတံ နွံဒၟံၚ်ရောၚ် ဂွံတီကေတ်ရ။
ဒပ်ကံၚ်ဇြဳပၞာန် ဗက်စံၚ်ယတ်ဒၟံၚ် သ္ၚိဒၟံၚ်ညးဍုၚ်ကွာန်တံဂှ်တုဲ မခတိုဟ်တံဂှ်လေဝ် ထောံဖျေံဒၟံၚ် နူကဵုဒရုၚ် ကေုာံ က္ၜၚ်ကျာတံတုဲ သ္ၚိဒၟံၚ်ဗွဲမဂၠိုၚ်ဂၠေၚ် ပၟတ်တူလီုလာ်အာလဝ်ဂှ် ဒပ်မဟာ ၆ ခရိုၚ်ဒူပလာယာ KNU လလောၚ်ပ္တိတ်ကဵုလဝ်သမ္တီရ။
ဒပ်ပံၚ်ကောံပၠန်ဂတး KNLA တံ ဗ္တိုက်ဒၟံၚ် ကုန်ဗျူဟာ ကေုာံ တမ်ဒပ်ကံၚ်ဇြဳပၞာန် ၃၅၇ ဗ္ဒါဲဂၠံၚ်ဇၞော် ကွာန်ဝှေ့ရှမ်း ကေုာံ တေန်ဂါန်ညဳနံၚ်တံဂှ်တုဲ ကဵုကရောၚ်ပၞာန် ကၠုၚ်ကဵုအရီုဗၚ်ပၞာန် ပ္ဍဲတေန်ဂါန်ညဳနံၚ်ဂှ်လေဝ် ပရၚ်ဒိဓဗတ်ဇီုကပိုက်တံ ဒှ်လဝ်တုဲ ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်လဝ်တုဲ ညးဍုၚ်ကွာန်ကောန်အရာပ် ဒးတုဲ ဒးချိုတ်အာဂှ်ကီု၊ ကလိဂွံလဝ်ဝပ်လေဝ် ဗွဲမဂၠိုၚ်ဂၠေၚ်နွံတုဲ ညးဍုၚ်ကွာန် ၁၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU