ၜဳကလေၚ်၊ ဨပရဴ ၅
ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲသၞေဟ်ကၚ်တြေံ ကံက်အခေါန်လုပ်ဍုၚ် ပါၚ်လုပ်ပွိုၚ်ဍုၚ်ၜဳကလေၚ် တွဵုရးဍုၚ်မန် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၄ တၠ ဇီုကပိုက်ချိုတ်မာန်ဂှ် ဂွံတီကေတ် ဇရေၚ်ညးဒေသတံကဵု PDF တံရ။
ပ္ဍဲဂိတုဨပရဴ ၃ ဗ္တံၜိုတ် ၇ နာဍဳဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်ဂြာတ်လဝ်မခတိုဟ် ၁၀ မ နကဵုဒရုၚ် ကုဒၞါဲသၞေဟ်ကၚ်တြေံ ကံက်အခေါန်လုပ်ဍုၚ် ကောန်ဒပ်ဗၠာဲသၟိၚ် ကေုာံ ကံၚ်ဇြဳပၞာန် ဖျေံလဝ်ဒပ် ဇြဟတ်ၜိုတ်ဗ္ဒါဲ ၄၀ ဂှ်ရ။
အပ္ဍဲပရေၚ်ဗ္တိုက်ဏံ ဒပ်ကံၚ်ဇြဳပၞာန် ဒးဂိလဝ်ဂှ်ဝွံ နူတမ်ဒပ်ဖျေံသ္ဇိုၚ်ၜဳကလေၚ် ပန်စုတ်လဝ်လွဟ်ဇၞော် စဵုကဵုဗ္တံ ၉ နာဍဳ ဟွံပိုတ်သ္ကုတ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် ကြာန်န်တုဲ ဒတုံဗ္တိုဟ်ထ္ကးအာလဝ် ပ္ဍဲအရာပ်(ဘိုးလှကြီး) ဍုၚ်ၜဳကလေၚ် နွံကီုလေဝ် ညးဍုၚ်ကွာန်ကောန်အရာပ် ဇီုကပိုက်ကလိဂွံဝပ် ဟွံမွဲပုဟ်ဂှ် ညးဒေသတံ ဟီုရ။
အပ္ဍဲပရေၚ်ဗ္တိုက်ဏံ ကောန်ဒပ်ကံၚ်ဇြဳပၞာန် ဟွံအောန်နူကဵု ၄ တၠ ကလိဂွံလဝ်ဝပ်တုဲ ချိုတ်အာတံလေဝ် နွံလဝ်ဂှ် ပရိုၚ်တမ်ရိုဟ်ဒေသတံ ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲသၞေဟ်ကၚ်တြေံ ကံက်အခေါန်လုပ်ဍုၚ် ၜဳကလေၚ်ဂှ်ဝွံ ဗက်ဒၟံၚ်သြန် ဇရေၚ်ညးဍုၚ်ကွာန်အာတရဴတံကီု၊ ရပ်ဒက်စၟဳတ်တံကဵု ပန်ပှော်လွဟ်ဇၞော် အပ္ဍဲကွာန် ဒၞါဲညးဍုၚ်ကွာန်ကောန်အရာပ် မံၚ်တန်တဴတံဂှ်ရ။
တုဲကၠုၚ် ပ္ဍဲဂိတုမာတ် ၂၃ တေံဂှ်လေဝ် အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ်ဂှ် ကောန်အရာပ် ၂ တၠ ချိုတ်တုဲ ၄ တၠ ကလိဂွံလဝ်ဝပ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ