မတ်မလီု၊ ဨပရဴ ၅
ပ္ဍဲဍုၚ်မတ်မလီု တွဵုရးဍုၚ်မန်ဂှ် သွက်ဂွံကၠောန်ဗဒှ် ညံၚ်သ္ဘၚ်အတး ဂွံစဳဂးတုဲ ကံၚ်ဇြဳပၞာန် အာတ်မိက်ဒၟံၚ်သြန် ဇရေၚ်တၠကမၠောန်တံ နွံဒၟံၚ်ရောၚ် သြန်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
ကံၚ်ဇြဳပၞာန်ဝွံ သွက်ဂွံကၠောန်ဗဒှ်သ္ဘၚ်အတး ပ္ဍဲမတ်မလီုဂှ် စသိုၚ်ခၞံဒၟံၚ် ကၞာထးဗဟဵု ပ္ဍဲဂၠံၚ်ဇိုၚ်ၜဳတံဂှ်တုဲ နကဵုတၚ်ထ္ၜးဟိုတ် သ္ဘၚ်ဂွံစဳဂှ် ကၠောန်သ္ပဗက်ဒၟံၚ်သြန်ရ။
ပ္ဍဲအရာအာတ်မိက်သြန် ဇရေၚ်တၠကမၠောန်ပရေၚ်ပိုန်ဒြပ်တံဂှ် ခုတ်ပ္တန်လဝ်ၚုဟ် ဟွံမွဲကီုလေဝ် ကမၠောန်မွဲမွဲမ္ဂး အောန်အိုတ် ဒးကဵုဒၟံၚ် နူပိကိုဋ်ဒ္ကေဝ် ဂၠိုၚ်ကဵုစှော်ကိုတ်ဂှ် ဂွံတီကေတ်ရ။
ပ္ဍဲအရာအာတ်မိက်သြန် သွက်ဂွံကၠောန်ဗဒှ်သ္ဘၚ်အတးဂှ် ဒးအာတ်မိက်ဒၟံၚ်သြန် ကုကမၠောန်မဆက်စပ်ကဵု ဌာနမဆေၚ်စပ်ကံၚ်ဇြဳပၞာန်တံဂှ်တုဲ ၜိုတ်စေတနာ ဟီုလဝ်ကီုလေဝ် ဒးစုတ်ဒၟံၚ်ကဵု သြန်ဂၠိုၚ်ကဵုကိုဋ်ဂှ် တၠကမၠောန်ပရေၚ်ပိုန်ဒြပ် ဟွံမိက်ထ္မံက်ယၟုမွဲတၠ ဟီုရ။
“ဗက်ကဵုကမၠောန်ဇကုတုဲ ဥပမာ ကမၠောန်ဍာ်တံဟီုမ္ဂးလေဝ် ဌာနကမၠောန်ဍာ် အာတ်ရ။ ဌာနညးကဵုညး ဒုၚ်ဒၟံၚ်ဒါန်အိုတ်ရ။ ဒးသိုၚ်ကဵု ကၞာထးသာ်ဏံတုဲ ဌာနတံဂှ်တှ်ေ ဗက်ဒုၚ်ဒါန် တၠကမၠောန်နွံသၟဝ်တဲဇကုတံဂှ်ရ။ ကၠောန်ဒၟံၚ်သာ်ဏံရ။ ဍေံဂှ်တှ်ေ ၜိုတ်စေတနာနွံရဏောၚ်။ ဆ္ဂး တၠကမၠောန်တံဂှ် ဍေံတံ စုတ်မံၚ် ပိပန်မသုန်ကိုဋ်” သာ်ဝွံ သ္ဂးရ။
ကၠာတေံဂှ် ကံၚ်ဇြဳပၞာန်ဝွံ ကဵုဇြဟတ်ဂရိုဟ် ကုတၠကမၠောန်ပရေၚ်ပိုန်ဒြပ် ကေုာံ ကမ္ပဏဳတံဂှ်တုဲ ကဵုသိုၚ်ခၞံကၞာထးကီုလေဝ် သၞာံဏံဂှ် သွက်ဂွံသိုၚ်ခၞံကၞာထးဂှ် ကဵုကၠုၚ်ဇြဟတ်ဂရိုဟ် ဟွံမွဲပုဟ်ဂှ် ညးဆက်ဟီုရ။
ဆ္ဂး သၞာံဏံဂှ် ညံၚ်သ္ဘၚ်အတးဂွံစဳ ဌာနမဆေၚ်စပ် သၟဝ်တဲကံၚ်ဇြဳပၞာန်တံ က္ဍိုက်ပ်တုဲ ကဵုသိုၚ်ခၞံကၞာထး သွက်ဌာနမဆေၚ်စပ်တံဂှ်တုဲ တၠကမၠောန်တံဂှ်တှ်ေ ကဵုထံက်ပၚ်နူလက္ကရဴဂှ် ဂွံတီကေတ်ရ။
ညးမသွံတြးဒၟံၚ် ကပေါတ်အတးမွဲတၠဂှ် ကံၚ်ဇြဳပၞာန် ၜိုန်ရဟီုဒၟံၚ် ကၠောန်အာညံၚ်သ္ဘၚ်အတး ဂွံစဳဏောၚ်ကီုလေဝ် နကဵုညးဍုၚ်ကွာန်တံ ဟိုတ်နူစိုတ်ဟွံလုပ်စဂှ်ရ ကပေါတ်အတးသှ်ေဒၟံၚ်ကၠာတေံရဂှ် သွံဟွံတိတ်မံၚ်ပုဟ်ဂှ် ဟီုရ။
“အခိၚ်ဏံ ပိုယ်တံတှ်ေ ပၠောပ်ဒၟံၚ်ကပေါတ်တံယျ။ စနူကဵုပဠောံတံဂှ် တက်တဆိပ်ဗီုလဵုဏောၚ်၊ ဗၞိက်ပယျေဝ် သွက်အတးတံဂှ်တှ်ေ သာ်ဏံဏောၚ်။ ပၠောပ်မံၚ် ကပေါတ်အတးတံ ဗီုတံဏံယျ။ သၞာံတုဲတေံတှ်ေ ထိုၚ်ဖုၚ်ဒုၚ်ဍာ်တံ ကပေါတ်သှ်ေဒၟံၚ်တံဂှ် သွံပ္တိတ်ညိညတှ်ေ ဟွံဂွံသွံဟဂှ်ရ။ ကၠာဂွိုအ်သီအဝဵုတေံဂှ်တှ်ေ ထိုၚ်ဖုၚ်ဒုၚ်ဍာ်တံဂှ်တှ်ေ ဂွံသွံကဵုလ္ၚီဏောၚ်။ လၟုဟ်ဂှ်တှ်ေ ကပေါတ်သှ်ေဒၟံၚ်နူသၞာံတုဲတေံရဂှ် ၝချိက်လဝ်ဂတမုက်ဇကုရဂှ် ဟွံတိတ်ပုဟ်” သာ်ဝွံ သ္ဂးရ။
ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ဂှ်လေဝ် ပ္ဍဲမတ်မလီု သွက်ဂွံကၠောန်ဗဒှ် သ္ဘၚ်အတး ညံၚ်ဂွံစဳဂှ် ကဏ္ဍညးကဵုညး သွက်ဂွံကၠောန်ၜိုတ် ဒစးဒုၚ်ပလေဝ်ပလေတ်လဝ်ဂှ်ကဵု သွက်ဂွံကၠောန်ဗဒှ် သ္ဘၚ်အတး ညံၚ်ဂွံအံၚ်ဇၞးဂှ် စၞောန်ပ္ညုၚ်ကၠုၚ် အပ္ဍဲကောံဓရီု မကၠောန်ဗဒှ်လဝ် ပ္ဍဲဂိတုမာတ် ၁၃ တုဲကၠုၚ်တေံရ။
လ္တူဍုၚ်မတ်မလီု စဳဇန်လဝ် သွက်ဂွံကၠောန်ဗဒှ် သ္ဘၚ်အတးဂှ် လ္ပာ်ကံၚ်ဇြဳပၞာန် ဒၞါဲလုပ်တိတ်ဍုၚ်တံဂှ် သၠုၚ်ပ္တိုန်လဝ်ပရေၚ်ဂီုကၠီုတုဲ လၟေၚ်ဒဒှ်တ္ၚဲ ကၟာတ်လဒဵုဂၠိုက်ဂၠါဲရပ်ဒက်တံ ကၠောန်ၜိုတ်ဒၟံၚ်အဆက်က်ရောၚ် ဂွံတီကေတ် အတိုၚ်ဂလာန်ညးဒေသတံရ။
လအာတုပ်သာ်ဂှ်ကီု ပ္ဍဲနေဗျဳဒဝ်၊ လ္ဂုၚ် မပါလုပ် ပ္ဍဲရးဒေသ ကေုာံ တွဵုရးလ္ၚဵုတံဂှ် သွက်ဂွံကၠောန်ဗဒှ်သ္ဘၚ်အတး ညံၚ်ဂွံစဳဂှ် လ္ပာ်ကံၚ်ဇြဳပၞာန် ဒစးဒုၚ်ပလေဝ်ပလေတ်ဒၟံၚ်တုဲ နကဵုညးဍုၚ်ကွာန်တံ သိုၚ်ခၞံကၞာထးအတးတံမာန်ရောၚ် လလောၚ်တြးလဝ်ရ။
ပ္ဍဲသ္ဘၚ်အတး မကၠောန်ဗဒှ်အာ ပ္ဍဲနေဗျဳဒဝ် ဒၞါဲရုၚ်ဌာန်ဂအုပ် ဒပ်ကံၚ်ဇြဳပၞာန် ဖျေံသ္ဇိုၚ်ဂှ် မ္ၚးနူကဵုသ္ဘၚ်အတးသၚ်္ကြာန်ကွာ်ဂၠံၚ်ဂှ် သၟာဒယှ်ေဒွက် K Pop ကိုဝ်ရဳယျာတံလေဝ် သ္ဂောံလဟိၚ်အာစိုတ်နွံဂှ် လ္ပာ်ကံၚ်ဇြဳပၞာန် တြးလဝ်ဝါဒရ။
ပရိုၚ်−သြၚ်လောန်တိုၚ်(မ်)
ဗီု−YLT