လ္ဂုၚ်၊ ဨပရဴ ၇
ဂကောံရပ်လွဟ်ကောန်ဍုၚ်အရၚ် ပၠန်ဂတးဒၟံၚ်ကဵု ကံၚ်ဇြဳပၞာန် K3C ကဵု ညးကဵုကသပ်ပရေၚ်ဍုၚ်သ္အာၚ်အမေရိကာန် ဒဴရက်ချဝ်လက်တံဝွံ တုဲကၠုၚ်ဂိတုမာတ်ကြပ်အိုတ်တေံ ဆဵုဂဗလဝ် အလန်ပထမကၠာအိုတ်ရ။
ပ္ဍဲကဵုဂကောံကဵုလဝ်ယၟု K3C ဂှ် ဒပ်ပၞာန်ဗၠးၜးကချေၚ် KIA ၊ ဗော်သွးကောန်ဂကူကရေၚ် KNU ၊ ဗော်တောတက်ကောန်ဂကူကရေၚ်ဍာဲ KNPP ကေုာံ ဒပ်ပၠတရဴကောန်ဂကူချေၚ် CNF တံ ပါလုပ်ရ။
ညးကဵုကသပ် ပရေၚ်ဍုၚ်သ္အာၚ် အမေရိကာန်ဂှ် နူကဵုဇာဇၞိက်ပရေၚ်မၞိဟ် X မွဲကဆံၚ် သွက်ဂွံဒက်ပ္တန် အနာဂတ်သွက်ညးဍုၚ်ကွာန်ဍုၚ်ဗၟာ ဂီုကၠီုပတှ်ေဖျေံစိုတ်ဂွံတုဲ သ္ဂောံခိုဟ်စအနာဂတ်တေံမာန် နူဗွိုၚ်ဍုၚ်သ္အာၚ်တံ သာ်လဵုသၠဲပ္တိုန်အရီုဗၚ်မာန်ရောဟီုဂှ် သဳကၠဳလဝ်ရောၚ် ထ္မံက်ထ္ၜးလဝ်ရ။
ညးအုပ်ကာ−၂ ဗော်တောတက်ကောန်ဂကူကရေၚ်ဍာဲ KNPP ဥူအံၚ်သာန်မျေတ်ဂှ် ဟီုဂးပါ်ပရအ်လဝ် အကာဲအရာပရေၚ်ဍုၚ်ကွာန်၊ ပရေၚ်ပၞာန်တံတုဲ ပရေၚ်ညးဒဒိုက်တံဂှ်လေဝ် ဆက်ပံၚ်တောဲအာဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံ သ္ပဒၟံၚ် Update Sharing သၟးရဏောၚ်။ တုဲပၠန် ပိုယ်တံ ၂/၃ ဂကောံ ဆဵုညးသ္ကအ်ဟီုဂှ် ဟီုဒၟံၚ်ပရူအကာဲအရာပရေၚ်ပၞာန်၊ ပရေၚ်ဍုၚ်ကွာန်လၟုဟ်ရ။ ကလၚ်ညအ်တုဲ အကာဲအရာက္တဵုဒှ်ဒၟံၚ် အပ္ဍဲဍုၚ်ဗၟာဏံဂှ် ဍေံတံ ကၠိုဟ်ဒၟံၚ်ရ။ စပ်ကဵုပရေၚ်ညးဒဒိုက်တံတုဲ ဆက်ကၠောန်အာ ပရေၚ်ပံၚ်တောဲရေၚ်တၠုၚ်တံဏောၚ်။ ၜိုတ်ဏံရ တၚ်သ္ဂုတ်သွာတ် ပၟိက်ဇၞော်ကာတၟေၚ်တံဂှ်လေဝ် ဟွံမွဲပုဟ်” သာ်ဝွံ သ္ဂးရ။
ညးမၞုံအခေါၚ်ဟီုဂး ဒပ်ပၠတရဴကောန်ဂကူချေၚ် CNF သလိုၚ်ထက်နဳဂှ်လေဝ် ပရေၚ်ထံက်ပၚ်အရီုဗၚ်ပရေၚ်ဗ္စာရဏာမၞိဟ် ဂွံစိုပ်ဇရေၚ်ညးဍုၚ်ကွာန် ဒးဂိလဝ်ဍာံဍာံတံဂှ် သဳကၠဳလဝ်ရောၚ် ကလေၚ်လဝ်လိက် ကုသြၚ်လောန်တိုၚ်(မ်) နကဵုလိက်ရ။
“အဓိကဂှ်တှ်ေ သီုအမေရိကာန် မပါလုပ် ကိစ္စပရေၚ်ထံက်ပၚ်အရီုဗၚ် ပရေၚ်ဗ္စာရဏာမၞိဟ်တံရ။ အထံက်အပၚ်တံဏံ ညံၚ်ဂွံစိုပ်ဇရေၚ်ညးဍုၚ်ကွာန် ဒးဂိလဝ်ဍာံဍာံတံ နကဵုဂၠံၚ်ဍာန်ဒးဒးဂှ် သဳကၠဳလဝ်ရ။ ဒးဟီုမ္ဂး Cross Border Assistance ရဏောၚ်။ တုဲပၠန် ဂလာန်မအလ ဟီုလဝ် ပ္ဍဲတ္ၚဲဒပ်ပၞာန် မရနုက်ကဵု ၇၉ ဝါဂှ် လ္ပာ်ပိုယ်တံ လှာဲဂတးလဝ်လညာတ်ရ” သာ်ဝွံ သ္ဂးရ။
ပ္ဍဲကဵုဂကောံ K3C ဆဵုဂဗလဝ်ကဵု ညးကဵုကသပ်ပရေၚ်ဍုၚ်သ္အာၚ် အမေရိကာန်ဂမၠိုၚ် ဗော်သွးကောန်ဂကူကရေၚ် KNU ဂှ် သြၚ်လောန်တိုၚ်(မ်) ဆက်စၠောံသၟာန်သၟုက်လဝ် ညးမၞုံအခေါၚ်ဟီုဂးကီုလေဝ် ကလေၚ်လဝ်ပရိုၚ်ဂှ် ဟွံမွဲရ။
သ္အာၚ်နူဂှ်ပၠန် ညးဒုၚ်တာလျိုၚ်လလောၚ်ပရိုၚ် ဒပ်ပၞာန်ဗၠးၜးကချေၚ် KIA သ္ကိုပ်ဗိုလ်ဇၞော် နဝ်ဘူဂှ် ပရေၚ်ဆဵုဂဗ K3C ကဵု ညးကဵုကသပ်ပရေၚ်ဍုၚ်သ္အာၚ် အမေရိကာန်တံဂှ် ဂွံတီကေတ်ၜိုတ်ပရိုၚ် လ္တူဇာဇၞိက်ပရေၚ်မၞိဟ်သၟးရတုဲ နူကဵုကမ္မတဳဗဟဵုဂှ် မုဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုမာတ် သတ္တာဟတတိယတုဲကၠုၚ်တေံ အတိုၚ်သၞောဝ် Burma Act ဂှ်မ္ဂး သွက်ဂွံထံက်ပၚ်ဍုၚ်ဗၟာ အမေရိကာန်ဒဝ်ဠာ ၁၂၁ ပြကောဋိကိုဋ်ဂှ် ကၠတ်ထတ်သၟဝ်ကဵု ကၠတ်ထဝ်လ္တူသီုၜါ သ္ပဒတန်လဝ် ခရိတ်အရပ်စပ်အလဵုအသဳအမေရိကာန် သၞာံ ၂၀၂၄ တုဲ သမ္မတဂျဵုဗိုၚ်ဒေန် ထ္ပက်လဝ်စၟတ်တဲရ။
သ္ပဒတန်ဂွံ ပရေၚ်ပါ်ပရအ်ဗာတ်ဂျက် သွက်ဍုၚ်ဗမာတုဲ ဂွံမွဲအံၚ် ညးကဵုကသပ် ပရေၚ်ဍုၚ်သ္အာၚ်အမေရိကာန် ကဵု K3C တံ ဆဵုဂဗလဝ်ညးသ္ကအ်တုဲ အတိုၚ်သၞောဝ် Burma Act ဂှ်မ္ဂး သွက်ဂွံထံက်ပၚ် အရီုဗၚ်နဲကွတ်ပညာ လွဟ်လက်နက်ဟွံသေၚ်ဂမၠိုၚ် ကုဂကောံရပ်လွဟ်ကောန်ဍုၚ်အရၚ် ကေုာံ ဂကောံဒပ်စဵုဒၞါညးဍုၚ်ကွာန် PDF တံ မဒှ်ရ။
သ္အာၚ်နူဂှ်ပၠန် သွက်ဂွံထံက်ပၚ် ကုအလဵုအသဳညဳသၟဟ်ဂကူ NUG ၊ ကံၚ်ဇြဳကဵုကသပ်ကောန်ဂကူ NUCC ၊ ကမ္မတဳသ္ပစၞး ကၠတ်ထဝ်ကၟိန်ဍုၚ် CRPH ကေုာံ ညးချဳဒရာၚ် ဒစဵုဒစးတၠအဝဵု နနဲဟွံပကီုပရာပ် CDM တံ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−Twitter