ပ္ဍဲဍုၚ်ဗၟာ ညးဒဒိုက်ပါဲဒဴဘဲပၞာန် သၠုၚ်တိုန်ကၠုၚ် 

မတ်မလီု၊ ဨပရဴ ၇

ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ ဟိုတ်နူပဋိပက္ခရပ်လွဟ် မက္တဵုဒှ်ကၠုၚ်တံဂှ်တုဲ ညးဒဒိုက်ပါဲဒဴဘဲပၞာန် သၠုၚ်တိုန်ကၠုၚ်ဂှ် ရုၚ်ပ္ညဳပ္ညပ် စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်လဝ် ပ္ဍဲဂိတုဨပရဴ ၅ တေံရ။

ကြဴနူပရေၚ်သီအဝဵု သၞာံ ၂၀၂၁ တုဲ ဟိုတ်နူပဋိပက္ခ ကေုာံ အရာဟွံဂီုကၠီုတံဂှ်တုဲ ညးဒဒိုက်ပါဲဒဴဘဲပၞာန် ဒးထောံလသာသ္ၚိဌာန် ၂ ဒဿမ ၅ ပြကောဋိကိုဋ် သၠုၚ်တိုန်ကၠုၚ်လဝ်တုဲ လၟိဟ်မၞိဟ် ၂ ဒဿမ ၈ ပြကောဋိကိုဋ် ဒှ်အာလဝ်သ္ၚိဌာန်ဟွံမွဲဂှ် UNOCHA သ္ဂးရ။

အလုံဍုၚ်မွဲ ပေါဲဗ္တိုက်တံ သာသ္ကာတ်မြဟ်ကၠုၚ်ဂှ်ရ အန္တရာယ်ကောန်အရာပ်ဇီုကပိုက်တံ သၠုၚ်တိုန်ကၠုၚ်တုဲ အရာမနွံပၟိက် စပ်ကဵုပရေၚ်ဗ္စာရဏာပရေၚ်မၞိဟ်တံလေဝ် သာတုဲသၠုၚ်တိုန်ကၠုၚ်ဂှ် ကဵုလဝ်သမ္တီရ။

ပ္ဍဲတွဵုရးကချေၚ် ဒပ်ပၞာန်ဗၠးၜးကချေၚ် KIA စနူထ္ပက်ပၞာန် တုဲကၠုၚ်ပ္ဍဲဂိတုမာတ် ၇ တေံတုဲဂှ် လၟိဟ်မၞိဟ် ၁၈၀၀၀ ပြၚ်ဝွံ အပ္ဍဲပွိုၚ်ဍုၚ် ၁၀ ပွိုၚ်ဍုၚ်ဂှ် ထောံလသာသ္ၚိဌာန် ဒးပါဲဒလေတ်ဒၟံၚ်ရောၚ် လလောၚ်ပ္တိတ်လဝ်ရ။

ဟိုတ်နူပေါဲဗ္တိုက် မဆက်က္တဵုဒှ်ဒၟံၚ် ဗွဲဒိုဟ်ဗာယပ်ကၟိန်ဍုၚ်ဂှ်တုဲ ဇီုကပိုက်တဴ လ္တူကောန်အရာပ် မၞုံပွိုၚ်ဍုၚ်ကလေဝ်၊ ရးဒေသဇၞော်သက်ကိုၚ်တံ ဗွဲမသ္ကာတ်မြဟ်တုဲ ကောန်အရာပ် ဗၞတ် ၂၈၀၀၀ ဒးဒှ်လဝ်သ္ၚိဌာန်ဟွံမွဲဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ပ္ဍဲတွဵုရးဍုၚ်မန်ဂှ်လေဝ် ဟိုတ်နူပေါဲဗ္တိုက် မစက္တဵုဒှ်လဝ် ပ္ဍဲဂိတုမာတ် ၂၄ တုဲကၠုၚ်တေံဂှ်တုဲ ညးဍုၚ်ကွာန်ဒေသ နူပွိုၚ်ဍုၚ်ကျာ်မြဟ် ၆၀၀၀ ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်လဝ်တုဲ  သ္ၚိဒၟံၚ် ဟွံအောန်နူကဵု ၄၀၀ ပၟတ်တူလီုလာ်အာလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MSFC