ဗြဝတဳ၊ ဨပရဴ ၉
ဌာန်ဂအုပ်တမ်ဒပ် ခလရ ၂၇၅ ဖျေံသ္ဇိုၚ်ဍုၚ်ဗြဝတဳ ဍုၚ်ပယျဵုသေံ−ဗၟာ သွက်ဂွံဖျေံလွဟ်ဂှ် သီုၜါလ္ပာ် ဆက်ပ္ညဳပ္ညပ်ဒၟံၚ်ဖိုဟ်ရောၚ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ပရေၚ်ပၞာန်ဗလးတိတံရ။
တုဲကၠုၚ် ပ္ဍဲဂိတုဨပရဴ ၅ တေံ ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် ဗျူဟာကံၚ်ဇြဳပၞာန် ဖျေံသ္ဇိုၚ်တေန်ဂါန်ညဳနံၚ် ဗ္ဒါဲဍုၚ်ဗြဝတဳတံဂှ်တုဲ ထိၚ်ဒက်လဝ် အလုံဒေသတေန်ဂါန်ညဳနံၚ်မွဲရ။
ကြဴနူထိၚ်ဒက်သီဂွံ တေန်ဂါန်ညဳနံၚ်တုဲဂှ် ဒပ်ပံၚ်ကောံပၠန်ဂတး KNLA တံ ဆက်ဗိုၚ်လဝ် ဌာန်ဂအုပ်တမ်ဒပ် ခလရ ၂၇၅ ဖျေံသ္ဇိုၚ်ဍုၚ်ဗြဝတဳဂှ်တုဲ ဂကောံဒပ်ကံၚ်ဇြဳပၞာန် သွက်ဂွံဖျေံလွဟ်ဂှ် ၜါလ္ပာ် ပ္ညဳပ္ညပ်ဒၟံၚ်တံ ကၠောန်သ္ပဒၟံၚ်ရောၚ် တမ်ရိုဟ်ပရိုၚ်ပရေၚ်ပၞာန် ဟီုရ။
အခိၚ်လၟုဟ် ပ္ဍဲဍုၚ်ဗြဝတဳဂှ် တမ်ဒပ် ခလရ ၂၇၅ မၞိဟ်တီဂၠိုၚ် နဒဒှ်ဒပ်မၚ်ဍုၚ် မွဲဒပ်ရဟေၚ် သှ်ေဒၟံၚ်ရ။
မွဲလ္ပာ်ဂှ်ပၠန် သွက်ဂွံကၠုၚ်စိုပ်ကော်ဏာ ကောန်ဒပ်ကံၚ်ဇြဳပၞာန်ဖျေံလွဟ် နူကဵုဗျူဟာတေန်ဂါန်ညဳနံၚ်ကဵု ညးဒုၚ်ကာ နူဌာနမဆေၚ်စပ် ဒပ်ပၞာန်၊ ဗၠာဲသၟိၚ် လ္တူဍုၚ်ဗြဝတဳတံဂှ် လ္ပာ်ကံၚ်ဇြဳပၞာန် ပ္ဍဲဂိတုဨပရဴ ၇ အခိၚ်ဗ္တံဂှ် ဗလးဏာလဝ် က္ၜၚ်ကျာမွဲဖ္ဍိုက် ပ္ဍဲဍုၚ်သေံ ဍုၚ်မာဲချံက်ရ။
က္ၜၚ်ကျာဏံဝွံ ကလေၚ်ဖ္ဍိုက်ဏာလဝ် ကောန်ရဲသၟဝ်တဲကံၚ်ဇြဳပၞာန်လ္ၚဵုတံ ကေုာံ သြန်လှုဲတံရောၚ်ဂှ် ထ္မံက်ထ္ၜးလဝ် ပ္ဍဲပရိုၚ်သေံဂမၠိုၚ်ရ။
ပ္ဍဲတ္ၚဲပ္ညဳပ္ညပ်သဳကၠဳဒၟံၚ်ၜါလ္ပာ်ဂှ် ရမျာၚ်ပန်ပှော်တံ ဟွံဂွံမိၚ်ကေတ်ရတုဲ စဵုကဵုဂိတုဨပရဴ ၈ ပ္ဍဲကဵုဗ္ဒိုပ်ဗၠာဲသၟိၚ်၊ (ရှေ့တန်းရုံး) ကေုာံ ပ္ဍဲကဵုသၞေဟ်ကၚ်ဒဒန်ပယျဵု လ္တူဍုၚ်ဗြဝတဳတံဂှ် ဒပ်ကံၚ််ဇြဳပၞာန် ကေုာံ ညးဒုၚ်ကာသၟဝ်တဲတံ နွံဒၟံၚ်ဖိုဟ်ဏောၚ်တုဲ သၞေဟ်ကၚ်ပယျဵုလေဝ် ပံက်အာကၠုၚ်ဒၟံၚ်အိုတ်ဂှ် တမ်ရိုဟ်ပရိုၚ်ပရေၚ်ပၞာန်တံ သ္ဂးရ။
ဆ္ဂး သီုကဵုညးဒုၚ်ကာကံၚ်ဇြဳပၞာန် သၞာဲဒဴကဆံၚ်သၠုၚ်ၚ်တံ မပါလုပ် ညးဒုၚ်ကာသီုဖအိုတ် သွက်ဂွံတိတ်စ္ဍးနူ ဍုၚ်ဗြဝတဳဂှ် ပလေဝ်ပလေတ်ရေၚ်တၠုၚ်ဒၟံၚ်ဒတုဲယျဂှ်လေဝ် ဂွံတီကေတ်ဂှ် တမ်ရိုဟ်ပရိုၚ်ပရေၚ်ပၞာန် သ္ဂးရ။
ပ္ဍဲဍုၚ်ဗြဝတဳ အာကၠုၚ်မံၚ်စံၚ်ဒၟံၚ် အတိုၚ်ဗီုတြေံရတုဲ ညးလှုဲလှာ်နွံလ္ၚဵုတံဂှ်တှ်ေ အာစိုပ်ပါဲဒလေတ် လ္ပာ်ဍုၚ်မာဲချံက် ဍုၚ်သေံ နွံဒၟံၚ်ဂှ်လေဝ် ဂွံတီကေတ်ရ။
အခိၚ်လၟုဟ် သွက်ဂွံတီကေတ် အကာဲအရာ ဂကောံဒပ်ကံၚ်ဇြဳပၞာန်ဖျေံလွဟ် နူဗျူဟာတေန်ဂါန်ညဳနံၚ်တံဂှ်တုဲ ဆက်စၠောံသၟာန်သၟုက်ဒၟံၚ် ညးတာလျိုၚ်မၞုံအခေါၚ်ဟီုဂး KNU ဖိုဟ်ရ။
အတိုၚ်ဂလာန် တမ်ရိုဟ်ပရိုၚ်ကရေၚ်တံဂှ်မ္ဂး စွံလဝ် ကောန်ဒပ်ကံၚ်ဇြဳပၞာန်ဖျေံလွဟ် နူဗျူဟာတေန်ဂါန်ညဳနံၚ်တံ ပ္ဍဲဘာဗ္တောန်လိက် ဍုၚ်ယှိုဲကုက္ကိုဝ်တုဲ ဒပ်မၚ်ပယျဵုကရေၚ် BGF ပြံၚ်လှာဲလဝ်လွေဟ် ဒပ်သ္ကိုပ်ဗိုလ်ဇၞော်သဝ်ချေတ်တူ KNA မၚ်မွဲလဝ်ပရေၚ်ဂီုကၠီုရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−BBC