ဍာ်ဗု၊ ဨပရဴ ၉
ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် အပ္ဍဲကွာန် မၞုံအပိုၚ်အခြာဒေသပရေၚ်ပိုန်ဒြပ်ထဝါဲ ဗွဲတၟေၚ် ပွိုၚ်ဍုၚ်ဍာ်ဗု ရးတၞၚ်သဳဂှ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ ၇ တုဲ ဒပ်ကံၚ်ဇြဳပၞာန် ဇြဟတ်ဒပ် ၁၅၀ ပြၚ်ပါဂှ်ဝွံ ပါ်ကရောၚ်ပၞာန်ၜါက္ဍိုပ်တုဲ လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန် မၞုံအပိုၚ်အခြာဒေသပရေၚ်ပိုန်ဒြပ်ထဝါဲ ဗွဲတၟေၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ဟိုတ်နူကရောၚ်ပၞာန် လုပ်စိုပ်ကၠုၚ်တုဲ ညးဒေသနူကဵုကွာန် ၁၀ ကွာန်ပြၚ် မပ္တံကဵု ကွာန်နဘုလည်၊ ဝက်ချောင်း၊ ခမောင်ချောင်း၊ ကဒက်အိုင်၊ ဧကနိ၊ ရငဲ၊ မုဒူး၊ ထိန်ကြီး၊ လဲ့ရှောင်၊ ပရဒက် တံဒှ်တမ် ဂၠိုၚ်ကဵုလ္ၚီ ဒးဂြိပ်ဒဴပါဲလေတ်ဒၟံၚ်ရ။
ကရောၚ်ပၞာန်တံဏံဝွံ ပ္ဍဲဂိတုဨပရဴ ၈ အခိၚ်ပယျာံဂယးဂှ် နူလ္ပာ်ဝက်ခေါၚ်း စိုပ်ဒၟံၚ်လ္ပာ်ကဒက်အိုၚ်၊ ခမောၚ်ချောၚ်းတုဲ ပ္တဝ်အာဒၟံၚ်က္ဍိုပ် အပ္ဍဲဒေသနဘုလည် မၞုံအပိုၚ်အခြာဒေသပရေၚ်ပိုန်ဒြပ်ထဝါဲ ဗွဲတၟေၚ်တံရောၚ်ဂှ် ဂွံတီကေတ် အတိုၚ်ဂလာန် ညးဒေသတံရ။
ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ကီုလေဝ် ဒဵုကဵုအခိၚ်လၟုဟ် အကြာဒပ်ပံၚ်ကောံစဵုဒၞါညးဍုၚ်ကွာန်တံဂှ် ပေါဲဗ္တိုက်ၜါလ္ပာ် က္တဵုဒှ်ဟွံမွဲဏီပုဟ်ဂှ် ဂွံတီကေတ်ရ။
ညးဍုၚ်ကွာန်ဒေသ နူဒေသနဘုလည်ဂမၠိုၚ်ဝွံ အပ္ဍဲကာလသီအဝဵုဏံ ဟိုတ်နူပေါဲဗ္တိုက်တံကဵု ကရောၚ်ပၞာန်ကံၚ်ဇြဳပၞာန် လုပ်စိုပ်တံဂှ်တုဲ မွဲဏှမွဲဏှဟီုဂွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ လဆောဝ်လဆောဝ် ဒးပါဲဒဴမံၚ်ပၞာန် ကဵုဂိတုဏောၚ်ဂှ် သ္ဂးရ။
ပ္ဍဲရးတၞၚ်သဳ အပ္ဍဲကာလသီအဝဵုဏံ ဟိုတ်နူပေါဲဗ္တိုက်ၜါလ္ပာ်တုဲ ညးဒေသဂၠိုၚ်ကဵုဠက် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီပုဟ်ဂှ် ဂွံတီကေတ် အတိုၚ်ဂလာန် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ