နကဵု NUG ပ္ဍဲကဵုကိစ္စဆေၚ်စပ်ကဵုမူဝါဒပရေၚ်ဍုၚ်ကွာန်တံဂှ် ဟွံချပ်ဂၞန်ကဵု NUCC မွဲသာ် လ္ပကၠောန်ညိဂှ် ကဵုကသပ်

လ္ဂုၚ်၊ ဨပရဴ ၁၁

နကဵုအလဵုအသဳညဳသၟဟ်ဂကူ NUG ပ္ဍဲကဵုကိစ္စဆေၚ်စပ်ကဵုမူဝါဒပရေၚ်ဍုၚ်ကွာန်တံဂှ် ဟွံသဳကၠဳချပ်ဂၞန်ကဵု ကံၚ်ဇြဳကဵုကသပ်ပရေၚ်ညဳသၟဟ်ဂကူ NUCC မွဲသာ် လ္ပကၠောန်ညိဂှ် နူကဵုကောံဓရီုညးဍုၚ်ကွာန် ကဵုလဝ်ကသပ်ရောၚ် NUCC လလောၚ်ပ္တိတ်လဝ်ရ။

ပ္ဍဲကဵုတၚ်နၚ်ဖျေံစၟတ်လဝ် ၂၁ တၚ် နူကဵုကောံဓရီုညးဍုၚ်ကွာန် အလန်ဒုတိယ ဂွံၜါသၞာံပြၚ်တုဲ ကလေၚ်ကၠောန်ဗဒှ်လဝ်ဂှ် NUCC ကေုာံ NUG တံ သွက်ဂွံဒ္ဂေတ်ဗက်ထ္မံက်ရုပ်ရဴ ဗွဲမဗဗွဲကဵုပဋိညာန်ဖေဝ်ဒရာဒဳမဝ်ကရေဇြဳဂှ် NUCC စၟတ်သမ္တီ ထ္မံက်ထ္ၜးကၠုၚ် တၚ်ကဵုကသပ် ကေုာံ တၚ်ပ္တိုန်ဂလာန်တံဂှ်ရ။

ပ္ဍဲကဵုဏံ ပွမလလောၚ်ပ္တိတ်မူဝါဒ စပ်ကဵုဍုၚ်ကြုက်၊ ပွမလလောၚ်ပ္တိတ် တၚ်ဒတူလိုၚ်လစွံစိုတ်ပရေၚ်ဍုၚ်ကွာန်ပံၚ်တောဲ၊ ပ္ဍဲအရာရေၚ်တၠုၚ် ကိစ္စစပ်ကဵုမူဝါဒပရေၚ်ဍုၚ်ကွာန် ညံၚ်ရဴပရေၚ်ဒက်ပ္တန် FSCC တံဂှ် NUG ချပ်ဂၞန်သဳကၠဳ ကု NUCC မသ္ပစၞး ကောံဓရီုညးဍုၚ်ကွာန်တံ ဟွံမွဲပုဟ်ဂှ် သ္ဂးရ။

ကၠောန်ဗဒှ်ကၠုၚ်သာ်ဏံဂှ်ဝွံ ဝးပ္ကဝ်ကလိလောန်လဝ် တၚ်စၞောန်ပျး ပဋိညာန်ဖေဝ်ဒရာဒဳမဝ်ကရေဇြဳတုဲ ညံၚ်ဂွိုအ်ထပ်ကၠောန်သ္ပဒးဂှ် နူကောံဓရီုညးဍုၚ်ကွာန် ဖျေံစၟတ်လဝ် တၚ်ကဵုကသပ်ရ။

ညးမၞုံအခေါၚ်ဟီုဂး ကမ္မတဳကၠောန်ဗဒှ် ကောံဓရီုညးဍုၚ်ကွာန် ကိုမိုဃ်းသွေးဂှ် ပွမခုတ်ပ္တန်လၟေၚ်ကမၠောန်၊ ပရေၚ်သဳကၠဳပ္ညဳပ္ညပ် အရာမနွံပၟိက် အကြာ NUG ကဵု NUCC တံဂှ် ဆက်တုဲ ဒးကၠောန်အာဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အကြာ NUG ကဵု NUCC ပရေၚ်ပံၚ်တောဲရေၚ်တၠုၚ် ပရေၚ်ဆက်ဆောံတံ ဒြဟတ်ဂွံခိုဟ်ကၠုၚ်ဂှ် ကၠောန်ၜိုတ်အာဏောၚ် တၚ်ကဵုကသပ် ထ္မံက်ထ္ၜးလဝ်တံလေဝ် ပါမံၚ်ရ။ သ္အာၚ်နူဂှ်ပၠန် ပရေၚ်သဳကၠဳပ္ညဳပ္ညပ်၊ လၟေၚ်ကမၠောန်တံ၊ ပရေၚ်ခုတ်ပ္တန် အကြာ NUG ကဵု NUCC တံဂှ်လေဝ် ဆက်တုဲကၠောန်အာဏောၚ်။ ဟီုမ္ဂး ညအ်ဂှ် ပြသၞာပရေၚ်ဍုၚ်ကွာန်ပိုယ် ဟွံသေၚ်ပုဟ်။ ပ္တိတ်အာဇြဟတ် သွက်ဂွံကလေၚ်ပတပ်ကၠေံ အရာမဒ္စေၚ်ဗၠေၚ်မံၚ် စပ်ကဵုလၟေၚ်ကမၠောန်တံ မဒှ်ရ” သာ်ဝွံ သ္ဂးရ။

ပ္ဍဲကဵုတၚ်ကဵုကသပ် နူကဵုကောံဓရီုဂှ်ဂမၠိုၚ် ဗွဲမဗဗွဲကဵု ပရေၚ်တောတက် ပၠန်ဂတး မက္တဵုဒှ်ဒၟံၚ်ဂှ် ညံၚ်ပရေၚ်အာက္ဍိုပ် ပရေၚ်ဍုၚ်ကွာန် ဇြဟတ်ဂွံခိုဟ်ကၠုၚ် ကလေၚ်သ္ၚဳဂၠိပ် NUG ကေုာံ NUCC ဗွဲမဗဗွဲကဵု ပဋိညာန်ဖေဝ်ဒရာဒဳမဝ်ကရေဇြဳတုဲ သွက်ဂွံကလေၚ်ဒက်ပ္တန်ပလေဝ်ပလေတ်တံ ပါလုပ်ရ။

နကဵု NUG ဒ္ဂေတ်ဗက် အတိုၚ်တၚ်စၞောန် ပဋိညာန်ဖေဝ်ဒရာဒဳမဝ်ကရေဇြဳ ချိုတ်တ်ပၠိုတ်တ်တုဲ သွက်ဂွံရှ်ေသှ်ေဒ္ဂေတ်ဗက် သၟဝ်ပၠတရဴပရေၚ်ဍုၚ်ကွာန် NUCC ကေုာံ ပရေၚ်ထိၚ်ဒဝ်တံဂှ်ကီု၊ သွက်ဂွံချူဓဇက် မူဝါဒ စပ်ကဵုဂကူရိုဝ်ဟေန်ဂျာဂမၠိုၚ် ဂွံမံက်တိတ်ကၠုၚ် ဗွဲမပြဟ်တံ မဒှ်ရ။

သ္အာၚ်နူဂှ်ပၠန် ပရေၚ်ဂစိုတ်ကမၠက်ဂကူရိုဝ်ဟေန်ဂျာ ကေုာံ ညးဍုၚ်ကွာန်ကောန်ဍုၚ်အရၚ်တံ မပါလုပ် သွက်ပရေၚ်သ္ပမာန်ဍဵုဍိုက် အလဵုအသဳခေတ်အဆက်က် မကလိလောန်လဝ်တံသီုဖအိုတ်ဂှ် NUCC ကေုာံ NUG က္ဍိုက်ပ်တုဲ သွက်ဂွံအာတ်ဒုၚ်ဂုဏ် က္ဆံၚ်ကၟိန်ဍုၚ်ဂှ် ဖျေံစၟတ်လဝ်ရ။

နကဵု NUCC လေဝ် သွက်သ္ဂောံဂွံတၚ်တုပ်စိုတ်ပရေၚ်ဍုၚ်ကွာန်တံဂှ် တၞဟ်နသ္ဂောံစကၠောန်ၜိုတ်အာ ပရေၚ်သဳကၠဳဆဵုဂဗ ကုဂကောံဇြဟတ်ပၠန်ဂတးတံ ဗွဲမပြဟ်ဂှ်ကီု၊ ဂကောံဇြဟတ်ပၠန်ဂတး၊ ပရေၚ်ဍုၚ်ကွာန် ဟွံဂွံပါလုပ် ပ္ဍဲ NUCC တံဂှ်လေဝ် သွက်ဂွံဗက်သဳကၠဳအာဂှ်လေဝ် ကဵုလဝ်ကသပ်ရ။

မွဲလ္ပာ်ဂှ်ပၠန် ပရေၚ်ဒက်ပ္တန်ကၟိန်ဍုၚ်ပံၚ်ကောံဂှ် သွက်ဂွံသဳကၠဳ သောၚ်ၚ်ကၠးကၠးဂှ်ကီု၊ သွက်ဂွံဖျေံစၟတ် မူသ္ဇိုၚ် စပ်ကဵုသ္ဂောံဒက်ပ္တန်တွဵုရးဗၟာ မပါလုပ် တွဵုရးတၟိတၟိတံ ဂွံမံက်ဂတဝ်ကၠုၚ်ဂှ် နူကဵုကောံဓရီုညးဍုၚ်ကွာန်အလန်ဒုတိယ အခိၚ်ကာလပၠန်ဂတးက္ညၚ်ဏံ ဖျေံစၟတ်လဝ်ရ။

နူကဵုကံၚ်ဇြဳကဵုကသပ်ပရေၚ်ညဳသၟဟ်ဂကူ NUCC သ္ကိုပ်သ္ကတုဲ စနူဂိတုဨပရဴ ၄ သၞာံ ၂၀၂၄ တုဲ စဵုကဵုဂိတုဨပရဴ ၉ ပွိုၚ် ၆ တ္ၚဲဂှ် ကၠောန်ဗဒှ်လဝ် ကောံဓရီုညးဍုၚ်ကွာန် အလန်ဒုတိယ ကာလပၠန်ဂတးက္ညၚ်ဏံ ဗွဲမဗဗွဲကဵုတၚ်စၞောန်ပျး မပါလုပ် ပ္ဍဲပဋိညာန်ဖေဝ်ဒရာဒဳမဝ်ကရေဇြဳတံရ။

အခိၚ်ကၠောန်ဗဒှ်ဒၟံၚ်ကောံဓရီုညးဍုၚ်ကွာန်ဂှ် ဟိုတ်နူဂကောံဗော်သွးပါလုပ်ဂမၠိုၚ် လညာတ်ဟွံတုပ်သၟဟ်တုဲ ကမ္မတဳသ္ပစၞးကၠတ်ထဝ်ကၟိန်ဍုၚ် CRPH ကေုာံ အလဵုအသဳညဳသၟဟ်ဂကူ NUG တံ စနူကောံဓရီု မရနုက်ကဵု မသုန်တ္ၚဲဂှ်တုဲ ဟွံတိုန်စိုပ် ကောံဓရီုဟဂှ်ရ။

ဆ္ဂး ဂလာန်သဳကၠဳလဝ် ပ္ဍဲတ္ၚဲ CRPH တိုန်စိုပ်လဝ် မရနုက်ကဵုပန်တ္ၚဲတေံဂှ်ရ ကလေၚ်သဳကၠဳလဝ်တုဲ ကောံဓရီုညးဍုၚ်ကွာန်ဂှ် ဟွံဒးဒေါအ်ဒေၚ်အာတုဲ  CRPH ဂှ်လေဝ် ဗကပ်လဝ်ဗဗေၚ် ကုကောံဓရီုဂှ် ဟွံမွဲပုဟ်ဂှ် ကိုဝ်မိုဃ်းသွေး ဟီုရ။

“နုက်တိတ်နူ ကောံဓရီု ဟွံသေၚ်မ္ဂး ဗကပ်ဗဗေၚ် ကောံဓရီုဂှ် ဟွံမွဲပုဟ်။ တိုန်စိုပ်ကောံဓရီုဟွံပြေပြံၚ်တုဲ ဆက်တုဲဟွံတိုန်စိုပ် မဒှ်ရ။ ညအ်ဂှ် ဒှ်အရာပၟိက်ဇၞော်ဏောၚ်။ ဟိုတ်ဂှ်ရ ပရေၚ်ဇီုကပိုက်ဂှ်တှ်ေ ကောံဓရီုဏံတုဲ ပိုယ်တံ ဒးကလေၚ်သဳကၠဳညးသ္ကအ်ဏောၚ်။ တၚ်ဍိုန်လျ တၚ်ယောၚ်ယာ မက္တဵုဒှ်အာလဝ် စပ်ကဵုကောံဓရီုဏံတံဂှ် နူကဵုကမ္မတဳကၠောန်ဗဒှ်ကောံဓရီုဏံ ဒးကေတ်လျိုၚ် ဒးဒုၚ်လျိုၚ်ဏောၚ်” သာ်ဝွံ သ္ဂးရ။

အတိုၚ်လိက် CRPH ပလံၚ်ဗစိုပ်လဝ် ကမ္မတဳကၠောန်ဗဒှ်ကောံဓရီုညးဍုၚ်ကွာန် ပ္ဍဲဂိတုဨပရဴ ၈ တေံဂှ်မ္ဂး လောန်ၜက်နူ တၚ်စၞောန်ပျး ပဋိညာန်ဖေဝ်ဒရာဒဳမဝ်ကရေဇြဳ သ္ကုတ် ၂ ကေုာံ အစဳဇန် ဒစးဒုၚ်လလောၚ်တြးလဝ်တံဂှ်တုဲ ပ္ဍဲကောံဓရီုဂှ် ဟိုတ်နူပြဝ သဳကၠဳသ္ဂုတ်သွာတ် ကေတ်တၚ်သ္ပဒတန်တံ နွံကၠုၚ်ဂှ်ကီု ဟိုတ်နူတၚ် ၅ တၚ်တုဲ ဟွံတိုန်စိုပ်ကောံဓရီုရောၚ် ထ္မံက်ထ္ၜးလဝ်ရ။

ပ္ဍဲကောံဓရီုညးဍုၚ်ကွာန် အလန်ဒုတိယဂှ် သီုကဵု CRPH မပါလုပ် ညးစၞးကၠတ်ထဝ် ဒုၚ်ရုဲစှ်တံ၊ ညးစၞးဗော်ပရေၚ်ဍုၚ်ကွာန်တံ၊ ညးစၞးဂကောံဇြဟတ်ပၠန်ဂတးက္ညၚ်တံ၊ ညးစၞး EAO တံ၊ ကံၚ်ဇြဳဖေဝ်ဒရာ/တွဵုရး ယူနေတ် အခိၚ်ကာလအကြာတံ၊ ညးဘိက်လဝ်ဗွဲတၟေၚ်တံ ကေုာံ ညးလ္ၚတ် အပံၚ်ဖအိုတ် ၄၃၀ ပြၚ် တိုန်စိုပ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media