ကျာ်မြဟ်၊ ဨပရဴ ၁၁
ဒပ်ကံၚ်ဇြဳပၞာန် ထောံမခတိုဟ် နကဵုက္ၜၚ်ကျာ ပ္ဍဲကွာန်ဓမ္မသ ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်တုဲ ကောန်သ္ဂံၚ်ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ၜါတၠ ဒးပြဟ်လလုဲအာလဝ်ရောၚ် လ္ပာ်ဗော် လလောၚ်ပ္တိတ်လဝ်ပရိုၚ်ရ။
တုဲကၠုၚ် ပ္ဍဲဂိတုဨပရဴ ၈ တေံ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ဓမ္မသကဵု ဒပ်ပံၚ်ကောံမဟာမိတ် ဗော်ဍုၚ်မန်တၟိ AD တံ ပေါဲဗ္တိုက်ၜါလ္ပာ် သ္ကာတ်မြဟ်လဝ် မ္ၚးကွာန် နူတ္ၚဲစေၚ် ၂ နာဍဳ စဵုကဵု ဇိုၚ်သဝ်တ္ၚဲ ၆ နာဍဳရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန် ပန်ဗ္တိုက်လဝ် နကဵုဒပ်ဍာ်၊ ဒပ်ကျာတံ ဟွံပိုတ်သ္ကုတ်တုဲ ဗ္တံ ၜိုတ် ၉ နာဍဳဂှ် ဗ္တိုက်ဂြာတ်ဏာလဝ်မခတိုဟ် ပွဳဗွိုၚ်ကျာ် ဇိုၚ်ဒဵု ကွာန်ဓမ္မသ လျိုၚ် ၅၀၀ ပံၚ် ပိမရ။
ဟိုတ်နူဒးဒုၚ်ဗ္တိုက်ထောံမခတိုဟ်တုဲ နူဗော်ဍုၚ်မန်တၟိ AD ဒုဗိုလ်နာၚ်ဥူ ကေုာံ အကြာပ်ဒပ် ဝဏ္ဏတံ ၜါတၠ ပူဇဴဏာလမျီု သွက်ဍုၚ် သွက်ဂကူတုဲ ကောန်သ္ဂံၚ် ၄ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ပြဟ်ဟ်ဏံ ပွဳဗွိုၚ်ကွာန်ကြေဝ်ဏာဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံဇြဟတ်ပၠန်ဂတးတံ ပရေၚ်ပၞာန်ၜါလ္ပာ် ဆက်သ္ကာတ်မြဟ်ဒၟံၚ်ရောၚ် နာဲဗညာမန် ညးမၞုံအခေါၚ်ဟီုဂး NMSP AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ ၉ တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ လ္ပာ်(ကျွန်းကုန်း) ကွာန်ကြေဝ်ဏာ လွဟ်ဇၞော်စှ်ေတုဲ သ္ၚိဌာန်ကောန်ကလောန်ဆုဲပြံၚ် ၅၀ မပြၚ် ပၟတ်တူလီုလာ်အာလဝ်တုဲ လ္ပာ်ကွာန်ကအ်သက်ဂှ်လေဝ် သ္ၚိ ၆ မ လီုလာ်အာလဝ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၂၅ တေံ ကြဴနူသီဂွံ ဗ္ဒိုပ်ဗၠာဲသၟိၚ်ကံၚ်ဇြဳပၞာန် ကွာန်ကအ်ဗိန်တုဲ ပ္ဍဲဂိတုမာတ် ၂၇ ဂှ် နူဒပ်တိုက်၊ ဒပ်ဍာ်၊ ဒပ်ကျာ ကံၚ်ဇြဳပၞာန် ပန်နၚ် ကွာန်ဓမ္မသဂှ်တုဲ သ္ၚိဒၟံၚ် ၃၀၀ မပြၚ် ပၟတ်တူဆောံလေၚ်အာလဝ်တုဲ ကောန်အရာပ်လ္ၚဵု ဇီုကပိုက်ချိုတ်အာလဝ်လေဝ် နွံလဝ်ရ။
ကြဴနူဗ္ဒိုပ်ဗၠာဲသၟိၚ်ကအ်ဗိန် စှ်ေတုဲ အကြာကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးရပ်လွဟ်တံဂှ် ပေါဲဗ္တိုက်ဇၞော်ဇၞော် ဟွံမွဲကီုလေဝ် ဟိုတ်နူက္ၜၚ်ပၞာန် ကေုာံ ပၞာန်ကျာတံ ပန်ပှော်နၚ်တုဲ ညးဒေသဂၠိုၚ်ကဵုလ္ၚီ ဒးပါဲဒလေတ်ဒၟံၚ် ဒၞါဲဗၠးဘဲတံရ။
ပရိုၚ်−သြၚ်လောန်တိုၚ်(မ်)
ဗီု−NMSP