ကျာ်ထဝ်၊ မေ ၂
ဂိတုမေ စၟတ်တ္ၚဲ ၁ အခိၚ်နူဂယး ၜိုတ် ၇ နာဍဳဂှ် အာစိုပ်ဗ္တိုက်လဝ် သၞေဟ်ကၚ်စၟဳတ်ကံၚ်ဇြဳပၞာန် မၞုံပ္ဍဲဂၠံၚ်ဒဒန်သက်တိုၚ် ကွာန်မုခ်ပြေၚ် ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
သၞေဟ်ကၚ်စၟဳတ်မုခ်ပြေၚ် ဇြဟတ်ဒပ် ၜိုတ် ၃၀ ပြၚ် ဖျေံလဝ်ဒပ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဗ္တိုက်လဝ် သီုလွဟ်ဇၞော် သီုကဵုဒရုၚ်ရ။
အပ္ဍဲပရေၚ်ဗ္တိုက်ဏံ ဒရုၚ်ဗမ် ကေုာံ မကမ်လွဟ်ဇၞော်ဂမၠိုၚ်ဝွံ ဒတုံဗ္တိုဟ်ထ္ကးအာလဝ် အပ္ဍဲသၞေဟ်ကၚ်စၟဳတ်ဂှ်ကဵု ဒၞါဲဗ္ဒမ်ဍုန်တိုပ်ပုၚ်သွတံရ။
ကြဴနူဒးဒုၚ်ဗ္တိုက်တုဲဂှ် လ္ပာ်ကံၚ်ဇြဳပၞာန် ကော်ပ္တိတ်ဏာလဝ် နကဵုယာန်ဖ္ဍိုက်မၞိဟ်ယဲ သီုကဵုဟောန်ဒါဝှေတ်မွဲဖ္ဍိုက်ဂှ် ဂွံဆဵုကေတ်တုဲ ဇီုကပိုက်ချိုတ်အာ သောဲသောဲဗြောဲဗြောဲ ဂွံတီကေတ်မာန် ဂၠိုက်ဂၠါဲဒၟံၚ်ဖိုဟ်ရောၚ် ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုရ။
သၞေဟ်ကၚ်စၟဳတ် ဒးဒုၚ်ဗ္တိုက်ကဵုလွဟ်ဇၞော်၊ ဒရုၚ်ဗုမ်တုဲ လ္ပာ်ကံၚ်ဇြဳပၞာန်လေဝ် ကလေၚ်ပန်ပှော်လဝ် နကဵုလွဟ်ဇၞော်၊ လွဟ်ဍောတ်တံတုဲ ကွဳစက်အာတရဴဂမၠိုၚ် ဟွံဂံၚ်တတ်ကၠောံအာကၠုၚ်မွဲသာ် ဒးဒေါအ်မၚ်ဒၟံၚ်အိုတ်ရ။
ပရေၚ်ပန်ပှော်ၜါလ္ပာ်ဝွံ လအ်အာ ပွိုၚ်မွဲနာဍဳပြၚ်ဂှ်ရ အခိၚ်နူဂယး ၜိုတ် ၉ နာဍဳဂှ်မှ ကွဳစက်အာတရဴတံ ကလေၚ်တတ်ကၠောံအာကၠုၚ်ဒၟံၚ် အတိုၚ်တြေံအိုတ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုဨပရဴ ၂၃ တေံဂှ်လေဝ် သၞေဟ်ကၚ်စၟဳတ်ကံၚ်ဇြဳပၞာန် မၞုံဒဒန်သက်တိုၚ်တၟိ ဒးဒုၚ်ဗ္တိုက်ထောံဖျေံဒရုၚ်ဗုမ် ၁၀ မတုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၃ တၠ ဇီုကပိုက်ကလိဂွံလဝ်ဝပ်ဏီရ။
အပ္ဍဲဂိတုဨပရဴတုဲကၠုၚ်တေံ လ္ပာ်ဂကောံပၠန်ဂတးတံ ထောံလဝ်မခတိုဟ်နကဵုဒရုၚ်၊ ပန်ပှော်လဝ် နကဵုလွဟ်ဇၞော် ကုသၞေဟ်ကၚ်စၟဳတ်မုခ်ပြေၚ်ဂှ် စဵုကဵု ၃ ဝါရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KRF