မတ်မလီု၊ မေ ၁
အပ္ဍဲဍုၚ်ကွာန် ၜိုဟ်သြိုဟ်ညိၚ်ဝတ်ဒၟံၚ်တံဂှ် ညံၚ်ဂကောံပၠန်ဂတးတံ လုပ်စိုပ်ဟွံဂွံ နကဵုလညာတ်ဂီုကၠီု၊ သတိဂီုကၠီု နွံနွံ သွက်ဂွံပံၚ်တောဲကဵု ဒပ်ပၞာန် ပ္ဍဲကမၠောန်ဒစးဒုၚ်စဵုဒၞါတံဂှ် ဒုက္ဍိုပ်သ္ကိုပ်ပၞာန် ဟီုကၠုၚ်ရ။
ဒုက္ဍိုပ်သ္ကိုပ်ပၞာန် ဒုသ္ကိုပ်ဗိုလ်ဇၞော် သဵုဝေန် ကၠေံဒၟံၚ်နူမတ်မၞိဟ် ၜိုတ်မွဲဂိတုတုဲ ပရိုၚ်တိတ်ဒၟံၚ်နာနာသာ်ဂှ်ဝွံ ပ္ဍဲဂိတုဨပရဴ ၂၉ တေံ မံက်တိတ်ကၠုၚ် ပ္ဍဲရုပ်ရမျာၚ် တြးဝါဒဒပ်ပၞာန်ရ။
အတိုၚ် ပရိုၚ်ရုပ်ရမျာၚ် တြးဝါဒ ဒပ်ပၞာန်တံ ထ္မံက်ထ္ၜးလဝ်ဂှ်မ္ဂး ဒုက္ဍိုပ်သ္ကိုပ်ပၞာန်ဝွံ ဆဵုဂဗကဵု သ္ကိုပ်ဝန်ဇၞော် တွဵုရးဍုၚ်မန်ကဵု တွဵုရးကရေၚ်တံ ကေုာံ ညးတာလျိုၚ် ဌာနမဆေၚ်စပ်တံ ပ္ဍဲဍုၚ်မတ်မလီုတုဲ ဟီုဗ္ကန်လဝ် ကမၠောန်စဵုဒၞါ အရာနွံပၟိက်တံရ။
စပ်ကဵုလၟေၚ်ဒဒှ် ပရေၚ်ဗ္တိုက် မက္တဵုဒှ်ဒၟံၚ်လၟုဟ်ဂှ်တုဲ အလဵုအသဳ၊ ဒပ်ပၞာန် ကေုာံ ညးဍုၚ်ကွာန် သီုပိ ဒးပံၚ်တောဲအာဏောၚ်တုဲ ညးဍုၚ်ကွာန်ဒေသတံ ပံၚ်တောဲပါလုပ်မှဟေၚ် အံၚ်ဇၞးဏောၚ်ဂှ် သ္ဂးရ။
ဟိုတ်ဂှ်ရ နကဵုညးတာလျိုၚ်ဂမၠိုၚ် သွက်ဒေသဂွံၜိုဟ်သြိုဟ်ညိၚ်ဝတ် ညံၚ်ညးဍုၚ်ကွာန်ဒေသတံ ဂွံကၠိုဟ်တီညာတ်အာ သွက်ဂွံသောၚ်ကလးသဳကၠဳ စန်ဒက်ဂှ် ဒုက္ဍိုပ်သ္ကိုပ်ပၞာန် ဟီုလဝ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ် စပ်ကဵုကမၠောန်ကာစဵုဒၞါတံဂှ်တုဲ ဂလာန်ဒုက္ဍိုပ်သ္ကိုပ်ပၞာန်ဂှ်ဝွံ သွက်ဂွံဘပဠ ညးဍုၚ်ကွာန်တံဍာံဍာံဇေတ်တ်ဂှ် ကဵုလဝ်အသံရာဇာဗွဲကြဴအိုတ်ဏောၚ် ညးဟီုလဴထ္ၜးလဝ် လညာတ်ညးရ။
“စပ်ကဵုစန်ဒက် ညးဍုၚ်ကွာန် သွက်ဂွံပံၚ်တောဲကဵု ကံၚ်ဇြဳပၞာန်ဂှ် လညာတ်အဲတှ်ေ ကံၚ်ဇြဳပၞာန်ဝွံ ဓဝ်ပတှ်ေလ္တူညးဍုၚ်ကွာန်တံ ဟွံမွဲဒၟံၚ်တုဲ ဒှ်ဒၟံၚ်ဍာ် ဖေက်ဇတဝ် ဂွိၚ်ဂွါဲဒၟံၚ်အိုတ်အစောန်ရဏောၚ်။ ဟိုတ်နူဏံတုဲလေဝ် စကာအရေဝ် စန်ဒက် ညးဍုၚ်ကွာန်တံဂှ်တုဲ သွက်ဂွံဘပဠ ညးဍုၚ်ကွာန်တံဂှ် ကဵုထောံအသံရာဇာလက္ကရဴအိုတ် ကဵုထောံ Signal ရောၚ်ဂှ် အဲညာတ်ရ” သာ်ဝွံ သ္ဂးရ။
ပွိုၚ်ဍုၚ်ကအ်ကြိက် တွဵုရးကရေၚ် ဂကောံဒပ်ပံၚ်ကောံပၠန်ဂတးတံ သီဂွံလဝ်တံဂှ်ကဵု ဒေသၜဳဂြာၚ် ပယျဵုမန်−ကရေၚ် ကွာန်ကအ်ဗိန်၊ ကွာန်ကအ်ပံက်၊ ကွာန်ဓမ္မသတံဏံဂှ် ဒပ်ကံၚ်ဇြဳပၞာန် ကလေၚ်ထိၚ်ဂွံလဝ်တုဲ ညးထောံလသာသ္ၚိဌာန်လ္ၚဵုတံလေဝ် ကလေၚ်လုပ်စိုပ်မံၚ်ဒၟံၚ်အိုတ်ရ။
ဒုသ္ကိုပ်ဗိုလ်ဇၞော် သ္ကိုပ်က္ဍိုက်ပ်ပၞာန်ကာစဵုဒၞါ(ပၞာန်တိုက်) သဵုဝေန်ဂှ် ဆဵုဂဗကဵု သ္ကိုပ်ဒပ်၊ သ္ကိုပ်ဍုၚ်ဒပ် ကေုာံ ညးတာလျိုၚ်ဂမၠိုၚ် ပ္ဍဲၝောံခန်ကောံဓရီု ဌာန်ဂအုပ်ပၞာန်ရးအဂၞဲဂှ်တုဲ သဳကၠဳပ္ညဳပ္ညပ် ဗ္ကန်ဖျန်လဝ် စပ်ကဵုပရေၚ်ဂီုကၠီု၊ ပရေၚ်အုပ်ဓလီုတိဍာ် ကေုာံ ပရေၚ်ပြုပြေၚ်ပၞာန်တံရ။
မွဲလ္ပာ်ဂှ်ပၠန် ဒေသကရေၚ် ကေုာံ မန်ဝွံ ဒှ်ဒေသပယျဵုတုဲ ပၞော်သွံရာန်ဗၞိက်ပယျဵု ပၟိက်ဇၞော်တံ နွံတဴဂှ်ရ ပရေၚ်ဆက်ဆောံၜါဍုၚ် ညံၚ်ဂွံခိုဟ် သွက်ဂွံရေၚ်တၠုၚ်အာဂှ်ကဵု သွက်ကဏ္ဍသွံရာန်ဗၞိက်ပယျဵု ဂွံတောတက်တုဲ အကာဲအရာ မ္ဒးရေၚ်တၠုၚ်ပ္တိတ်အာဇြဟတ်တံဂှ်လေဝ် ဟီုလဝ်ရ။
သ္ကိုပ်ဝန်ဇၞော်တွဵုရးဍုၚ်မန်ကဵု တွဵုရးကရေၚ်တံ ကေုာံ ညးတာလျိုၚ် ဌာနမဆေၚ်စပ်တံဂှ်တှ်ေ တၚ်နၚ်စပ်ကဵုဒေသ အပ္ဍဲတွဵုရးဂမၠိုၚ်၊ ကိစ္စစပ်ကဵုပရေၚ်ဂီုကၠီု ကေုာံ ပရေၚ်ညိၚ်ဝတ် ဒေသပယျဵုတံ၊ ကိစ္စပံက်စွံအာ ဗ္ဒိုပ်ပါဲဒဴဘဲပၞာန်ယာယဳတံဂှ်လေဝ် ပ္တိုန်ထ္ၜးလဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI