ဍာ်ဗု၊ မေ ၂၃
ဂိတုမေ ၂၂ အခိၚ်နူဂယး ၜိုတ် ၅ နာဍဳဂှ် လုပ်စိုပ်ဗ္တိုက်လဝ် သၞေဟ်ကၚ်စၟဳတ်လုပ်ဍုၚ်ကဵု ဗ္ဒိုပ်ဗၠာဲသၟိၚ်ၝောံဍုၚ် ကလိန်အံၚ် ပွိုၚ်ဍုၚ်ဍာ်ဗု မွဲအခိၚ်ဓဝ်ရောၚ် ဂွံတီကေတ် နူဒပ်ပံၚ်ကောံ စဵုဒၞါညးဍုၚ်ကွာန်တံရ။
လ္ပာ်ဒပ်ပံၚ်ကောံ PDF တံ လုပ်စိုပ်ဗ္တိုက်လဝ် သၞေဟ်ကၚ်စၟဳတ်လုပ်ဍုၚ်ကဵု ဗ္ဒိုပ်ဗၠာဲသၟိၚ် သီုဒပ်ကံၚ်ဇြဳပၞာန် သီုဗၠာဲသၟိၚ်တံ မဖျေံလဝ်ဒပ်ဂှ် မွဲအခိၚ်ဓဝ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် စဵုကဵုလလအ်ပွိုၚ် ၂၀ မိနေတ်ရ။
ပ္ဍဲပရေၚ်ဗ္တိုက်ဏံဂှ် ဂွံလဝ်ကၠာတဲဂှ်ရ ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ် ဟွံအောန်နူကဵု ၃ တၠ ဇီုကပိုက်ချိုတ်အာလဝ်တုဲ လ္ပာ် PDF တံ ဇီုကပိုက်ကလိဂွံဝပ် ဟွံမွဲပုဟ်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူပရေၚ်ပန်ပှော် ၜါလ္ပာ်တုဲဂှ် ဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ်လွဟ်ဇၞော် ဟွံပိုတ်သ္ကုတ်ဂှ်ရ ဒတုံဗ္တိုဟ်ထ္ကးအာလဝ် ဗ္ဒါဲအရာပ်လ္တူဍုၚ်တံ နွံဒၟံၚ်ကီုလေဝ် ညးဍုၚ်ကွာန်ကောန်အရာပ်တံ ဇီုကပိုက်ကလိဂွံဝပ် ဟွံမွဲပုဟ်ဂှ် ဂွံတီကေတ် ဇရေၚ်ညးဒေသတံရ။
ဗ္ဒိုပ်ဗၠာဲသၟိၚ် ကေုာံ သၞေဟ်ကၚ်စၟဳတ်လုပ်ဍုၚ် ဒးဒုၚ်ဗ္တိုက်တုဲ ဒပ်ကံၚ်ဇြဳပၞာန်ဝွံ ကၟာတ်ထောံ အခေါၚ်တတ်ကၠောံ သၞေဟ်ကၚ်လုပ်ဍုၚ်တုဲ ၜိုတ်အခိၚ်လဒေါဝ်တ္ၚဲဂှ် ကလေၚ်ပံက်ကဵုလဝ်ရောၚ် သ္ဂးရ။
ဟိုတ်နူပရေၚ်ပန်ပှော် ပ္ဍဲကလိန်အံၚ်တုဲ ညးဍုၚ်ကွာန်ဒေသဂမၠိုၚ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်တုဲ ဗွဲမဂၠိုၚ်ဝွံ အောပ်မာမံၚ်တန်တဴဒၟံၚ် အပ္ဍဲသ္ၚိသၟးရဂှ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ် ပ္ဍဲဂိတုမေ ၇ တေံဂှ်လေဝ် ဗ္ဒါဲသုသာန်ကွာန်ဇြေန်ဗာ ဍုၚ်ကလိန်အံၚ်ဂှ် ကောန်ဒပ်ကံၚ်ဇြဳပၞာန် နူတမ်ဒပ် ခမရ ၄၁၀ ဒးဒုၚ်ကြတ်ဗ္တိုက်လဝ်တုဲ ၂ တၠ ချိုတ်တုဲ ၂ တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ