ဝိုၚ်မဝ်၊ မေ ၂၃
အပ္ဍဲပရေၚ်ပၞာန် တွဵုရးကချေၚ်ဂှ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲ ၁၀၀ သီဂွံလဝ်ရောၚ် ညးဒုၚ်တာလျိုၚ် ဒပ်ပၞာန်ဗၠးၜးကချေၚ် KIA သ္ကိုပ်ဗိုလ်ဇၞော် နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲသ္ကုတ်သၟဝ်ကျာကၟိန်ဍုၚ် အလုံမွဲ KIA ဒှ်ဒပ်ပၠတရဴပၠန်ဂတးဂှ်ဝွံ ပပ္တံနူဂိတုမာတ် ၇ တုဲ မွဲဟာန်ကေုာံ ဒပ်ပံၚ်ကောံတံဂှ် ထ္ပက်ပၞာန်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲဍုၚ်လိုၚ်ဇြာကဵု မၞုံမွဲဒမြိပ်ဂၠံၚ်ကွဳစက် မျေတ်ကျဳနာ−ဗာန်မဝ်ရ။
အပ္ဍဲပရေၚ်ပၞာန်ဂှ်ဂှ် အပ္ဍဲပွိုၚ်ၜါဂိတု ဒပ်ပံၚ်ကောံ KIA တံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် မၞုံမွဲဒမြိပ်ဂၠံၚ်ကွဳစက် မျေတ်ကျဳနာ−ဗာန်မဝ်−လောဲဂျေဝ်တံ စဵုကဵုဗ္ဒါဲ ၁၀၀ ရ။
အခိၚ်လၟုဟ်ဂှ်လေဝ် အပ္ဍဲပွိုၚ်ဍုၚ်ဝိုၚ်မဝ်၊ မာန်သဳ ကေုာံ ပွိုၚ်ဍုၚ်မိုဝ်မံက်တံဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KIA တံ ဒှ်တိဍာ်ပေါဲဗ္တိုက်သ္ကာတ်မြဟ်ဒၟံၚ်တုဲ ဗ္ဒိုပ်ဒပ်မၞုံမွဲဒမြိပ်ဂၠံၚ်ကွဳစက် ဝိုၚ်မဝ် ကဵု လိုၚ်ဇြာတံသီုဖအိုတ်ဂှ် သီဂွံလဝ်ယျ သ္ကိုပ်ဗိုလ်ဇၞော် နဝ်ဘူ ဟီုရ။
“လ္ပာ်တွဵုရးကချေၚ်ဂှ်တှ်ေ ပြဟ်ဟ်ဏံ ပ္ဍဲပွိုၚ်ဍုၚ်ဝိုၚ်မဝ်၊ ပွိုၚ်ဍုၚ်မာန်သဳ ကေုာံ ပွိုၚ်ဍုၚ်မိုဝ်မံက်တံဂှ် ဒှ်တိဍာ်ပေါဲဗ္တိုက်သ္ကာတ်မြဟ်ဒၟံၚ်တံရ။ လ္ပာ်ပွိုၚ်ဍုၚ်ဝိုၚ်မဝ်ဂှ် ဗ္ဒိုပ်ဒပ်စကစ နွံမွဲဒမြိပ်ဂၠံၚ်ကွဳစက် ဝိုၚ်မဝ်ကဵု လာၚ်ဇြာတံသီုဖအိုတ်ဂှ် သီဂွံလဝ်ယျ။ နူဏေံတေံလေဝ် အခိၚ်ဗ္တံ ၈ နာဍဳဂှ် သီဂွံလဝ် ဗ္ဒိုပ်ယှိုဲညံၚ်ပေန် ခလရ ၃၂၁ မာန်ယျ။ တ္ၚဲဏံဂှ် ဒှ်အကာဲအရာ ၚးတးဒၟံၚ်တိဍာ်တံဏောၚ်” ဟီုရ။
ဒပ်ပံၚ်ကောံ ကေုာံ KIA တံဝွံ နူဂိတုမေ ၁၈ ဂှ် ထ္ပက်ပၞာန်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဖျေံလဝ်သ္ဇိုၚ် အပ္ဍဲကွာန် မၞုံပွိုၚ်ဍုၚ်ဝိုၚ်မဝ်တံဂှ်တုဲ ဗ္ဒိုပ်ဒပ်ခလရ ၃၂၁ နူကွာန်ယှိုဲညံၚ်ပေန်ဂှ် သီဂွံလဝ် အပ္ဍဲပွိုၚ်ပန်တ္ၚဲရ။
ပ္ဍဲပွိုၚ်ဍုၚ်ဝိုၚ်မဝ်ဂှ် တမ်ဒပ်ကံၚ်ဇြဳပၞာန် ခလရ ၅၈ ကဵု ဗ္ဒိုပ်ပျဳတုသေတ် လဳသူ နူကွာန်ဝူယာန် သှ်ေဒၟံၚ်ၜါဏီဂှ်ရ ပေါဲဗ္တိုက်ဝွံ ကြပ်ကၠုၚ်ကဵု လ္တူဍုၚ်တုဲ သၞာဲဒဴနူဌာနမဆေၚ်စပ်တံလေဝ် ပြံၚ်ဆုဲကၠုၚ်ဒၞါဲ သီုကဵုစိုက်ဂွဳအိုတ်ရ။
နကဵုဒပ်ပၞာန်ဗၠးၜးကချေၚ် KIA ယဝ်ရဆက်သီကေတ် ဗ္ဒိုပ်ဒပ်သှ်ေဒၟံၚ် ပ္ဍဲဝိုၚ်မဝ်တံဂှ်မာန်မ္ဂး အလုံပွိုၚ်ဍုၚ်မွဲဂှ် ထိၚ်ဒက်ကၠုၚ်မာန်ဏောၚ်တုဲ ကဵုဌာန်ဂအုပ်ပၞာန်ရးသၟဝ်ကျာဂှ်လေဝ် ခြာဒၟံၚ် ၁၂ မိုၚ်ပြၚ်ၚ်ဓဝ်ရ။
လ္ပာ်ကံၚ်ဇြဳပၞာန်ဂှ် အပ္ဍဲပေါဲဗ္တိုက် တွဵုရးကချေၚ်ဂှ် သုၚ်စောဲဒၟံၚ်လွဟ်ဇၞော်တံကဵု အရီုဗၚ်ပၞာန်ကျာတံ အဓိကရောၚ် သ္ကိုပ်ဗိုလ်ဇၞော်နဝ်ဘူ လဴထ္ၜးရ။
“လွဟ်ဇၞော်ဂှ်တှ်ေ စကစ သုၚ်စောဲဒၟံၚ်အဓိကရ။ တုဲပၠန် သုၚ်စောဲဒၟံၚ်က္ၜၚ်ကျာ။ ဇၟာပ်ပေါဲဗ္တိုက် စွံအဓိကကဵု ညအ်ၜါတုဲ ရပ်စပ်ဒၟံၚ်ရ။ လၟုဟ်တှ်ေ ပေါဲဗ္တိုက်ဗလးတိတံဂှ် (ဇြဟတ်ဗ္တိုက် စကစ) ဟွံမွဲ ဒှ်ဒၟံၚ်ရ။ ဍေံတံဂှ် ပန်ပှော်ဒၟံၚ်လွဟ်ဇၞော်ကဵု ပန်ပှော်ကဵုတရဴကျာတံ အဓိက ဒှ်ဒၟံၚ်” သာ်ဝွံ သ္ဂးရ။
ဒပ်ပၞာန်ဗၠးၜးကချေၚ် KIA ဝွံ နူသၞာံဏံမံက် စဵုကဵုဂိတုမေ သတ္တာဟပထမဂှ် သီဂွံလဝ် တွဵုရးကချေၚ် သောန်ပရာဗောန်၊ အေန်ဂျာန်ယာန်၊ (မြို့သစ်) ၊ ဇြေန်ဗိုဝ်၊ လောဲဂျေဝ်၊ ဒအ်ဖုၚ်ယာန်၊ (မြို့လှ) ကေုာံ (မဘိမ်းမြို့) နူရးသေံသ္ကုတ်သၟဝ်ကျာတံရ။
ပရိုၚ်−သြၚ်လောန်တိုၚ်(မ်)
ဗီု−Getty