ၜဳကလေၚ်၊ မေ ၂၄
ရဲကဵုပရိုၚ် ဒပ်ဗၠာဲသၟိၚ်ဗ္တိုက်သရိုဟ်ဒုစရိုတ် ဥူတိတ်လွေန်ဥူ ဒၟံၚ်ကွာန် (ဇုတ်သုတ်) ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ပန်ပသောၚ်ထောံလဝ်ရောၚ် ဂကောံဇြဟတ်ပၠန်ဂတးကျာ်ထဝ် KRF လလောၚ်ပ္တိတ်လဝ်ရ။
ဥူတိတ်လွေန်ဥူ အာယုက် ၄၆ သၞာံ ညးကဵုပရိုၚ် ဒးဒုၚ်ပ္တိတ်လဝ်နူကဵု ဗ္ဒိုပ်ဗၠာဲသၟိၚ်ဂှ် ဂိတုမေ ၂၃ အခိၚ်နူဂယး ၜိုတ် ၉ နာဍဳဂှ် ဂကောံဇြဟတ်ပၠန်ဂတးကျာ်ထဝ် KRF ကဵု ဒပ်ပံၚ်ကောံ ပကဖ ကျာ်ထဝ်တံ ပန်ပသောၚ်လဝ် ဗ္ဒါဲဘာဗ္တောန်လိက်ကွာန်ဂှ်ရ။
ဟိုတ်နူဒးဒုၚ်ပန်လဝ်ကဵုသေနာတ် ကြပ်ပ်ဂှ်ရ ဥူတိတ်လွေန်ဥူဝွံ ဒးအာမကမ် ဂွံအာဝပ် ပ္ဍဲက္ဍိုပ် ကေုာံ လ္ပာ်စးတုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
အခိၚ်ပန်ပသောၚ် ဥူတိတ်လွေန်ဥူဂှ် သီဂွံလဝ် ဗုမ်တဲ ၂ မ၊ သြန် ၁၅၀၀ ဒ္ကေဝ်ကဵု ထိုၚ်မွဲမရောၚ် ဂွံတီကေတ် အတိုၚ်တၚ်လလောၚ်တြး KRF ရ။
အတိုၚ်ဂလာန်ညးဒေသတံဂှ်မ္ဂး ဥူတိတ်လွေန်ဥူ မရေၚ်တၠုၚ်ဒၟံၚ် နဒဒှ်ရဲကဵုပရိုၚ်ဗၠာဲသၟိၚ်ဂှ်ဝွံ ဒှ်ကောန်ကမ္မတဳ ဗော်ကျဖောအ် ပွိုၚ်ဍုၚ်ၜဳကလေၚ် ကဆံၚ်ပွိုၚ်ဍုၚ် မွဲတၠရောၚ်ဂှ်လေဝ် ဂွံတီကေတ်ရ။
ကြဴနူဥူတိတ်လွေန်ဥူ ညးကဵုပရိုၚ် ချိုတ်အာတုဲဂှ် ဒပ်ကံၚ်ဇြဳပၞာန် ကၠုၚ်စိုပ်စၟဳတ်လဝ်တုဲ ပလံၚ်ဗစိုပ်လဝ်ဇွ ဇရေၚ်ရုၚ်ဂဥုဲညးဍုၚ်ကွာန်ၜဳကလေၚ်ရ။
ပ္ဍဲတွဵုရးဍုၚ်မန် အပ္ဍဲသၞာံဏံ သ္ကိုပ်အုပ်ဓုပ်၊ က္ဍိုပ်သ္ၚိကၠံ ကံၚ်ဇြဳပၞာန်ခါန်ကၞက်လဝ်တံ မပါလုပ် သီုညးကဵုပရိုၚ်တံဂှ် ဟွံအောန်နူကဵု ၂၀ တၠ ဒးဒုၚ်ပန်ပသောၚ်လဝ်တုဲ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KRF