ဘာပန်၊ မေ ၂၄
အပ္ဍဲပရေၚ်ပြုပြေၚ်ပၞာန် သ္ဂောံဆက်ဗ္တိုက်သရိုဟ်ကုန်ဗျူဟာကံၚ်ဇြဳပၞာန် သှ်ေဒၟံၚ်ဗ္ဒါဲဍုၚ်ဘာပန် တွဵုရးကရေၚ်ဂှ် ကောန်သ္ဂံၚ် PDF ၜါတၠ ပြဟ်လလုဲအာလဝ်ရောၚ် ကရောၚ်ပၞာန် (တော်ဝင်ဒေါင်း) ဒေသပၞာန်သ္ကုတ်သၠုၚ်ကျာ ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ပရိုၚ်ရ။
ပပ္တံနူဂိတုဨပရဴတုဲကၠုၚ်တေံတုဲ ဒပ်ပၠန်ဂတး ထိၚ်ဂွံလဝ် ဍုၚ်ဘာပန်ယျကီုလေဝ် ကုန်ဗျူဟာ ကံၚ်ဇြဳပၞာန် သှ်ေဒၟံၚ်တံဂှ် ဆက်ဗ္တိုက်သရိုဟ်ဒၟံၚ်ဖိုဟ်ရောၚ် သာ်ဝွံ ပါလုပ် ပ္ဍဲတၚ်လလောၚ်တြးဂှ်ရ။
အပ္ဍဲပရေၚ်ပြုပြေၚ်ပၞာန်ဏံ လ္ပာ်ကံၚ်ဇြဳပၞာန် ဇီုကပိုက်ချိုတ်တံ ဂၠိုၚ်ဒၟံၚ်တုဲ လ္ပာ်ကရောၚ်ပၞာန် (တော်ဝင်ဒေါင်း) ဂှ်လေဝ် ကောန်သ္ဂံၚ် ၂ တၠ ပြဟ်လလုဲအာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်ပ္တိတ်ဂှ်ရ။
ပရေၚ်ပြုပြေၚ်ပၞာန်ဍုၚ်ဘာပန်ဂှ် တမ်ဒပ် ဒပ်ပၞာန်စဵုဒၞါညးဍုၚ်ကွာန်တံ၊ ဒပ်မဟာမိတ်တံ ပံၚ်ကောံတုဲ ထ္မံက်လဝ်ပရေၚ်ပၞာန်ဂှ်တုဲ တမ်ဒပ် KNLA ၊ တမ်ဒပ် PDF တံကဵု ဒပ်ပံၚ်ကောံတံဝွံ ထ္မံက်လဝ်တၚ်ရန်တၟံ ပရေၚ်ပၞာန်ဂှ် ဗွဲမအံၚ်ဇၞးတုဲ ထိၚ်ဂွံလဝ်ဍုၚ်ဂှ်ရောၚ် လလောၚ်ပ္တိတ်လဝ်ရ။
ကုန်ဗျူဟာ ဒပ်ကံၚ်ဇြဳပၞာန် မၞုံဗ္ဒါဲဍုၚ်ဘာပန်ကဵု ဂၠံၚ်ဒၞါဲလုပ်တိတ် ဌာန်ဂအုပ်တမ်ဒပ်တံ သီုဖအိုတ်ဂှ် နူဒပ်ပံၚ်ကောံပၠန်ဂတး သၟဝ်ပၠတရဴ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ စနူဂိတုမာတ်တုဲကၠုၚ်တေံတုဲ ကၟာတ်လဒဵုကြတ်ဗ္တိုက်လဝ်တံ ကၠောန်သ္ပလဝ်တုဲ သီဂွံလဝ် တမ်ဒပ်ကံၚ်ဇြဳပၞာန် ခလရ ၁၉၊ ခမရ ၄၃၄၊ စစန ၆၄၂ တံရ။
အခိၚ်လၟုဟ် ကုန်ဗျူဟာ ဒပ်ကံၚ်ဇြဳပၞာန် သှ်ေဒၟံၚ်တံကဵု တမ်ဒပ် ခမရ ၃၄၀ ခမရ ၃၄၁ တံဂှ် ဆက်ဗ္တိုက်ဒၟံၚ်ဖိုဟ်တုဲ ဒၞါဲလ္ၚဵုတံဂှ် ဒပ်ပံၚ်ကောံ KNLA တံ သီဂွံလဝ်တုဲ လ္ပာ်ဒပ်ကံၚ်ဇြဳပၞာန် ကၠုၚ်စိုပ်ဘိုၚ်ပန်ဏာကဵုလဝ် နူက္ၜၚ်ကျာ အရိုဟ်ဟ်တ္ၚဲရောၚ် ဂွံတီကေတ်ရ။
သ္အာၚ်နူဂှ်ပၠန် ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် ဗ္ဒါဲပယျဵု တိဍာ်ဒပ်မဟာ ၅ ခရိုၚ်ဘာပန်ဂှ် ဟိုတ်နူဒပ်ပံၚ်ကောံ KNLA တံ ကၟာတ်လဒဵုကြတ်ဗ္တိုက်လဝ်တုဲ အပ္ဍဲဂိတုဏံ ဒပ်ကံၚ်ဇြဳပၞာန်တံဝွံ ဂြိပ်ဒဴနူဗ္ဒိုပ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန် (တော်ဝင်ဒေါင်း)