သဓီု၊ မေ ၂၅
ဒပ်ကံၚ်ဇြဳပၞာန် ထံၚ်ဒၟံၚ်ပရိုၚ်ကဵုက္ၜၚ်ကျာ ပ္ဍဲခရိုၚ်သဓီု တိဍာ်အုပ်ဓုပ် ဒပ်မဟာ ၁ ဗော်သွးကောန်ဂကူကရေၚ် KNU အရိုဟ်တ္ၚဲဂှ် ဂွံတီကေတ် အတိုၚ်ဂလာန် ညးတာလျိုၚ် ခရိုၚ်သဓီု KNU ရ။
ပ္ဍဲခရိုၚ်သဓီု KNU ပရေၚ်ပၞာန်ၜါလ္ပာ် ကလေၚ်ကြံၚ်မ္ၚိုဟ်ဒၟံၚ်ဂှ် စနူဂိတုမေ ၂၁ တုဲ နူဒပ်ကံၚ်ဇြဳပၞာန် ထံၚ်ဒၟံၚ်ပရိုၚ် နကဵုက္ၜၚ်ကျာဗ္တိုက်၊ က္ၜၚ်ကျာသၞေၚ်ဝဲတံ မပါလုပ် သီုကဵုက္ၜၚ်ကျာထံၚ်ပရိုၚ်တံ အဆက်က်ရ။
လ္ပာ်ကံၚ်ဇြဳပၞာန် ထံၚ်ကၠုၚ်ဒၟံၚ်ပရိုၚ် နူကဵုက္ၜၚ်ကျာ အရိုဟ်တ္ၚဲအဆက်က်တုဲ ထောံကၠုၚ်မခတိုဟ်မာန်ဂှ်ရ နကဵုညးဍုၚ်ကွာန်တံ သွက်ဂွံၜံက်ခါဲလဝ် ကတိုၚ်ပါဲဗုမ်တံအိုတ်ဂှ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုမေ ၂၁ တေံဂှ်လေဝ် ဒပ်ကံၚ်ဇြဳပၞာန် ထောံလဝ်မခတိုဟ် ၂ မ ပွဳပွူဗ္ဒါဲကွာန်ယှိုဲကျဳကဵု ကွာန် (မိကျောၚ်းအိုၚ်) ပွိုၚ်ဍုၚ်သဓီု KNU နကဵုက္ၜၚ်ကျာကီုလေဝ် မၞိဟ်ဇီုကပိုက်ကလိဂွံဝပ် ဟွံမွဲပုဟ်ဂှ် ဂွံတီကေတ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဟိုတ်နူပန်ပှော်ဒၟံၚ်လွဟ်ဇၞော် ကုပွိုၚ်ဍုၚ် နူခရိုၚ်သဓီုဂမၠိုၚ် မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီုတံ ကြပ်အရိုဟ်တ္ၚဲတုဲ ညးဍုၚ်ကွာန်ကောန်အရာပ် ဇီုကပိုက်ချိုတ်တံ နွံဒၟံၚ်ရ။
အတိုၚ်တၚ်နၚ် နူသြၚ်လောန်တိုၚ်(မ်) ပကောံပ္ကေဝ်ဂွံဂှ်မ္ဂး အပ္ဍဲဂိတုဏံ ဟိုတ်နူပရေၚ်ပန်ပှော် နူဒပ်ကံၚ်ဇြဳပၞာန်တုဲ ပ္ဍဲခရိုၚ်သဓီု KNU ဂှ် ညးဍုၚ်ကွာန်ကောန်အရာပ် ၄ တၠ ချိုတ်တုဲ ဟွံအောန်နူကဵု ၂၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
အတိုၚ်လိက်ဒုၚ်စဳရေၚ် ဂကောံသုတေသန ညာန်လေန်တေတ်ဂှ်မ္ဂး အလုံဍုၚ်မွဲ သၞာံဏံ နူဂိတုဂျာန္နဝါရဳ စဵုကဵုဂိတုဨပရဴ အပ္ဍဲပွိုၚ်ပန်ဂိတုဂှ် ဟိုတ်နူပရေၚ်ဗ္တိုက်ပၞာန်ကျာ ကံၚ်ဇြဳပၞာန်တုဲ ညးဍုၚ်ကွာန်ကောန်အရာပ် ဗ္ဒါဲ ၃၆၀ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU