နေဗျဳဒဝ်၊ မေ ၂၄
ဟိုတ်နူပၞာန်ထ္ပက် ဂကောံဇြဟတ်ပၠန်ဂတးတံကဵု ဂကောံရပ်လွဟ်ကောန်ဍုၚ်အရၚ်တံဂှ်တုဲ ကံၚ်ဇြဳပၞာန် ဇြဟတ်ဗ္တိုက်စှ်ေကၠုၚ်ဒၟံၚ်ဂှ် ရေၚ်တၠုၚ်ကၠုၚ်ဒၟံၚ် တန်ဗ္တောန်ကွတ်ပၞာန်တံ မွဲလၟေၚ်တုဲမွဲလၟေၚ် ဗွဲမပြဟ်ပြေဟ်ရ။
ဘာဗ္တောန်ကွတ်ပၞာန် လၟေၚ် (၃) ဂတဏံဂှ် အတိုၚ်ရန်လဝ်ညံၚ်ဂွံဍိုက်ပေၚ် သ္ဂောံပံက်မာန် နွံပၟိက်ဒးဒစးဒုၚ်ဖန်ဇန်လဝ်ရောၚ် သ္ကိုပ်ဗိုလ်ဇၞော် မာၚ်ၚ်အေ ဒုဥက္ကဌ သ္ကိုပ်ကောပ်ကာဲပ္ညဳပ္ညပ် (ပၞာန်တိုက်၊ ပၞာန်ဍာ်၊ ပၞာန်ကျာ) ဂကောံကော်ပကောန်ပၞာန် ကဆံၚ်ဗဟဵု သ္ဂးလဝ်ရ။
ဂလာန် သ္ကိုပ်ဗိုလ်ဇၞော် မာၚ်ၚ်အေ ဂှ်ဝွံ ပ္ဍဲဘာဗ္တောန်ကွတ်ပၞာန်တုဲတုဲတေံဂှ် အတိုၚ်လၟိဟ်ညးတံ စၟတ်လဝ် ဟွံဂွံဂှ်ရ နကဵုဂကောံအုပ်ဓုပ်မဆေၚ်စပ်ဂမၠိုၚ် သွက်လၟေၚ်ဂတဂတတံဏံဂှ် ဒစးဒုၚ်တုဲ ဂွံပကောံလဝ်မၞိဟ်တၟိတၟိတံဂှ် ကဵုကၠုၚ်ဇြဟတ်ဂရိုဟ်ရောၚ် ဂွံကၠိုဟ်ကေတ်ရ။
သ္အာၚ်နူဂှ်ပၠန် ပ္ဍဲအရာကော် ကဵုယိုက်လျိုၚ်ပၞာန် သွက်ဘာကွတ်ပၞာန် လၟေၚ်တုဲတုဲတံဂှ် ကုညးကၠုၚ်စိုပ်ဟွံမာန်တံသီုဖအိုတ်ဂှ် ဒးကေတ်အာအရေဝ် ဗွဲမကိတ်ညဳကဵုသၞောဝ်မတန်တဴဒၟံၚ်တံဏောၚ်ဂှ် ဘပဠလဝ် ပ္ဍဲကောံဓရီုပ္ညဳပ္ညပ်ကမၠောန် ဂကောံကော်ပကောန်ပၞာန်ကဆံၚ်ဗဟဵုဂှ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် သၞောဝ်ယိုက်ဂၠေၚ်လျိုၚ်ပၞာန်ဝွံ ဒှ်ဒၟံၚ်ညံၚ်ရဴ ဓရိုဟ်ပလံၚ်ဒၟံၚ် ညးသၟတ်တံ အပ္ဍဲကတိုၚ်ကမ်စိုတ်ဂှ်ရ အတိုၚ်လၟိဟ်မၞုံပၟိက် ညံၚ်ဂွံဂွံဂှ် ကဵုဇြဟတ်ဂရိုဟ် ဘပဠတုဲ ဒးကၠောန်ဒၟံၚ်ရောၚ် သ္ၚဳဂၠိပ်လဝ်ရ။
“မွဲနဲပၠန်မ္ဂး ဒှ်သၞောဝ်ဓရိုဟ်ပလံၚ်ဏာ ညးသၟတ်တံ အပ္ဍဲကတိုၚ်ကမ်စိုတ်ရဏောၚ်။ ဟိုတ်ဂှ်ရ ဍေံတံ ကဵုတန်ဗ္တောန်ကုညးသၟတ်တံ တ္ၚဲဂၠေံဂၠေံတုဲ ဗလးမုက်ပၞာန်ဟီုဂှ် ပလံၚ်ဒၟံၚ် ကတိုၚ်ကမ်စိုတ်ရဏောၚ်။ ဗီုဏံတှ်ေ လၟိဟ်ဟွံပေၚ်တံ၊ ဂြိပ်တိတ်တံ၊ ကော်ဟွံကၠုၚ်တံဂှ် နွံတွဵုရဏောၚ်။ ကဵုဇြဟတ်ဂရိုဟ်အတေၚ် ဘပဠတုဲ ညံၚ်ဂွံဂွံ ၜိုတ်လၟိဟ်မၞုံပၟိက်ဂှ် ဒးကၠောန်ဒၟံၚ်သာ်ဏံဏောၚ် အဲညာတ်ရ” သာ်ဝွံ သ္ဂးရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး အခိၚ်ဂကောံကော်ပကောန်ပၞာန်ညးဍုၚ်ကွာန် ကဆံၚ်ပွိုၚ်ဍုၚ်တံ ကော်စိုပ်ဂှ် ဟွံဂွံကၠုၚ်ဂှ်ကီု၊ ပ္တိုန်လဝ်စရၚ်တုဲ နကဵုညးဟွံဂွံစၟဳတ်ယဲတံဂှ် ဒဏ်ထံၚ်ပိသၞာံကဵုဒှ်၊ ဒဏ်သြန်ကဵုဒှ် ဟွံသေၚ်မ္ဂး သီုဒဏ်ၜါသာ်ဏံကဵုဒှ် ဒးဒုၚ်ကေတ်အရေဝ်ဏောၚ်ဂှ် စၞောန်ပျးလဝ်ရ။
ဂကောံဇြဟတ်ပၠန်ဂတးရပ်လွဟ်တံဂှ် ညးမပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တံဂှ် ကေတ်အာအရေဝ် ပိုတ်တ်သ္ကုတ်တ်ဏောၚ် ကဵုသမ္တီဟီုလဝ်တုဲ ပရေၚ်ပသောၚ်ၚးတးတံလေဝ် ကၠောန်ၜိုတ်လဝ်ရ။
ကြဴနူသီအဝဵုတုဲ နကဵုကံၚ်ဇြဳပၞာန် ဒးဆေၚ်ဒၟံၚ်မုက် ကုပရေၚ်ပၠန်ဂတးရပ်လွဟ် အလုံဍုၚ်မွဲပြးဇး နကဵုမုက်ပၞာန်ဇဳဒိုဟ်ဂှ် ပရေၚ်ပၞာန် ၁၀၂၇ စတုဲ ဂွံပိဂိတုဂှ် ပၠောပ်လဝ်လမျီု သၞောဝ်ယိုက်ဂၠေၚ်လျိုၚ်ပၞာန်ရ။
ဟိုတ်နူပရေၚ်ပၞာန် ၁၀၂၇ တုဲ အပ္ဍဲမွဲၜါဂိတုဂှ် ဒးဗလးလဝ်တဲ တိဍာ်အုပ်ဓလီု ဗွဲမဂၠိုၚ်တုဲ သွက်ဂွံဗပေၚ် ဇြဟတ်ပရေၚ်ဗ္တိုက် ယအ်စှ်ေကၠုၚ်တံဂှ်တုဲ သ္ဂောံထ္မံက်ရုပ်ရဴ သၞောဝ်စၞောန်ပျးလဝ် လက်ထက်ဥူတာန်ယှိုဲ တၠအဝဵုပၞာန်တြေံဂှ် ဒှ်ကၠုၚ်ရ။
ဒဒှ်ရသၞောဝ်ယိုက်ဂၠေၚ်လျိုၚ်ပၞာန် လမျီုလုပ်ဂှ် ဂိတုဖေဖဝ်ဝါရဳ ၁၀ တေံ ကံၚ်ဇြဳပၞာန် လလောၚ်တြးတုဲဂှ် ဟွံမၚ် နဲသၞောဝ်ဥပဒေ တိတ်မွဲသာ် ဂါံကၠုၚ်လဂါံဇိုၚ် လၟေၚ်ကမၠောန် ပ္ကောံကောန်ဒပ်တံ မြက်က်ဇက်က်ရ။
ကၞောတ်ဂိတုမာတ်ဂှ် သွက်တန်ဗ္တောန်ကွတ်ပၞာန် လၟေၚ် (၁) အလုံဍုၚ်မွဲဂှ် နဒဒှ်လၟေၚ်ပထမ ပလံၚ်လဝ် ကောန်တန်ဗ္တောန် ၄၃၀၀ ပြၚ် ပ္ဍဲကဵုဘာတန်ဗ္တောန်ကွတ်ပၞာန် ၁၅ ဘာဂှ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS ရ။
ဘာဗ္တောန်ကွတ်ပၞာန် လၟေၚ် (၂) ဂှ် ကၠာတန်ဗ္တောန်ကၠာဂှ်ဟွံတုဲဏီ ပ္ဍဲဂိတုမေ သတ္တာဟဒုတိယဂှ် စပံက်လဝ်တုဲ ညးဒးဒုၚ်ပလံၚ်ဗစိုပ်တန်ဗ္တောန်ကွတ်ပၞာန်တံဂှ်ဝွံ သ္ကိုပ်အုပ်ဓုပ်အရာပ်တံ ကဵုဂၠံက်မာဲကီု၊ ကဵုရာန်ကဵုလှုဲတုဲ ထ္ပက်အဇာကီု၊ ရပ်ဒက်အတေၚ်အဓမ္မတံလေဝ် နွံဒၟံၚ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ နဒဒှ်လၟေၚ်ကမၠောန် သွက်သၞောဝ်ယိုက်ဂၠေၚ်လျိုၚ်ပၞာန်ဂှ် ထ္မံက်ဒၟံၚ်ရုပ်ရဴ လၟေၚ်ကမၠောန်ပ္ကောံကောန်ဒပ်တံကဵု လၟေၚ်ဘာကွတ်ပၞာန်တံ နကဵုနဲသၞောဝ်ဥပဒေအပြောံ (မူတတိယ) ဂှ်ရ။
ညးသၟတ်တံဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ဂ္စါန်ထောံလသာကၠုၚ် ဌာန်ဒၟံၚ်အိုတ်တုဲ ညးလုပ်စိုပ် ပ္ဍဲဒပ်ပၠန်ဂတးတံကဵု ဒၞါဲစ္ၜုဲစ္ၜော်တံ ၃၅၀၀ ပြၚ် နွံတုဲ မၞိဟ်ဂ္စါန်တိတ်ဍုၚ်သ္အာၚ် နကဵုနဲကဲနာနာတံဂှ် ၈၅၀၀၀ ပြၚ် နွံဒၟံၚ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် BACS ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram