တၞၚ်သဳ၊ ဂျောန် ၃၀
ဗ္ဒိုပ်ပယျဵု ပွိုက် ၃၀၀၀ နူဍုၚ်မဝ်ဒံၚ် ပွိုၚ်ဍုၚ်တၞၚ်သဳ မဒှ်ဍုၚ်ပယျဵုသေံ−ဗၟာဂှ် ကောန်ဒပ်ကံၚ်ဇြဳပၞာန်တံ ထောံလသာဂြိပ်ဒဴအာလဝ်ဂှ် ဂွံတီကေတ် ဇရေၚ်ကရောၚ်ပၞာန် ဒပ်ပံၚ်ကောံကောဒေံသ္ကုတ်သၠုၚ်ကျာတံရ။
ကောန်ဒပ်ကံၚ်ဇြဳပၞာန် နူဗ္ဒိုပ်ပယျဵု ပွိုက် ၃၀၀၀ ဖျေံလဝ်ဒပ် ဇြဟတ်ဒပ် ၃၀ ပြၚ်ဂှ်ဝွံ ပ္ဍဲဂိတုဂျောန် ၂၅ တုဲကၠုၚ်တေံ ထောံလသာဂြိပ်အာလဝ် နူဗ္ဒိုပ်ဂှ်ရ။
ဗ္ဒိုပ်ပယျဵု ကောန်ဒပ်ကံၚ်ဇြဳပၞာန်တံ ထောံလသာဂြိပ်ဒဴအာလဝ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ပ္ဍဲဂိတုဂျောန် ၂၇ တုဲကၠုၚ်တေံ ကၠောန်သ္ပၚးတးလဝ်တိဍာ်ရ။
ဗ္ဒိုပ်ပယျဵုဏံဂှ် ဂကောံဇြဟတ်ပၠန်ဂတးတံ ဟိုတ်နူကၟာတ်လဒဵုလဝ် ပွိုၚ် ၂၀ တ္ၚဲပြၚ်ဂှ်ရ လ္ပာ်ကံၚ်ဇြဳပၞာန် ထောံလသာဗ္ဒိုပ် ဂြိပ်ဒဴအာလဝ်ရောၚ် ကိုဝ်သာၚ်ညဳ ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ဒပ်ပံၚ်ကောံကောဒေံသ္ကုတ်သၠုၚ်ကျာ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ကံၚ်ဇြဳပၞာန် ထောံလသာဗ္ဒိုပ် ဒးဂြိပ်ဒဴအာလဝ်တံဂှ်ဝွံ နူပယျဵုသေံ−ဗၟာမွဲကဆံၚ် နကဵုအရီုဗၚ်သေံတံဂှ် ကလေၚ်စိုပ်အာ ဇရေၚ်ဍုၚ်မဝ်ဒံၚ်ယျဂှ် သ္ဂးရ။
ဗ္ဒိုပ်ပယျဵု ပွိုက် ၃၀၀၀ ဂှ် ခြာမံၚ်ကဵု ဍုၚ်မဝ်ဒံၚ် ၁၄ မိုၚ်ဓဝ်ရတုဲ သွက်ပရေၚ်ဂီုကၠီုပယျဵုဂှ် ဒှ်ဗ္ဒိုပ်ပၞာန် ပၟိက်ဇၞော်မွဲ ဗွဲမလောန်ရောၚ်ဂှ် ဂွံတီကေတ် အတိုၚ်ဂလာန် ညးတာလျိုၚ် ဂကောံဇြဟတ်ပၠန်ဂတးတံရ။
လအာတုပ်သာ်ဂှ်ကီု တုဲကၠုၚ် ပ္ဍဲဂိတုဂျောန် ၁၅ တေံဂှ်လေဝ် ဗ္ဒိုပ်ဗျူဟာကျံက်လံၚ်ကျဳ နွံဗ္ဒါဲဇိုၚ်ၜဳတၞၚ်သဳ တိဍာ်ထိၚ်ဒက် ဒပ်မဟာ ၄ ဗော်သွးကောန်ဂကူကရေၚ် KNU ဂှ်လေဝ် ကောန်ဒပ်ကံၚ်ဇြဳပၞာန်တံ ထောံလသာလဝ်ပၠန်ရ။
ဆ္ဂး ပ္ဍဲဂိတုဂျောန် ၁၉ ဂှ် သွက်ဂွံကလေၚ်ဂွံ ဗ္ဒိုပ်ကျံက်လံၚ်ကျဳဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ် ၂၀၀ ပြၚ်ဂှ် ဒးဒုၚ်ဗ္တိုက်လဝ်တုဲ ဒးဂိတုဲ ဆုတ်ကလေၚ်အာလဝ် နူဒပ်ဂှ်ရ။
အတိုၚ်တၚ်နၚ် နူသြၚ်လောန်တိုၚ် (မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲရးတၞၚ်သဳ အပ္ဍဲသၞာံဏံ လ္ပာ်ဒပ်ပၠန်ဂတးတံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ၁၀ ဗ္ဒိုပ်တုဲ ဗ္ဒိုပ်ဒပ် ၂ ဂှ် လ္ပာ်ကံၚ်ဇြဳပၞာန် ဒးဗလးလဝ်တဲရ။
ပရိုၚ်−သြၚ်လောန်တိုၚ်(မ်)
ဗီု−SBA