ယှိုဲကျေန်၊ ဂျောန် ၃၀
ပ္ဍဲကွာန်(ကောက်မဲ့သူ) ပွိုင်ဍုင်ယှိုဲကျေန် ခရိုၚ်ညံၚ်လေဝ်ပေန် ရးဗဂေါဂှ် ဒပ်ကံၚ်ဇြဳပၞာန် ဟိုတ်နူထောံမခတိုဟ် နကဵုဒရုၚ်တုဲ ကောန်အရာပ် ထပှ်တၠ ချိုတ်အာလဝ်ရောၚ် ဗော်သွးကောန်ဂကူကရေၚ် KNU လလောၚ်ပ္တိတ်လဝ် ပ္ဍဲဂိတုဂျောန် ၂၉ တေံရ။
တုဲကၠုၚ် ပ္ဍဲဂိတုဂျောန် ၂၈ အခိၚ်လဒေါဝ်တ္ၚဲ ၜိုတ် ၁၂ နာဍဳကဝိုက်ဂှ် ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ထောံဏာလဝ်မခတိုဟ်ပိမ ပ္ဍဲကဵုကွာန် (ကောက်မဲ့သူ) နကဵုဒရုၚ်ရ။
ဟိုတ်နူဒးဒုၚ်ဗ္တိုက်လဝ်ကဵုဒရုၚ်တုဲ သဝ်ဂဝ်မူတ အာယုက် ၁၇ သၞာံ၊ ကိုဝ်အံၚ်နာၚ်ဌေ၊ ကိုဝ်ထောန်လေန်အံၚ်၊ သဝ်တတဝ်၊ ကိုဝ်ဇြဝ်လေန်ကိုဝ်ဝ်၊ ကိုဝ်ထောန်တလွေန်အံၚ် ကေုာံ ကိုဝ်ကံၚ်ထကျဝ်တံ ဒးတုဲ ချိုတ်အာလဝ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲပွိုၚ်ဍုၚ်ယှိုဲကျေန်ဂှ် လ္ပာ်ဒပ်ကံၚ်ဇြဳပၞာန် ပေါဲဗ္တိုက်ဟွံမွဲမွဲသာ် ပရေၚ်ဗ္တိုက်ပန်ပှော်ကဵုလွဟ်ဇၞော် နကဵုဒရုၚ်တံဂှ် ကၠောန်သ္ပဒၟံၚ် အရိုဟ်ဒဒှ်တ္ၚဲရောၚ် ဂွံတီကေတ်ရ။
လအာတုပ်သာ်ဂှ်ကီု တုဲကၠုၚ်အပ္ဍဲဂိတုဂျောန် ၂၃ စဵုကဵုဂိတုဂျောန် ၂၅ အပ္ဍဲပွိုၚ်ပိတ္ၚဲဂှ် ဟိုတ်နူဒပ်ကံၚ်ဇြဳပၞာန် ပန်ပှော်စုတ်လွဟ်ဇၞော် အပ္ဍဲပွိုၚ်ဍုၚ်ကျံက်ကျဳကဵု ပွိုၚ်ဍုၚ်မုၚ် ရးဗဂေါတံဂှ်တုဲ ညးဍုၚ်ကွာန်ကောန်အရာပ် ၁၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး KNU ရ။
ပ္ဍဲတိဍာ်အုပ်ဓုပ် KNU ဂှ် ဒၟါနူဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ် ပန်ပှော်ကဵုလွဟ်ဇၞော်တံဂှ်တုဲ လၟိဟ်မၞိဟ်ညးဍုၚ်ကွာန်ကောန်အရာပ် မ္ဒးဂြိပ်ဒဴပါဲဒလေတ်ဒၟံၚ်တံ သာတုဲဂလိုၚ်တိုန်ကၠုၚ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်ကလာသေ ဟီုလဝ်ရ။
အခိၚ်လၟုဟ် အပ္ဍဲတိဍာ် KNU ဂှ် ညးဍုၚ်ကွာန်ပါဲဒဴဘဲပၞာန် ၁ ပြကောဋိကိုဋ်ပြၚ် နွံကၠုၚ်ယျတုဲ ပ္ဍဲတိဍာ်ဒပ်မဟာ ၃ ခရိုၚ်ညံၚ်လေဝ်ပေန်ဂှ် ညးဍုၚ်ကွာန်ကောန်အရာပ် ဗ္ဒါဲ ၅ ကိုဋ် နွံကၠုၚ်ယျဂှ် ဂွံတီကေတ် အတိုၚ်တၚ်နၚ် KNU ဗဟဵု လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ