ကျာ်ထဝ်၊ ဂျူလာၚ် ၂
အပ္ဍဲဘာလကျာ်ဓမ္မဒူတ နွံကွာန်ယျေကျဝ် ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ဟိုတ်နူလွဟ်ဇၞော် ဒပ်ကံၚ်ဇြဳပၞာန် ပန်ပှော်နၚ် ဒတုံဗ္တိုဟ်ထ္ကးအာလဝ်တုဲ ကောန်ထပိုယ်မွဲဇကု ပဝ်အာတုဲ ညးဗြဴမွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဂျောန် ၂၉ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် နူတမ်ဒပ်ခမရ စၟတ် ၂၀၇ ဖျေံသ္ဇိုၚ်ကျာ်ထဝ်ဂှ် ပန်နၚ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် အပ္ဍဲဒၞါဲဍုန်တိုပ်ပုၚ်ဂအုပ် ဘာလကျာ်ဓမ္မဒူတရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကောန်ထပိုယ် သုစိတ္တ ကလိဂွံအာယုက် ၁၀ သၞာံဂှ် ဒးမကမ် ပဝ်အာလဝ်တုဲ ဒဝ်သဳတာချိုဝ် အာယုက် ၄၉ သၞာံ ညးမကၠောန်ကဵုဒၟံၚ်ဝေယျာဝစ္စ ဘာလကျာ်ဂှ် ဇီုကပိုက်ကလိဂွံအာလဝ်ဝပ်ရ။
တမ်ဒပ် ခမရ ၂၀၇ ပန်လဝ်လွဟ်ဇၞော်ဂှ်ကဵု ဘာလကျာ်ဓမ္မဒူတဂှ်ဝွံ ခြာဒၟံၚ်ၜိုတ်မွဲမိုၚ်ရတုဲ ပ္ဍဲကဵုပရေၚ်ပန်ပှော်လွဟ်ဇၞော် ဒပ်ပၞာန်ဂှ် ဟွံဒးပွန်မွဲသာ် ဒတုံစှ်ေအာလဝ် ပ္ဍဲဘာလကျာ် ဗ္တိုဟ်ထ္ကးအာလဝ် ဒှ်မာန်ရောၚ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ သၞာဲဒဴကံၚ်ဇြဳပၞာန် နူတမ်ဒပ်ခမရ ၂၀၇ တံကဵု ညးတာလျိုၚ် ဘာလကျာ်တံဂှ် အရေဝ်ဂၠိုၚ်လဝ်နွံဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ပ္ဍဲပွိုၚ်ဍုၚ်ကျာ်ထဝ်ဂှ် စနူဂိတုတုဲကၠုၚ်တေံတုဲ ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော် အရိုဟ်ဒဒှ်တ္ၚဲတံတုဲ ညးဍုၚ်ကွာန်ဒေသ မွဲဠက်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
တုဲကၠုၚ် ပ္ဍဲဂိတုဂျောန် ၁၄ တေံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲခဠာတ်ကျံက်ဟာတ် အကြာကွာန်အခိုၚ်ကဵု ကွာန်တုၚ်ခွ ပွိုၚ်ဍုၚ်ကျာ်ထဝ်ဂှ်တုဲ ကောန်ၚာ်သၟတ်ၜါတၠ ချိုတ်အာလဝ်ဏီရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်(မ်) ပကောံပကေဝ်လဝ်တံဂှ်မ္ဂး အပ္ဍဲဂိတုဂျောန်မွဲဂိတု တုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ကောန်အရာပ် ပ္ဍဲပွိုၚ်ဍုၚ်ကျာ်ထဝ် ပိတၠ ချိုတ်အာလဝ်တုဲ ၁၃ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ