မတ်မလီု၊ ဂျူလာၚ် ၂
နူပၞာန်သီအဝဵု စဵုကဵုဂိတုဂျောန် သၞာံဏံ အလုံဍုၚ်မွဲ ပ္ဍဲဒေသနာနာ နကဵုဗီုပြၚ်နာနာသာ် ဒးဒုၚ်ရပ်ဒက်လဝ်တုဲ ညးဒးဒုၚ်ဂစိုတ် ၁၈၅၀ ပြၚ် နွံကၠုၚ်ဂှ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။
အပ္ဍဲပၞာန်သီအဝဵုဏံ အလုံဍုၚ်မွဲ လ္ပာ်ဒပ်ကံၚ်ဇြဳပၞာန် ရပ်ဒက်လဝ် ညးဍုၚ်ကွာန်ကောန်အရာပ် ကေုာံ ညးချဳဒရာၚ်ကတိုၚ်ကၟဟ် မဆက်စပ်ကဵု ပၠန်ဂတးတမ်က္ညၚ်တံ ဇၞော်ကဵုဇြဟတ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် “သံတိုင်နောက်မှ ပြန်လမ်းမဲ့သူများ” နူကဵု AAPP လလောၚ်ပ္တိတ်လဝ် ပ္ဍဲဂိတုဂျူလာၚ် ၁ တေံရ။
အတိုၚ်လိက်ဒုၚ်စဳရေၚ်ဂှ်မ္ဂး ညးဒးဒုၚ်ရပ်ဂမၠိုၚ်ဝွံ ပ္ဍဲကဵုဗ္ဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန်တံ ပ္ဍဲကဵုဗ္ဒိုပ်စၟဳတ်တံကဵု ပ္ဍဲကဵုထံၚ်စာတ်တံဂှ် ဒးဒုၚ်ရပ်ဒက်တုဲ ဒးဒုၚ်ပျဲပျာံဒၟံၚ် သီုစိုတ် သီုကာယ ကေုာံ သီုအရာမဆက်စပ်ကဵုလိၚ်တံ နဲကဲနာနာသာ်ရောၚ်ဂှ် သ္ဂးရ။
ဟွံရံၚ်ဗဵုကဵု သိက္ခာမၞိဟ်မွဲသာ် စၟဳတ်သၟာန်သၟုက် နကဵုနဲကဲမဓဇန်ကြမ်ကြတံဂှ်တုဲ ညးမချိုတ်အာ နကဵုဝပ်ဇီုကပိုက်ကလိဂွံလဝ်ဝပ်တံဂှ် ဟွံမွဲကဵုတၚ်ဒုၚ်လျိုၚ် ကေတ်လျိုၚ်တံမွဲသာ် ဂကောံပၞာန် ကလိလောန်ဒၟံၚ်ဖိုဟ်ဂှ် စၟတ်သမ္တီ AAPP ထ္မံက်ထ္ၜးလဝ်ရ။
ပ္ဍဲကဵုပြိုက်ဂစိုတ် ကောန်ထံၚ်ပရေၚ်ဍုၚ်ကွာန်ဂမၠိုၚ် သုၚ်စောဲနဲကဲပကီုပရာပ်တံတုဲ ဂစိုတ်ဂယိုၚ်လဝ်တံဂှ် နကဵုတၚ်စောဲစပ် ဂ္စါန်ဂြိပ်တိတ် အခိၚ်ဆုဲပြံၚ်ထံၚ်တံဂှ်တုဲ ပန်ဂစိုတ်တံလေဝ် သာတုဲကလိလောန်ဒၟံၚ်ရ။
အတိုၚ်စၟတ်သမ္တီ AAPP ဂှ်မ္ဂး ပ္ဍဲကဵုညးဒးဒုၚ်ဂစိုတ်ဂမၠိုၚ် အပ္ဍဲဗ္ဒိုပ်ဗၠာဲသၟိၚ်ဂှ် ၃၀ တၠ၊ အပ္ဍဲဒၞါဲစၟဳတ်တံဂှ် ၁၃၁ တၠ၊ အပ္ဍဲထံၚ်စာတ်တံဂှ် ၉၇ တၠ ချိုတ်အာလဝ်တုဲ အခိၚ်ထိၚ်ဒဝ်လဝ်ဂှ် ဟိုတ်နူရပ်ဒက်ပျဲပျာံတုဲ ၈၇ တၠ ကေုာံ ဟိုတ်နူဟွံဂွံအခေါၚ်လွဳယဲ ရုမ်မ်ဂပ်ပ်တုဲ ၆၃ တၠ ဒးချိုတ်အာလဝ်ရ။
သ္အာၚ်နူဂှ်ပၠန် ပ္ဍဲကဵုလၟိဟ်မဒးချိုတ်အာ လက္ကရဴတိုၚ်ပသဲ ဗ္ဒိုပ်ထိၚ်ဒဝ်ဂကောံပၞာန် ဗွဲမလုပ်သၞောဝ်တံဂှ် ဂၠိုၚ်နူကဵုလၟိဟ်ဏံမာန်တုဲ နကဵုညးဒးဒုၚ်ဂိလဝ်ဂမၠိုၚ် သ္ၚောဲဒၟံၚ်ကဵု ဗဗွဲဓဝ်ဖိုဟ်ဏောၚ်ဂှ် AAPP ထံက်ထ္ၜးလဝ်ရ။
မွဲလ္ပာ်ဂှ်ပၠန် ကောန်ထံၚ်ပရေၚ်ဍုၚ်ကွာန် ၉၂၀၀ ပြၚ်ဝွံ ဒးဒုၚ်ထိၚ်ဒဝ်ဒၟံၚ် ပ္ဍဲကဵုထံၚ်စာတ်တံကဵု ဘာတန်ဗ္တောန်သၟတ်တံဂှ်တုဲ ဟိုတ်နူဒးဒုၚ်ရပ်ဒၟံၚ်ကဵု ပွဍဵုဍိုက် သၟိၚ်တၠအဝဵုတံ နကဵုနဲကဲနာနာသာ်တံဂှ်တုဲ အခေါၚ်ဟီုဂးဂမၠိုၚ် ကၠေံခၞၚ်အိုတ်တုဲ ဟွံဂွံပရိုၚ်တံဂှ်လေဝ် နွံဒၟံၚ်ရ။
ဟိုတ်ဂှ်ရ ဂကောံပၞာန် ဟွံမွဲကဵု တၚ်ဒုၚ်လျိုၚ် တၚ်ကေတ်လျိုၚ် သွက်ပြဝမကလိလောန်လဝ်တံဂှ် သွက်ဂွံကေတ်အရေဝ် ဗွဲမစိုပ်တရဴမာန် သွက်ဂွံကလေၚ်လွဳ ဗွဲမစှ်ေကဵုသၞောတ်တံမာန်ဂှ် AAPP ဖ္ဍိုက်ဖ္အောဝ်လဝ် ညးတာလျိုၚ်မဆက်စပ်တံကဵု ဗွိုၚ်ဍုၚ်သ္အာၚ်တံရ။
ပရိုၚ်−သြၚ်လောန်တိုၚ်(မ်)
ဗီု−Human Right