ထဝါဲ၊ ဂျူလာၚ် ၂
စပ်ကဵုပရူပရာ ကံၚ်ဇြဳပၞာန် ပန်ဂစိုတ်လဝ် ကျာ်ဇၞော်အ္စာ ဘဒ္ဒန္တနိန္ဒာဘိဝံသ နွံပိုန်ဘာဝေန်နိမ္မိတာ ရးဗဂေါဂှ်တုဲ သၚ်နူအပ္ဍဲခရိုၚ်ထဝါဲ ရးတၞၚ်သဳတံလေဝ် ပါလုပ်ကၠုၚ်လဝ် ပ္ဍဲကဵုပေါဲထ္ၜးဆန္ဒ ဗကပ်ဗဗေၚ် ပတ္တနိက္ကုဇ္ဇနဂှ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဂျောန် ၃၀ အခိၚ်လဒေါဝ်တ္ၚဲဂှ် ပေါဲထ္ၜးဆန္ဒဗကပ်ဗဗၚ် ခမဳသၚ် ၁၀ ဇကုပြၚ်ကဵု ညးဍုၚ်ကွာန်ပူဗိုၚ်လ္ၚဵုတံ ပါလုပ်လဝ်ဂှ် ဂေတ်ဂေၚ်လဝ် ပ္ဍဲပွိုၚ်ဍုၚ်တယိတ်ချံၚ် အပ္ဍဲခရိုၚ်ထဝါဲရ။
ကိုဝ်မေန်လွေန်ဥူ ကမ္မတဳဗကပ်ဗဗေၚ် ခရိုၚ်ထဝါဲဂှ် ခမဳသၚ် အပ္ဍဲခရိုၚ်ထဝါဲဂမၠိုၚ် အာဂတ တိတ်ကၠုၚ်ဂၠံၚ်မ္ဂး နကဵုညးဍုၚ်ကွာန်ဂမၠိုၚ် ဒးပူဗိုၚ်ဗက် လက္ကရဴဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုကမ္မတဳဗကပ်ဗဗေၚ် ပိုယ်တံဂမၠိုၚ် သၞာံတုဲကၠုၚ်တေံ ခမဳသၚ်ဂမၠိုၚ် ဗကပ်ဗဗေၚ် ပတ္တနိက္ကုဇ္ဇနတုဲ သွက်ဂွံထ္ၜးဆန္ဒအိုတ်ဂှ် ပ္တိတ်တၚ်လလောၚ်တြးတုဲ အာတ်မိက်လဝ်နွံရ။ လၟုဟ်ဂှ် ခမဳသၚ်နွံဒၟံၚ် အပ္ဍဲခရိုၚ်ထဝါဲဂမၠိုၚ်ဂှ်တှ်ေ သွက်ဂွံဗကပ်ဗဗေၚ် ထ္ၜးဆန္ဒ ဒီပတ္တနိက္ကုဇ္ဇနဂှ် တိတ်ကၠုၚ်ကၠုၚ်တံ နွံရ။ ဆ္ဂး ခမဳသၚ်ဂမၠိုၚ် တိတ်ကၠုၚ်ဂတတှ်ေ ဒကာဘာဒကာဗျဉ်တံ ညးဍုၚ်ကွာန်တံဂှ်လေဝ် ဒးပူဗိုၚ်လက္ကရဴဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ပ္ဍဲခရိုၚ်ထဝါဲဂှ် သၚ်သၟတ်ဂမၠိုၚ် အောန်စှ်ေကၠုၚ်တုဲ တၠဂုဏ်အ္စာ ဟီုတုဲသြဇာနွံ လ္တူဒကာဘာ ဒကာဗျဉ်တံဂှ်လေဝ် ဂွံထ္ၜးဆန္ဒ ကုပရေၚ်ပၞာန်သီအဝဵုဂှ် ဆန္ဒဟွံမွဲ မံၚ်ဒၟံၚ်ၜိုဟ်ဟ် ညံၚ်ဟွံဆေၚ်ကဵုညးတံအိုတ်ဂှ်ရ ခမဳသၚ်ဂမၠိုၚ် ဂွံတိတ်ကၠုၚ်ဂၠံၚ် ကဵုဂအုံဗွဝ်ဟီုဂှ် ဝါတ်ဂါတ်ဂှ် ကိုဝ်မေန်လွေန်ဥူ ဆက်ဟီုလဝ် လညာတ်ညးရ။
ပ္ဍဲဂိတုဂျောန် ၁၉ တုဲကၠုၚ်တေံ ကျာ်ဇၞော်အ္စာ နွံပိုန်ဘာဝေန်နိမ္မိတာ ဒးဒုၚ်ပန်ဂစိုတ်တုဲ ခမဳသၚ် နူကဵုဒေသတၞဟ်ဟ် ဗွဲမဂၠိုၚ်ဝွံ ဟိုတ်နူဗကပ်လဝ်ဗဗေၚ် ပတ္တနိက္ကုဇ္ဇနဂှ်ရ ပ္ဍဲကဵုဂၠံၚ် ဒၞါဲဘာလကျာ်နွံ လ္တူဍုၚ်ထဝါဲတံဂှ် ကောန်ဒပ်ကံၚ်ဇြဳပၞာန်တံ ဟိုတ်နူပရေၚ်ဂီုကၠီုတုဲ မၚ်ကျောဝ်လဝ်အိုတ်ရ။
ကျာ်ဇၞော်အ္စာ ဒးဒုၚ်ပန်ဂစိုတ်တုဲ မရနုက်ကဵုမသုန်တ္ၚဲ ပ္ဍဲဂိတုဂျောန် ၂၃ စဵုကဵုဂိတုဂျောန် ၃၀ ဂှ် ခမဳသၚ် နူအပ္ဍဲရးသက်ကိုၚ် မပ္တံကဵု ပွိုၚ်ဍုၚ်ချံၚ်ဥူ၊ ဒဳပေဝ်ယျေန်၊ သာလေန်ကျဳ၊ တသေဝ်၊ သက်ကိုၚ်၊ မုၚ်ယဲ၊ ဝက်လက်၊ ဘုတလေန်၊ အယျာဒဝ် ကေုာံ ပွိုၚ်ဍုၚ်မျေန်မူတံဂမၠိုၚ်ဝွံ ပါလုပ်ကၠုၚ် ပ္ဍဲကဵုပေါဲဗကပ်ဗဗေၚ်အိုတ်ရ။
သ္အာၚ်နူဂှ်ပၠန် မ္ၚးနူကဵုခမဳသၚ် နူပွိုၚ်ဍုၚ်မျာၚ်ကဵု ပွိုၚ်ဍုၚ်ပခုက္ကူ ရးမဂွဵုဂှ် ခမဳသၚ် နူအပ္ဍဲခရိုၚ်ထဝါဲ ရးတၞၚ်သဳဂှ်လေဝ် ပါလုပ်ကၠုၚ်လဝ် ပ္ဍဲကဵုဒၞါဲဗကပ်ဗဗေၚ်တံဂှ်ရ ပွိုၚ်ဍုၚ်ဗကပ်ဗဗေၚ်ဂှ် နွံကၠုၚ်လဝ် စဵုကဵု ၁၃ ပွိုၚ်ဍုၚ်ရ။
စပ်ကဵုခမဳသၚ်ဂမၠိုၚ် ဗကပ်ဗဗေၚ်ဂှ်တုဲ လ္ပာ်ကံၚ်ဇြဳပၞာန် ဒဵုကဵုအခိၚ်လၟုဟ် ခၠေဝ်ပလန်ဟီုဂးလဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−CJ