ကျံက်မေဝ်၊ ဂျူလာၚ် ၃
ရးသေံသ္ကုတ်သၟဝ်ကျာ ပ္ဍဲဍုၚ်ကျံက်မေဝ်ကဵု ဍုၚ်တဳပဝ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဍုၚ်ကွာန်ကောန်အရာပ် ပိတၠချိုတ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ပ္ဍဲဂိတုဂျူလာၚ် ၂ တေံ TNLA လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျူလာၚ် ၁ အခိၚ်ဇိုၚ်သဝ်တ္ၚဲဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ နူအရာပ် ၈ ဍုၚ်ကျံက်မေဝ်ဂှ် မၞိဟ်တြုံ ၂တၠကဵု မၞိဟ်ဗြဴမွဲတၠ ဒးမကမ်ချိုတ်အာလဝ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲကဵုတ္ၚဲဂှ် အခိၚ်ဗ္တံ ၜိုတ် ၆ နာဍဳဂှ်လေဝ် ဍုၚ်တဳပဝ် ပ္ဍဲအရာပ်သာန်ဖုက်တၟိဂှ် လွဟ်ဇၞော်ဒတုံဗ္တိုဟ်ထ္ကးတုဲ မၞိဟ်တြုံၜါတၠကဵု မၞိဟ်ဗြဴပိတၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
အပ္ဍဲပေါဲဗ္တိုက်စက္တဵုဒှ်လဝ် ပွိုၚ် ၆ တ္ၚဲဂှ် သီုကဵုလွဟ်ဇၞော်ဇြဟတ်သ္ကာတ် လျိုၚ်ပံၚ် ၅၀၀ ဂှ်မပါလုပ် ဟိုတ်နူပရေၚ်ပန်ပှော်ဗ္တိုက် လွဟ်ဇၞော်ကဵု ပၞာန်ကျာတံဂှ်တုဲ ညးဍုၚ်ကွာန်ကောန်အရာပ် နူပွိုၚ်ဍုၚ် ရးသေံသ္ကုတ်သၟဝ်ကျာ ၂၅ တၠ ချိုတ်အာလဝ်တုဲ ၃၇ တၠ ဇီုကပိုက်ကလိဂွံလဝ်ဝပ်သၟးဟွံက သီုသ္ၚိဒၟံၚ် ဗ္ဒါဲ ၅၀ လီုလာ်အာလဝ်ရောၚ် TNLA လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျောန် ၂၉ တေံဂှ်လေဝ် ပ္ဍဲဍုၚ်ကျံက်မေဝ် အရာပ် ၈ ဂှ် ဟိုတ်နူလွဟ်ဇၞော် ကံၚ်ဇြဳပၞာန် ဒတုံဗ္တိုဟ်ထ္ကးအာလဝ်တုဲ ညးဍုၚ်ကွာန်ကောန်အရာပ် ၂ တၠ ချိုတ်အာလဝ်တုဲ မွဲတၠ ဇီုကပိုက်ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)
ဗီု−TNLA