တၞၚ်သဳ၊ ဂျူလာၚ် ၇
ပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ရာမ်ဖိုဝ် ပွိုၚ်ဍုၚ်တၞၚ်သဳ ရးတၞၚ်သဳဂှ် နူတမ်ဒပ်စဵုဒၞါညးဍုၚ်ကွာန် (LPDF) ဖျေံသ္ဇိုၚ်ဒေသဂှ် ဗိုလ်မွဲတၠကဵု ကောန်သ္ဂံၚ်မွဲတၠ ပြဟ်လလုဲအာလဝ်ရောၚ် ဂွံတီကေတ် ဇရေၚ်ဂကောံဒပ်စဵုဒၞါညးဍုၚ်ကွာန်တံရ။
တုဲကၠုၚ် ဂိတုဂျူလာၚ် ၄ အခိၚ်လဒေါဝ်တ္ၚဲ ၜိုတ် ၂ နာဍဳဝိုက်ဂှ် နူကဵုဒပ် (ဗိုလ်ခရင်း) ဒပ်စဵုဒၞါညးဍုၚ်ကွာန်ဖျေံသ္ဇိုၚ်ဒေသ အကြာကွာန်ရာမ်ဖိုဝ်ကဵု ကွာန်ချံၚ်ညဳကိုဝ်ဂှ် ဗ္တိုဟ်မာၚ်ဗ္တိုက်လဝ် ကရောၚ်ပၞာန်တိုက် ကံၚ်ဇြဳပၞာန် တိတ်ကၠုၚ် လ္ပာ်ကွာန်ရာမ်ဖိုဝ်တံဂှ်ရ။
ဟိုတ်နူဗ္တိုဟ်မာၚ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်မွဲနာဍဳတုဲ နူဒပ်စဵုဒၞါညးဍုၚ်ကွာန် ဖျေံသ္ဇိုၚ်ဒေသဂှ် (ဗိုလ်ခရင်း) ကဵု ကောန်သ္ဂံၚ်မွဲတၠ ချိုတ်အာလဝ်ရောၚ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ပံၚ်တောဲ ၂ ဒပ်စဵုဒၞါညးဍုၚ်ကွာန် မစုက်ကဵုဂကောံ (ဗိုလ်ခရင်း) ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် အပ္ဍဲပရေၚ်ဗ္တိုက်ဗ္တိုဟ်မာၚ်ဂှ် လ္ပာ်ဒပ်ကံၚ်ဇြဳပၞာန် ဟွံအောန်နူကဵု ၁၀ တၠ ဇီုကပိုက်ချိုတ်အာလဝ် နွံဒၟံၚ်ရောၚ် နိဿဲကေတ် ဂလာန်ကောန်သ္ဂံၚ် နူဂကောံ(ဗိုလ်ခရင်း)ဂှ်တုဲ ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန် ၂ ဂှ် ဆက်ဟီုလဝ်ရ။
ပ္ဍဲပွိုၚ်ဍုၚ်တၞၚ်သဳ ကွာန်ရာမ်ဖိုဝ်၊ ကွာန်ကာန်တိုဝ်ကဵု ကွာန်ဗာန်လမွတ်တံဂှ်ဝွံ နွံဒၟံၚ်ဆက်က်တုဲ မွဲဒမြိပ်ဏံဂှ် ဒပ်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်ဒၟံၚ်မာၚ် မွဲဏှမွဲဏှရောၚ် ဂွံတီကေတ်ရ။
အခိၚ်လၟုဟ် ဒပ်ကံၚ်ဇြဳပၞာန် ဒးဒုၚ်ဗ္တိုဟ်မာၚ်ဗ္တိုက်ဂှ်ဝွံ ဟွံဆုတ်ကလေၚ်ကရောၚ်ပၞာန်မွဲသာ် နွံဒၟံၚ်ပ္ဍဲတမ်ဒပ် ခမရ စၟတ် ၅၅၆ ဖျေံသ္ဇိုၚ် (ဇဝဲ) ဂှ်တုဲ ပ္ဍဲဂၠံၚ်ဇၞော်ပျဳထံၚ်သု စၟတ် ၈ ဂှ် ဖျေံလဝ်ကၚ်ဂၠံၚ်တံ ကၠောန်ဒၟံၚ်ရောၚ် ဂွံတီကေတ် အတိုၚ်ဂလာန် ဂကောံဒပ်စဵုဒၞါညးဍုၚ်ကွာန်တံရ။
တုဲကၠုၚ်ဂိတုမေ ၂ တေံဂှ်လေဝ် သၞေဟ်ကၚ်စၟဳတ် ကံၚ်ဇြဳပၞာန် နွံပ္ဍဲကွာန်တုၚ်ပျဝ်ကျဳ ပွိုၚ်ဍုၚ်တၞၚ်သဳဂှ် ဒးဒုၚ်လုပ်စိုပ်ဗ္တိုက်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ