ညံၚ်လေဝ်ပေန်၊ ဂျူလာၚ် ၇
ပ္ဍဲပွိုၚ်ဍုၚ်မုၚ် ကေုာံ ပွိုၚ်ဍုၚ်ကျံက်ကျဳ၊ တိဍာ်ဒပ်မဟာ ၃ ခရိုၚ်ညံၚ်လေဝ်ပေန် KNU ဂှ် ဒပ်ကံၚ်ဇြဳပၞာန် ပန်ပှော်လွဟ်ဇၞော် လ္တူညးဍုၚ်ကွာန်တုဲ ဟိုတ်နူပန်ပှော်ကဵုလွဟ်ဇၞော် ကေုာံ ဒရုၚ်တံဂှ်တုဲ အပ္ဍဲပွိုၚ် ၅ တ္ၚဲ ညးဍုၚ်ကွာန်ကောန်အရာပ် ၃ တၠ ဒးချိုတ်အာလဝ်တုဲ ၄ တၠ ဇီုကပိုက်ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ရ။
ဟိုတ်နူလိုန်ဒးမာၚ်တိုပ်တိ ဒပ်ကံၚ်ဇြဳပၞာန်တံ ပစူလဝ်တံဂှ်တုဲလေဝ် ညးဍုၚ်ကွာန် ၁ တၠ ဇီုကပိုက်ကလိဂွံလဝ်ဝပ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
အပ္ဍဲတိဍာ်အုပ်ဓုပ် ပွိုၚ်ဍုၚ်မုၚ် KNU ဂှ် ပ္ဍဲဂိတုဂျူလာၚ် ၁ အခိၚ်လဒေါဝ်တ္ၚဲ ၜိုတ် ၁၂ နာဍဳဝိုက်ဂှ် ဒပ်ကံၚ်ဇြဳပၞာန် ဖျေံသ္ဇိုၚ် ပ္ဍဲ(သာစည်) ပန်စုတ်လဝ်လွဟ်ဇၞော် ၆၀ မမ ပ္ဍဲကွာန်နံၚ်ချဵုတုဲ သမ္ဘာတၠသ္ၚိၜါတၠ ဒၟံၚ်ကွာန်ဂှ် ဒးချိုတ်အာလဝ်ရ။
သ္အာၚ်နူဂှ်ပၠန် ကောန်ဇာတ် ညးမဒးချိုတ်အာတံ ၃ တၠ၊ ကောန်ကၟိန် ၁ တၠ အပံၚ်ဖအိုတ် ၄ တၠဝွံ ကလိဂွံလဝ်ဝပ် ဟွံဒးဂွိၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲဂိတုဂျူလာၚ် ၃ အခိၚ်နူဂယး ၜိုတ် ၆ နာဍဳဂှ် မၞိဟ်တြုံ အာယုက် ၄၉ သၞာံမွဲတၠ ဒၟံၚ်ကွာန်ငနဲသုက် ပွိုၚ်ဍုၚ်မုၚ်ဂှ်ဝွံ ပ္ဍဲကဵုသ္ကဲဂၠံၚ်ကၠအ်ညးမံၚ်ဂှ် လိုန်ဒးမာၚ် ကောန်ဒပ်ကံၚ်ဇြဳပၞာန်တံ ပစူလဝ်တုဲ ဇီုကပိုက်ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ် (ကျံက်ကျဳ) လာဒိုဝ် KNU ဂှ်လေဝ် ပ္ဍဲဂိတုဂျူလာၚ် ၂ အခိၚ်ဗ္တံ ၁၀ နာဍဳပြၚ်ဂှ် နူတမ်ဒပ်ကံၚ်ဇြဳပၞာန် ခမရ ၃၀၇ ပန်ပှော်လဝ်လွဟ်ဇၞော် ၁၂၀ မမ ၅ မတုဲ မကမ်လွဟ်ဇၞော်ဂှ်ဝွံ ဒတုံဗ္တိုဟ်ထ္ကးအာလဝ် ဗ္ဒါဲကွာန် ( ရွာသာယာ) ရ။
ပ္ဍဲဂိတုဂျူလာၚ် ၃ တေံဂှ်လေဝ် တမ်ဒပ်ကံၚ်ဇြဳပၞာန် ခလရ ၂၆၄ ဂှ် ပန်လဝ်လွဟ်ဇၞော် ၁၂၀ မမ မွဲမ၊ နူတမ်ဒပ် ခမရ ၂၀ ဂှ် ပန်လဝ်လွဟ်ဇၞော် ၁၂၀ မမ ၂ မတုဲ ဒတုံဗ္တိုဟ်ထ္ကးအာလဝ် အကြာကွာန် တဝ်ကျံၚ်ပံက် ကေုာံ ကွာန်ဖိုဝ်အေန်ကုန်၊ အကြာကွာန်ချုၚ်အေန် ကေုာံ ကွာန်ကွေန်ကုန်တံရ။
ပ္ဍဲဂိတုဂျူလာၚ် ၄ တေံဂှ်လေဝ် နူဍုၚ်ကျံက်တခါဂှ် ဒပ်ကံၚ်ဇြဳပၞာန် ပန်စုတ်လဝ်လွဟ်ဇၞော် ၁၂၀ မမ မွဲမတုဲ ဒတုံဗ္တိုဟ်ထ္ကးအာလဝ် ဗ္ဒါဲကွာန်ခိုဝ်လိုဝ်တုဲ တမ်ဒပ်ကံၚ်ဇြဳပၞာန် ခလရ ၂၆၄ ဂှ် ဟိုတ်နူပန်လဝ်လွဟ်ဇၞော် ၁၂၀ မမဂှ်ရ ဒတုံစှ်ေအာလဝ် အကြာကွာန် ခိုဝ်လိုဝ် ကဵု ကွာန်ဖယျာဇြဳကုန်တံရောၚ် သ္ဂးလဝ်ရ။
သ္အာၚ်နူဂှ်ပၠန် နူတမ်ဒပ်ကံၚ်ဇြဳပၞာန် ခလရ ၂၆၄ ဂှ် ပန်စုတ်လဝ်လွဟ်ဇၞော် ၁၂၀ မမ ၂ မတုဲ ဒတုံဗ္တိုဟ်ထ္ကးအာလဝ် ဗ္ဒါဲကွာန်တမေန်အေန်တုဲ မၞိဟ်တြုံကောန်ကွာန် တမေန်အံၚ်ကုန်မွဲတၠ အာယုက် ၅၀ သၞာံဂှ် ဇီုကပိုက်ချိုတ်အာလဝ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲဂိတုဂျူလာၚ် ၅ ဂှ် ဒပ်ကံၚ်ဇြဳပၞာန် ထောံမခတိုဟ်ဗ္တိုက်လဝ် ပ္ဍဲကွာန်ဒံၚ်ခေန် နကဵုဒရုၚ်တုဲ သ္ၚိဒၟံၚ် ၂ မ ဇီုကပိုက်လီုလာ်အာလဝ်တုဲ မွဲအဆက်ဓဝ် နူတမ်ဒပ်ကံၚ်ဇြဳပၞာန် ခလရ ၂၆၄ ဂှ် ထပ်ပန်ပှော်စုတ်လဝ် လွဟ်ဇၞော် ၁၂၀ မမ ၄ မဂှ်ရ ဒတုံဗ္တိုဟ်ထ္ကးအာလဝ် ပ္ဍဲကွာန်ကျုက်ကွေန်ရောၚ် သ္ဂးရ။
ပ္ဍဲတိဍာ်ဒပ်မဟာ ၃ ခရိုၚ်ညံၚ်လေဝ်ပေန် KNU ဂှ် ဒပ်ကံၚ်ဇြဳပၞာန် စွံပွန်ဗ္တိုက် လ္တူညးဍုၚ်ကွာန်ကောန်အရာပ်တံဂှ်တုဲ ပန်ပှော်ဗ္တိုက် နကဵုလွဟ်ဇၞော် ဒရုၚ်တံကီု၊ ဝးပ္ကဝ်အခေါၚ်အရာမၞိဟ်တံဂှ် ကၠောန်ဒၟံၚ်အရိုဟ်တ္ၚဲဂှ်ရ ညးဍုၚ်ကွာန်ကောန်အရာပ်ဒေသတံ ဇီုကပိုက်ချိုတ် ကလိဂွံလဝ်ဝပ်တံတုဲ ဒးမံၚ်ဒၟံၚ် နကဵုဓဝ်ဖေက်လကိုတ်တံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU