ရေဝ်၊ ဂျူလာၚ် ၉
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကွာန်တၟအ်ကၞေၚ်ဂှ် ညးဗြဴမွဲတၠ ဒးဒုၚ်ပန်ဂစိုတ်တုဲ ဒပ်ပံၚ်ကောံကံၚ်ဇြဳပၞာန် ကၠုၚ်စိုပ်စၟဳတ်တံ ၜုၚ်တက်ပျဲပျာံဏာလဝ် မၞိဟ်တြုံဒေသပိတၠဂှ် ဂွံတီကေတ် ဇရေၚ်ညးဒေသတံရ။
နူဏေံတေံ ပ္ဍဲဂိတုဂျူလာၚ် ၇ အခိၚ်ဗ္တံ ၜိုတ် ၈ နာဍဳဂှ် ဒဝ်နှေန်ယုလှာၚ် အာယုက် ၃၀ သၞာံ ဒၟံၚ်အရာပ်သၞေဟ်ကာ ကွာန်တၟအ်ကၞေၚ်ဂှ် သၟာသေနာတ် ဟွံတီယၟုၜါတၠ လုပ်စိုပ်အာအပ္ဍဲသ္ၚိ ပန်ဏာလဝ် နကဵုသေနာတ်ရ။
ဟိုတ်နူဒးဒုၚ်ပန်လဝ်ကဵုသေနာတ်တုဲ ဒဝ်နှေန်ယုလှာၚ်ဝွံ နကဵုဝပ် ဒးအာမကမ်လက္ကရဴကၠေၚ်က္ဍဟ်ဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
အတိုၚ်ဂလာန်ညးဒေသတံဂှ်မ္ဂး ဒဝ်နှေန်ယုလှာၚ်ဝွံ ကဵုအကံက် ဇရေၚ်ဒပ်ဗၠာဲသၟိၚ် ကေုာံ ဒပ်ပၞာန်တံတုဲ ဒှ်ညးသွံဒၟံၚ် ဂဥုဲၜူမာဲမွဲတၠတုဲ မွဲဏှမွဲဏှဟီုဂွံ လ္ပာ်ကံၚ်ဇြဳပၞာန် ကၠုၚ်စိုပ်လဝ် ဇရေၚ်သ္ၚိဒၟံၚ်ညးတံ နွံဒၟံၚ်ရောၚ် သ္ဂးရ။
ကြဴနူပရေၚ်ပန်ပှော်ဂှ်က္တဵုတုဲ ၜိုတ်ဘာ်နာဍဳဂှ် ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် ဗ္ဒါဲ ၂၀ တၠ နူကဵုတမ်ဒပ် ခလရ စၟတ် ၁၀၆ ဖျေံသ္ဇိုၚ်တၟအ်ကၞေၚ်ဂှ် စၟဳတ်သၟာန်သၟုက်လဝ် ညးဍုၚ်ကွာန်ဒေသလ္ၚဵုတံရ။
ပ္ဍဲအရာစၟဳတ်သၟာန်သၟုက်သာ်ဏံဂှ် တက်ကျာဟွံပြေပြံၚ်ဂးတုဲ တက်ထၞက်ထၞိက် ၜုၚ်ကဵုနၚ်သေနာတ်တုဲ မၞိဟ်တြုံဒေသပိတၠ ကလိဂွံလဝ်ဝပ်ရောၚ် ဂွံတီကေတ်ရ။
စပ်ကဵုလၟေၚ်ဒဒှ် ပရေၚ်ပန်ပှော်ဏံဂှ်တုဲ မ္ၚးနူကဵုကံၚ်ဇြဳပၞာန်ဂှ် ဂကောံဇြဟတ်ပၠန်ဂတး ဖျေံသ္ဇိုၚ်ဒေသတံလေဝ် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်မွဲမွဲသာ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−Social Media