မတ်မလီု၊ ဂျူလာၚ် ၁၃
အပ္ဍဲတွဵုရးဍုၚ်မန် အပ္ဍဲတိုက်သြန်တံဂှ် ဟိုတ်နူအခက်အခုဲပ္တိတ်သြန်တံကီု သီုကဵုတၚ်သၞောတ်ဗ္ၜတ် ပ္ဍဲအရာပ္တိတ်ကဵုလှုဲတံဂှ်တုဲ ပရေၚ်သွံရာန်ထၜိုတ် ဒေါအ်ဒေၚ်အာယျဂှ် တၠကမၠောန်သွံရာန်ထၜိုတ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူကံၚ်ဇြဳပၞာန် ကေတ်အရေဝ် ကုတိုက်သြန်ပုဂ္ဂလိက အပ္ဍဲဍုၚ် ၇ တုဲဂှ် ပ္ဍဲကဵုဗာန်တံဂှ်တှ်ေ ရဲပ္တိတ်လှုဲတံ ဂၠိုၚ်ကၠုၚ်တုဲ နူကဵုတိုက်သြန်တံ ဟိုတ်နူသၞောတ်ဗ္ၜတ်ကၠုၚ် ပွပ္တိတ်သြန်တံဂှ်တုဲ ဇီုကပိုက်ကၠုၚ် လ္တူကမၠောန်ပရေၚ်သွံရာန်ထၜိုတ်နွံကၠုၚ်ရ။
ပ္ဍဲတိုက်သြန်တံဂှ် သြန်သှ်ေအောန်ကၠုၚ်ကီု၊ ဟိုတ်နူပရေၚ်ဂီုကၠီုတုဲ အကာဲအရာပလံၚ်ဗစိုပ်ဏာနၚ်မလှုဲတံ ဝါတ်ဂါတ်ကၠုၚ်တုဲ ပ္ဍဲကဵုအကံက် Special ကော်ဂး ပ္ဍဲအကံက်ပံက်လဝ် လက်ထက်ကံၚ်ဇြဳပၞာန်ဏံဂှ်ရဂှ် ဒးပ္တိတ်ကဵုဒၟံၚ်မလှုဲ ကဵုဗၞတ်ဗ္ၜတ်ရ။
ပ္ဍဲအရာပ္တိတ်ကဵုဂှ် လိက်ဗာန်မွဲအုပ်မ္ဂး အောန်အိုတ် နူ ၅ ကိုဋ်ဒ္ကေဝ် ဂၠိုၚ်အိုတ် စဵုကဵု ၂၀ ကိုဋ်ရဟေၚ် ပ္တိတ်ကဵုဒၟံၚ်တုဲ ကမၠောန်သွံရာန်ထၜိုတ်တံ ဒးဂဗဒၟံၚ်ကဵု အကာဲအရာ ဒးဒေါအ်ဇူလဝ်ရ။
တၠကမၠောန်ထၜိုတ်မွဲတၠဂှ် စနူကဵုတၠကမၠောန်တံဂှ် ၜိုတ်နွံပၟိက် ပ္တိတ်မလှုဲဟွံဂွံမွဲသာ် ပ္တိတ်ဂွံဒၟံၚ်ညိညရတုဲ ဒးဒေါအ်ဇူလဝ် ပရေၚ်သွံရာန်ထၜိုတ်တံရောၚ်ဂှ် ဟီုရ။
“အကာဲအရာတိုက်သြန်ဂှ်တှ်ေ ဟွံဒှ်သွံရာန်အိုတ်ပုဟ်။ ပ္တိတ်လှုဲ ဂၠိုၚ်ၚ်ဟွံဂွံပုဟ်။ တၠကမၠောန်ဂှ်လေဝ် ပ္တိတ်ဟွံဂွံပုဟ်။ ညိညရဂွံ။ အေ ဂှ်တှ်ေ ၚုဟ်မး ရာန်ကေတ်ဒၟံၚ်ထၜိုတ်တံဂှ် သၠုၚ်တုဲ ကဵုလှုဲနူဗာန်ဍေံတံ ပ္တိတ်လဝ်တံဂှ် ကၠောန်သ္ပသွံရာန် ဟွံပြေပြံၚ်အိုတ်ပုဟ်။ မွဲတၠဂှ် ၂၀ ကိုဋ်၊ ၃၀ ကိုဋ် ပ္တိတ်ကဵုဒၟံၚ်ၜိုတ်ဏံရတုဲ သွံရာန်ထၜိုတ် ကၠောန်ဟွံဂွံရပုဟ်” သာ်ဝွံ သ္ဂးရ။
မွဲလ္ပာ်ဂှ်ပၠန် တၠကမၠောန်ထၜိုတ်တံဝွံ ပ္ဍဲဒၞါဲပလံၚ်ဗစိုပ်သွံရာန် ထၜိုတ်တံဂှ် ပ္ဍဲကဵုသၞေဟ်ကၚ်စၟဳတ် သၟဝ်တဲကံၚ်ဇြဳပၞာန်တံ ဗွဲမဂၠိုၚ်ဂှ် လိက်တၞးထံက်ဂလာန်ဟွံပါမ္ဂး ဟွံဂွံအခေါၚ်တတ်ကၠောံအာကၠုၚ်ပွိုၚ်ဍုၚ်တုဲ ရပ်ဒက်ဒၟံၚ်ဂှ်ရ သွက်ဂွံယိုက်ဏာနၚ်ဂှ် အခက်အခုဲနွံကၠုၚ်ရ။
တၠကမၠောန်ထၜိုတ်မွဲတၠဂှ် ဗၞိက်ပ္တိတ်ပရေၚ်သွံရာန်ဗၞိက်တံဝွံ အခေါၚ်သွံတြးပလံၚ်ဗစိုပ် ဗွဲမဗၠးၜး အတိုၚ်သၞောဝ်ဂှ် နွံကီုလေဝ် ဟိုတ်နူအမိၚ် ကဆံၚ်တွဵုရး ကေုာံ ကဆံၚ်ရးဒေသ ကံၚ်ဇြဳပၞာန်တံဂှ်တုဲ ပ္ဍဲဒၞါဲပလံၚ်ဗစိုပ်တံဂှ် အခက်အခုဲနွံကၠုၚ်ရောၚ် ဟီုရ။
“ဇၟာပ်ပ်သၞေဟ်ကၚ်ဂှ် ကၠာတေံတှ်ေ လ္ဂောံကဵုဥပဒေ ဗၞိက်ပ္တိတ်ပရေၚ်တဵုလွဳမ္ဂး အခေါၚ်သွံတြးဏာနၚ် ဗွဲမဗၠးၜး နွံကီုလေဝ် လိက်ပၟိၚ် နူတွဵုရး၊ ရးဒေသဇၞော်တံ နွံဒၟံၚ်တုဲ ပ္ဍဲဒၞါဲပလံၚ်ဗစိုပ်ဏာနၚ်တံဂှ် တန်တဴကဵုလိက် ညိညတုဲ ပြသၞာဒးကဵုကေတ်ကၠုၚ် အပ္ဍဲသၞေဟ်ကၚ်တံ နွံကၠုၚ်ရ” သာ်ဝွံ သ္ဂးရ။
ပ္ဍဲဒၞါဲပလံၚ်ဗစိုပ်ထၜိုတ်တံဂှ် ယဝ်ရလိက်တၞးသက်သဳ ဟွံခိုၚ်ကၠိုက်မ္ဂး သၞေဟ်ကၚ်စၟဳတ်ကံၚ်ဇြဳပၞာန်တံ အာတ်မိက်ဒၟံၚ်သြန် ဗွဲမဂၠိုၚ်ဂၠေၚ်ဂှ်ရ ခရိတ်ပလံၚ်ဗစိုပ်တံ ဒးအိုတ်ဂၠိုၚ်တုဲ ပရဲပရာအောန်တုဲ ဒးဒေါအ်ဒေၚ်ဒၟံၚ် ပရေၚ်သွံရာန်တံရောၚ်ဂှ် ညးဆက်ဟီုရ။
သ္အာၚ်နူဂှ်ပၠန် အခိၚ်ကာလလၟုဟ်ဝွံ ဒှ်အခိၚ်ဇူထၜိုတ်ဂှ်ရ ထၜိုတ်မွဲပံၚ် ဂွံဒၟံၚ်ၚုဟ် စဵုကဵု ၂၄၀၀ ဒ္ကေဝ်ကီုလေဝ် ဟိုတ်နူအခက်အခုဲ ပ္တိတ်လှုဲ ပ္ဍဲကဵုဗာန်တံဂှ်တုဲ ပရေၚ်သွံရာန်တံ ဒေါအ်ဒေၚ်ဒၟံၚ်ရ။
ထၜိုတ်တိတ်နူတွဵုရးတံဂှ် ဍုၚ်ကြုက် ရာန်ဒၟံၚ်ဂၠိုၚ်အိုတ်တုဲ ဟိုတ်နူအခက်အခုဲ ပရေၚ်ပလံၚ်ဗစိုပ်တံကဵု အခက်အခုဲ ပ္တိတ်သြန်ဗာန်တံဂှ်တုဲ ပွမပလံၚ်ပ္တိုန်ထၜိုတ်တံဂှ်လေဝ် ယအ်စှ်ေကၠုၚ် တီတီဂှ် တၠကမၠောန်ဂမၠိုၚ် ဟီုရ။
တွဵုရးဍုၚ်မန်ဝွံ လ္ဂောံကဵုဗ္ၜတ်ကၟိန်ဍုၚ်မ္ဂး ဒှ်တွဵုရးတဵုလွဳ ထၜိုတ်ဂၠိုၚ်အိုတ်မွဲတုဲ တဵုထၜိုတ်ဂှ်တှ်ေ မသုန်ကိုဋ်ဨကပြၚ် နွံတုဲ လၟေၚ်သၞာံ လျိုၚ်တာန်ထၜိုတ် တိတ်ဒၟံၚ်မွဲကိုဋ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−TLT