မတ်မလီု၊ ဂျူလာၚ် ၁၄
ပ္ဍဲတိဍာ်အုပ်ဓုပ်ကဝ်တူလေဝ် ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တံတုဲ အပ္ဍဲကဝက်သၞာံဏံ ညးဍုၚ်ကွာန်ကောန်အရာပ် ၁၃၀ ပြၚ် ဒးချိုတ်အာလဝ်တုဲ ဗ္ဒါဲ ၁၀၀ ဒးဒုၚ်ရပ်လဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ်ရ။
ပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုဂျောန်အိုတ် ပ္ဍဲတိဍာ်အုပ်ဓုပ်ကဝ်တူလေဝ်ဂှ် ဒပ်ကံၚ်ဇြဳပၞာန် ဗ္တိုက်ပန်ပှော်လွဟ်ဇၞော် နကဵုဒရုၚ်၊ နကဵုက္ၜၚ်ကျာ လ္တူညးဍုၚ်ကွာန်တံဂှ်ကီု၊ ဒုဟ်ဒဏ်ဟွံမွဲမွဲသာ် ပန်ဂစိုတ်ကဵုသေနာတ်၊ တိုပ်ပစူလဝ်မာၚ်တံ ဒှ်တမ် ကလိလောန်လဝ် ပွဖံက်ပ္ကဝ်အခေါၚ်အရာမၞိဟ် ဟွံအောန်နူကဵု ၂၃၀၀ ရောၚ် လလောၚ်ပ္တိတ်လဝ်ရ။
ဟိုတ်နူဒပ်ကံၚ်ဇြဳပၞာန် ကလိလောန်လဝ် ပွဖံက်ပ္ကဝ်အခေါၚ်အရာမၞိဟ်နနဲနာနာသာ်ဂှ်ရ ညးဍုၚ်ကွာန်ဒေသ ၉၆ တၠ ဒးဒုၚ်ရပ်လဝ်တုဲ ၁၃၄ တၠ ဒးချိုတ်လဝ်တုဲ ၄၃၉ တၠ ဇီုကပိုက်ကလိဂွံလဝ်ဝပ်ရောၚ် KNU သ္ဂးရ။
သ္အာၚ်နူဂှ်ပၠန် ဘာကျာ် ၆ ဘာ၊ ဘာလကျာ် ၂၃ ဘာ၊ ဘာဗ္တောန်လိက် ၁၄ ဘာ၊ ဗ္ဒမ်ကဵုဂဥုဲ ၂ မ၊ ရုၚ်ဂဥုဲ ၂ မ မပါလုပ် သ္ၚိဒၟံၚ်ဟွံအောန်နူကဵု ၁၀၂၄ မ ဇီုကပိုက်ဒးလီုလာ်အာလဝ်တုဲ ညးဍုၚ်ကွာန် ၇ တၠ ဒးဒုၚ်စကာလဝ် နဒဒှ်ရဲထ္ၜးဂၠံၚ်ပဝ်တာ အတေၚ်အဓမ္မရောၚ် ပါလုပ် ပ္ဍဲတၚ်လလောၚ်တြးဂှ်ရ။
စွံပွန် လ္တူညးဍုၚ်ကွာန်တံသာ်ဏံတုဲ နကဵုတၚ်ရန်တၟံနွံနွံ ကလိလောန်ဒၟံၚ် ပြဝပကီုပရာပ် ကလိလောန်ဒၟံၚ် အခေါၚ်အရာညးဍုၚ်ကွာန်တံဂှ်တုဲ အပ္ဍဲကာလသီအဝဵုဏံ ညးဍုၚ်ကွာန်ဒးဂြိပ်ဒဴပါဲဒလေတ်ဒၟံၚ် မွဲပြကောဋိကိုဋ်ပြၚ် နွံကၠုၚ်လဝ်ရ။
သ္အာၚ်နူဂှ်ပၠန် ပ္ဍဲတိဍာ်အုပ်ဓုပ်ကဝ်တူလေဝ်ဂှ် အကြာဒပ်ပံၚ်ကောံပၠန်ဂတး KNLA KNDO တံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ဍောတ် ပေါဲဗ္တိုက်ဇၞော် က္တဵုဒှ်လဝ် ၁၈၂၇ ဝါတုဲ လ္ပာ်ကံၚ်ဇြဳပၞာန် ၁၉၀၃ တၠ ချိုတ်တုဲ ၁၂၇၅ တၠ ဇီုကပိုက်ကလိဂွံလဝ်ဝပ်ရောၚ် သ္ဂးရ။
အပ္ဍဲပေါဲဗ္တိုက်ဏံ ဒပ်ပၠန်ဂတးဗၠးၜးကောန်ဂကူကရေၚ် KNLA, KNDO တံ မပါလုပ် လ္ပာ်ဒပ်ပံၚ်ကောံ ပၠန်ဂတးတံလေဝ် ၈၁ တၠ ပြဟ်လလုဲအာလဝ်တုဲ ၂၉၈ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG