လံၚ်လုၚ်၊ ဂျူလာၚ် ၁၄
ဒပ်ကံၚ်ဇြဳပၞာန် ဟိုတ်နူထ္ပက်ကရောၚ်ပၞာန် လုပ်စိုပ်ကၠုၚ် လ္ပာ်ကွာန်မေန်ယိတ် ပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသပါဲဒလေတ်ဘဲပၞာန်တံရ။
ဒပ်ကံၚ်ဇြဳပၞာန်ဝွံ စနူဂိတုဂျူလာၚ် ၁၃ အခိၚ်နူဂယး တုဲကၠုၚ်တေံဂှ်တုဲ ထ္ပက်ကရောၚ်ပၞာန်ၜါကရောၚ်တုဲ ထ္ပက်ကၠုၚ် လ္ပာ်ကွာန်မေန်ယိတ်ဂှ်ရ ညးဍုၚ်ကွာန်ဒၟံၚ်ကွာန်ရး မွဲဒမြိပ်ဂှ်ဂမၠိုၚ် ဒးဂြိပ်ဒဴပါဲဒလေတ်ဒၟံၚ်အိုတ်ရ။
ဟိုတ်နူကရောၚ်ပၞာန်လုပ်ကၠုၚ်တုဲ ညးဒေသဂၠိုၚ်ကဵုလ္ၚီ နူကွာန်မေန်ယိတ်၊ တေဝ်ပုၚ်၊ ကုန်သာယာ၊ တဗျာ၊ ပါန်နေဝ်လေဝ် ကေုာံ ကွာန်အေန်သံက်တံ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ညးဒေသပါဲဘဲပၞာန်ဂမၠိုၚ်ဝွံ အခိၚ်လၟုဟ် ဒးပါဲဒလေတ်ကၠုၚ် လ္တူဍုၚ်လံၚ်လုၚ်ကဵု ဒၞါဲဗၠးဘဲတံဂှ် ကာမံက်တိုန်တုဲ နွံပၟိက်ဒၟံၚ် သီုကဵုအရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် သ္ဂးရ။
အတိုၚ်ဂလာန် ညးဒေသပါဲဒဴဘဲပၞာန်တံဂှ်မ္ဂး ကရောၚ်ပၞာန်ဏံဝွံ အပ္ဍဲပေါဲဗ္တိုက်ကွာန်တဗျာ မက္တဵုဒှ်လဝ် တ္ၚဲတုဲကၠုၚ်တေံဂှ် ဟိုတ်နူဒးဂိလဝ်ဂှ်ရ ဗပေၚ်ဇြဟတ်တုဲ ထပ်ထ္ပက်ကၠုၚ်ကရောၚ်ပၞာန်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုဂျူလာၚ် ၁၀ တေံ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်တဗျာကဵု ဒပ်ပံၚ်ကောံစဵုဒၞါဒေသတံဂှ် က္တဵုဒှ်လဝ်ပေါဲဗ္တိုက်တုဲ လ္ပာ်ကံၚ်ဇြဳပၞာန် ဟွံအောန်နူကဵု ၃ တၠ ချိုတ်အာလဝ်ရ။
အပ္ဍဲပေါဲဗ္တိုက်ဏံ (မသက်ထားစံ) ကော် ဝိုၚ်ၚ်လေဝ် အာယုက် ၁၄ သၞာံ ဒၟံၚ်ကွာန်တဗျာ တိတ်ကၠုၚ်နူကဵုကတိုၚ်ပါဲဗုမ်ဂှ်ဝွံ ဟိုတ်နူဒးဒုၚ်ပန်ဂစိုတ်လဝ် ကဵုဒပ်ကံၚ်ဇြဳပၞာန် နမသက္ကုဟိုတ်ဂှ်ရ ချိုတ်အာလဝ်ရောၚ် ဂွံတီကေတ်ရ။
အတိုၚ်လိက်ဒုၚ်စဳရေၚ် ဂကောံသုတေသနဖျေံသ္ဇိုၚ်ဒေသ FE5 Tanintharyi လလောၚ်ပ္တိတ်လဝ် ပ္ဍဲဂိတုဂျောန် ၁၂ ဂှ်မ္ဂး ပ္ဍဲရးတၞၚ်သဳ ပေါဲဗ္တိုက်တံ ကလေၚ်သ္ကာတ်မြဟ်ကၠုၚ်ဂှ် ညးဒဒိုက်ပါဲဒဴဘဲပၞာန် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံကၠုၚ်လဝ် စဵုကဵုဗ္ဒါဲတြဴဠက်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ