ဇြပ်ဗု၊ ဂျူလာၚ် ၁၇
အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်ဗဒိုပ်ဇၞော် ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ် သီုၜါလ္ပာ်ဇီုကပိုက်ချိုတ်တံ နွံလဝ်ရောၚ် ဂွံတီကေတ် ဇရေၚ်ကရောၚ်ပၞာန်ဒံၚ်ညဵု ဒပ်ပၞာန်စဵုဒၞါညးဍုၚ်ကွာန် PDF ရ။
ပ္ဍဲဂိတုဂျူလာၚ် ၁၅ အခိၚ်လဒေါဝ်တ္ၚဲ ၜိုတ် ၁ နာဍဳဂှ် ဒပ်ကံၚ်ဇြဳပၞာန် ဇြဟတ်ဒပ် ၁၀၀ ပြၚ်ပါဂှ် ထ္ပက်ကၠုၚ်ကရောၚ်ပၞာန်တုဲ ပေါဲဗ္တိုက်ၜါလ္ပာ်က္တဵုဒှ်လဝ် လလအ်ပွိုၚ် ၂၀ မိနေတ်ရ။
ကၠာပေါဲဗ္တိုက်ဟွံဂွံဒှ်ဏီ ကောန်သ္ဂံၚ်ကရောၚ်ပၞာန်ဒံၚ်ညဵု အာသၟာန်သၟုက်ပရိုၚ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ကဵု မၞိဟ်တြုံ ကဵုပရိုၚ်မွဲတၠ ဒးဒုၚ်ရပ်ဒက်တုဲ ဒးဒုၚ်ဂစိုတ်လဝ်ရ။
ကြဴနူဂှ်တုဲ ထပ်ထ္ပက်ကၠုၚ်ကရောၚ်ပၞာန်ဂှ်ရ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံကရောၚ်ပၞာန်ဒံၚ်ညဵုတံဂှ် ပေါဲဗ္တိုက်ၜါလ္ပာ်တံ က္တဵုဒှ်လဝ်တုဲ လ္ပာ်ကံၚ်ဇြဳပၞာန် ပိတၠ ချိုတ်တုဲ မသုန်တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်ဂလာန် ညးတာလျိုၚ် ကရောၚ်ပၞာန်ဒံၚ်ညဵုရ။
ကြဴနူပေါဲဗ္တိုက်တုဲဂှ် ကရောၚ်ပၞာန်ကံၚ်ဇြဳပၞာန်ဝွံ ဆက်ချဳဒရာၚ်ဒၟံၚ် ပ္ဍဲကွာန်(စခန်းကြီး) ကဵု ကွာန်သက္ကောတံဂှ်ရ ညးဍုၚ်ကွာန်ဒေသလ္ၚဵု ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ကောန်သ္ဂံၚ်မွဲတၠကဵု မၞိဟ်တြုံကဵုပရိုၚ်မွဲတၠ ဂဗကဵုကရောၚ်ပၞာန်တုဲ ဒးဒုၚ်ရပ်ဒက်ဂစိုတ်ထောံလဝ်ဂှ် ဇွညးတံဂှ် ညးဍုၚ်ကွာန်ဒေသလ္ၚဵု ကၠုၚ်စိုပ်ကပှ်ဏာလဝ် အခိၚ်ဇိုၚ်သဝ်တ္ၚဲဂှ် ဂွံတီကေတ်ရ။
ပ္ဍဲချာန်နေဝ်ထလဳဂရာမ် ရဲထံက်ဂလာန်ဒပ်ပၞာန်တံဂှ် အပ္ဍဲပေါဲဗ္တိုက်ဂှ် ကောန်သ္ဂံၚ် PDF ၜါတၠ ချိုတ်တုဲ လ္ပာ်ညးတံ ဇီုကပိုက်ချိုတ် ဟွံမွဲပုဟ်ဂှ် တြးဝါဒချူထ္မံက်ထ္ၜးဒၟံၚ်တံ နွံဒၟံၚ်ရ။
ပ္ဍဲပွိုၚ်ဍုၚ်ဇြပ်ဗုဂှ်တှ်ေ ဒပ်ကံၚ်ဇြဳပၞာန်ဝွံ စနူဂိတုဏံမံက်တုဲ နကဵုဟိုတ်ၚးတးတိဍာ်ဂှ် ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ်ဒၟံၚ် ပ္ဍဲဒေသ ဒပ်ပံၚ်ကောံ ဂကောံဇြဟတ်ပၠန်ဂတးတံ ထိၚ်ဒက်တံဂှ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဵု