ကျာ်ဍုၚ်၊ ဂျူလာၚ် ၁၇
အပ္ဍဲကာလသီအဝဵုဏံ ပ္ဍဲဍုၚ်ပရေၚ်အုပ်ဓုပ်ကံၚ်ဇြဳပၞာန် လီုအာတံဂှ် သွက်ဂွံထိၚ်ဒက်အာဗွဲမစှ်ေကဵုသၞောတ်ကဵု သွက်ဂွံစအာ ယန္တယာပရေၚ်အုပ်ဓုပ် KNU ဂှ် ကၠောန်ဒၟံၚ်ပရေၚ်ပလေဝ်ပလေတ်တံရောၚ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်ကလာသေ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
KNU ဝွံ အပ္ဍဲကာလသီအဝဵုဏံ အပ္ဍဲတွဵုရးကရေၚ်ဂှ် သီဂွံလဝ် ဍုၚ်ကျာ်ဍုၚ်၊ ဍုၚ်သုကလိ၊ ဍုၚ်ကျာ်ပိ ကေုာံ ဍုၚ်ဘာပန်တံဂှ်တုဲ ပ္ဍဲကဵုဏံ ဍုၚ်လ္ၚဵုတံဂှ်တှ်ေ ဗ္ဒိုပ်ဒပ်ကံၚ်ဇြဳပၞာန်တံ သှ်ေဒၟံၚ်ဖိုဟ်ရ။
ပ္ဍဲဍုၚ်ကျာ်ဍုၚ်ဂှ် ဗ္ဒိုပ်ဒပ်ကံၚ်ဇြဳပၞာန် ဟွံမွဲလးလးရတုဲ ဗ္ဒါဲသုကလိ၊ ကျာ်ပိ၊ ဍုၚ်ဘာပန်တံဂှ် ဗ္ဒိုပ်ဒပ်ကံၚ်ဇြဳပၞာန်လ္ၚဵု သှ်ေဒၟံၚ်ဏီကီုလေဝ် ယန္တယာပရေၚ်အုပ်ဓုပ်ကံၚ်ဇြဳပၞာန် လီုအာယျ မဒှ်ရ။
သ္အာၚ်နူဂှ်ပၠန် အပ္ဍဲတိဍာ်အုပ်ဓုပ် KNU ဒပ်မဟာ သီုထပှ်ဒပ်တံဂှ်လေဝ် ကၟာတ်လဒဵုထိၚ်ဒက်လဝ် ဗ္ဒိုပ်ဒပ်ကံၚ်ဇြဳပၞာန် ဗွဲမဂၠိုၚ်ဂှ်တုဲ ပ္တိတ်ဒၟံၚ်ဇြဟတ် သွက်ဂွံဒက်ပ္တန်အာ ယန္တယာပရေၚ်အုပ်ဓုပ် KNU ရ။
“ဍုၚ်ပရေၚ်အုပ်ဓုပ် လ္ပာ်ကံၚ်ဇြဳပၞာန်တံ လီုအာတံဂှ်တှ်ေ လ္ပာ်ပိုယ်တံ သွက်ဂွံထိၚ်ဒက် ဗွဲမစှ်ေကဵုသၞောတ်မာန် သွက်ဂွံကောပ်ကာဲဗွဲမစှ်ေကဵုသၞောတ်မာန်ဂှ် နွံပၟိက်ဒၟံၚ်ဏောၚ်။ သွက်ဂွံကောပ်ကာဲသာ်ဏံမာန်ဂှ် နကဵုသၞောဝ် နကဵုလၟေၚ်ကမၠောန် လ္ပာ်ပဝ်လသဳတံဂှ်တှ်ေ ဒးပလေဝ်ပလေတ် အဓိကဏောၚ်။ ပလေဝ်ပလေတ်သာ်ဏံတုဲဗက် ဂွံအာဗွဲမစှ်ေကဵုသၞောတ်ဂွံဂှ်လေဝ် လ္ပာ်ပိုယ်တံ ပလေဝ်ပလေတ်လဝ်ဂှ် မိက်ဂွံဟီု အဓိကရ” သာ်ဝွံ ပဒိုဝ်သဝ်ကလာသေ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဟီုရ။
တုဲကၠုၚ် ပ္ဍဲဂိတုဂျောန်အိုတ်ဂှ်လေဝ် ဒပ်မဟာ ၆ ခရိုၚ်ဒူပလာယာ KNU ပ္ဍဲအရာရေၚ်တၠုၚ် ကမၠောန်ပရေၚ်အုပ်ဓုပ်တံဂှ် အရာမထုဲထံၚ် ဗွဲမဂၠိုၚ် က္တဵုဒှ်ဒၟံၚ်ဂှ်တုဲ လၟေၚ်ကမၠောန်ပရေၚ်အုပ်ဓုပ် ညံၚ်အရာမထုဲထံၚ်တံ ဟွံဂွံမွဲဂှ် နကဵုညးယိုက်ဝန်သၟဝ်တဲ ကံၚ်ဇြဳပၞာန်တံ သီုဖအိုတ် သွက်ဂွံနုက်တိတ် ပြံၚ်ဆုဲဂှ်ကီု၊ ကဵုဇြဟတ်ထံက်ဂလာန် ကုကံၚ်ဇြဳပၞာန်တံဂှ် ညံၚ်ဟွံဂွံကၠောန်သ္ပတုဲ သွက်ဂွံပံၚ်တောဲရေၚ်တၠုၚ် ကု KNU ဂှ် လလောၚ်ပ္တိတ်ကဵုလဝ်သမ္တီရ။
အခိၚ်လၟုဟ် ပ္ဍဲတိဍာ်အုပ်ဓုပ် KNU ဂှ် ဒပ်ပံၚ်ကောံပၠန်ဂတး နူကဵုဒပ်ပၠန်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကတံကဵု အကြာဒပ်ကံၚ်ဇြဳပၞာန်တံဂှ် ပေါဲဗ္တိုက်ပရေၚ်ပၞာန်တံ ဆက်က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန် ရပ်စပ်က္ၜၚ်ကျာ ကေုာံ လွဟ်ဇၞော် သီုအရီုဗၚ်ဒရုၚ်တံဂှ်တုဲ ပန်ပှော်ဗ္တိုက်ဒၟံၚ် လ္တူကွာန်ရးတံဂှ် ကၠောန်သ္ပဒၟံၚ် အရိုဟ်ဒဒှ်တ္ၚဲရ။
ပဒိုဝ်သဝ်ကလာသေ ဂှ်တှ်ေ ယန္တယာပရေၚ်အုပ်ဓုပ် KNU ဂွံစမာန်ဂှ် ဗ္ဒိုပ်ဒပ်ကံၚ်ဇြဳပၞာန် နူဍုၚ်သှ်ေဒၟံၚ် နဒဒှ်ဒပ်မၚ်ဍုၚ်တံ သွက်ဂွံတိတ်စ္ဍးအာအိုတ်ဂှ် ဆက်ကဵုအာဇြဟတ်ဂရိုဟ်ဏောၚ် ဟီုရ။
“ ဒၞါဲလ္ၚဵုတံဂှ်ဟီုတှ်ေ ဥပမာ ဗီုကဵုဒပ်မၚ်ဍုၚ် ကံၚ်ဇြဳပၞာန်တံရ။ ဒပ်မၚ်ဍုၚ်ဍေံတံ ဟွံမွဲမ္ဂး ပိုယ်တံ ပရေၚ်ကောပ်ကာဲ ကေုာံ အကာဲအရာကာမံက်တိုန်တံလေဝ် ကၠောန်ဒၟံၚ်ဟီုဂှ် မိက်ဂွံဟီုရ။ ဒပ်မၚ်ဍုၚ် ကံၚ်ဇြဳပၞာန်တံ ဟွံတိတ်ဏီပုဟ်ဟီုမ္ဂးလေဝ် ညံၚ်ဗ္ဒိုပ်ဒပ်ဏံ ဂွံတိတ်အာဂှ် ပိုယ်တံ ဒးဆက်ရေၚ်တၠုၚ်ဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဟိုတ်နူပရေၚ်ပၞာန်သီအဝဵုတုဲ အပ္ဍဲကဵုပၠန်ဂတးရပ်လွဟ် မံက်ဂတဝ်ကၠုၚ်ဂှ် ဒးဆောံလေၚ်လဝ် ဍုၚ် ၇၀ ပြၚ်တုဲ မ္ၚးနူကဵုဒးဗလးလဝ်တဲ ဗ္ဒိုပ်ဒပ်ဂၠိုၚ်ကဵုကၠံဂှ် ဇြဟတ်ပရေၚ်ဗ္တိုက် ဗွဲမဂၠိုၚ်ဂၠေၚ် ဒးလေၚ်ဒိုက်အာလဝ်ရ။
ဆ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဒးဆက်ဗလးဒၟံၚ်တဲ ကုဍုၚ်ဇၞော်တံဂှ် ကံက်စရၚ်မၞိဟ်သ္ဂာဗ္တံတုဲမ္ဂး ပ္ဍဲသၞာံ ၂၀၂၅ ကၠုၚ်စိုပ်ဏံ ကၠောန်ဗဒှ်အာပေါဲရုဲဏောၚ်ဂှ် ဟီုဂးလဝ်ရ။
ကံၚ်ဇြဳပၞာန် ပံက်လဝ်မုက်ပၞာန် အလုံဍုၚ်မွဲဂှ်ဝွံ အခိၚ်လၟုဟ်လေဝ် ဒးဆက်ဆေၚ်ဒၟံၚ်မုက် ကုပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ်တုဲ အပ္ဍဲပရေၚ်ပၞာန်ဏံဂှ် ဒးဗလးလဝ်တဲ ဍုၚ်နံၚ်ချဵု နဒဒှ်ဍုၚ်ကၠာအိုတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU