မတ်မလီု၊ ဂျူလာၚ် ၁၈
ပ္ဍဲကဵုပေါဲဗ္တိုက် ရးသေံသ္ကုတ်သၟဝ်ကျာ ကလေၚ်မွဲဝါပၠန်ဏံဂှ် ကောန်ဒပ်ကံၚ်ဇြဳပၞာန် ဖျေံကၠုၚ်လွဟ်တံဂှ် တန်တဴကဵုဂကူလွဟ်ကေတ်နၚ်တံဂှ်တုဲ ဖျေံအာလာဘ် နူ ၁၀ ကိုဋ်ဒ္ကေဝ် စဵုကဵုမွဲဠက်ကိုဋ်ဒ္ကေဝ်ဏောၚ်ဂှ် ဂကောံကဝ်က MNDAA လလောၚ်ပ္တိတ်လဝ် ပ္ဍဲဂိတုဂျူလာၚ် ၁၆ တေံရ။
ပ္ဍဲဒပ်ကံၚ်ဇြဳပၞာန်ဂှ် နူကောန်ပၞာန် စဵုကဵုကဆံၚ်ဗိုလ်ဇၞော် အတိုၚ်ပၟိက်ဆန္ဒဇကု ဖျေံကၠုၚ်လွဟ်တံဂှ် ဒုၚ်အာလျိုၚ်ကုလမျီုပေၚ်ၚ် သီုကဵုပရေၚ်ဗ္စာရဏာမၞိဟ်တံဂှ်တုဲ အတိုၚ်ဌာနန္တရခုတ်ပ္တန်လဝ်ဂှ် ဖျေံအာလာပ် နူ ၁၀ ကိုဋ်ဒ္ကေဝ် စဵုကဵု ၃၅ ကိုဋ်ဒ္ကေဝ်ဏောၚ် သ္ဂးရ။
ညးမကေတ်နၚ်လွဟ်ဇၞော် ကံၚ်ဇြဳပၞာန်တံ၊ ညးသီစွံလဝ်လွဟ်ဇၞော် အပ္ဍဲဗ္ဒိုပ် ခိုဟ်ဟ်တုဲ ဖျေံကၠုၚ်လွဟ်တံ ကေုာံ ညံၚ်ဒပ်ကံၚ်ဇြဳပၞာန် ရပ်စပ်ဟွံဂွံ ပလီုပလာ်လဝ်တုဲ မၞိဟ်ဖျေံကၠုၚ်လွဟ်တံဂှ်လေဝ် ဖျေံအာလာပ်ဏောၚ်ဂှ် MNDAA လလောၚ်တြးလဝ်ရ။
သ္အာၚ်နူဂှ်ပၠန် ညးမကေတ်နၚ် ကွဳစၚ်ခြပ်ပသဲ ကံၚ်ဇြဳပၞာန် ကေုာံ ကိရိယာပၞာန်ဇၞော်ဇၞော် သွက်သ္ဂောံရပ်စပ် ပ္ဍဲဂၠံၚ်ကုန်တံဂှ် ဖျေံအာလာဘ် သြန်မွဲလ္ၚီကိုဋ်ဏောၚ်တုဲ ယဝ်ရကေတ်နၚ် က္ၜၚ်ကျာသၞေၚ်ဝဲ၊ က္ၜၚ်ကျာပလံၚ်ဗစိုပ် ကေုာံ က္ၜၚ်ကျာဂကူတၞဟ်သ္အာၚ်တံဂှ်မ္ဂး ဖျေံအာလာဘ် သြန်မွဲဠက်ကိုဋ်ဒ္ကေဝ်ဏောၚ်ဂှ် လလောၚ်တြးလဝ်ရ။
ဟိုတ်ဂှ်ရ နကဵုကောန်ဒပ်ကံၚ်ဇြဳပၞာန်ဂမၠိုၚ် ထောံလသာဒပ်ပၞာန်သီအဝဵုတုဲ သွက်ဂွံလုပ်စိုပ်ဖျေံလွဟ်အိုတ်ဂှ်ကီု၊ မၞိဟ်လုပ်စိုပ်ဖျေံကၠုၚ်လွဟ်တံဂှ်လေဝ် ဖျေံအာလာဘ်သ္ကာတံဏောၚ်ဂှ်ရ သွက်ဂွံကလေၚ်လုပ်စိုပ်ကၠုၚ် ဇရေၚ်ဂၠံသြိုဟ်ညးဍုၚ်ကွာန်တံဂှ် MNDAA ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MNDAA/MDY PDF