ကျာ်ထဝ်၊ ဂျူလာၚ် ၁၈
တွဵုရးဍုၚ်မန် ပွိုၚ်ဍုၚ်ကျာ်ထဝ် လ္တူဍုၚ်ဒုၚ်ဇယိတ် အရာပ်စၟတ် (၁) ဂှ် ဟိုတ်နူမကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်လဝ် ဒတုံဗ္တိုဟ်ထ္ကးအာလဝ်တုဲ ကောန်အရာပ်ၜါတၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျူလာၚ် ၁၆ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဝိုက်ဂှ် ဒပ်အမၠံက် စၟတ် ၃၁၀ ဖျေံသ္ဇိုၚ်ဒုၚ်သယိတ်ဂှ် ပေါဲဗ္တိုက်ဟွံမွဲမွဲသာ် ပန်ပှော်စုတ်လဝ်လွဟ်ဇၞော် ကြာန်န်တုဲ ဒတုံဗ္တိုဟ်ထ္ကးအာလဝ် ပ္ဍဲစက်ဆုပူဂဵု နွံအရာပ်စၟတ် (၁) ဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ အ္စာစက်ဆု ဥူဇြဝ်အံၚ် အာယုက် ၄၀ သၞာံကဵု ကောန်စက်ဆု ကိုဝ်ဟုၚ်ဝေအံၚ် အာယုက် ၂၀ သၞာံတံဝွံ ကလိဂွံလဝ်ဝပ် ပ္ဍဲကဵုသြိုဟ်၊ ထာၚ်ဒဳ ကေုာံ ပ္ဍဲကဵုတဲတံရ။
ပ္ဍဲကဵုဇီုကပိုက်ဒးလွဟ်ဇၞော်တုဲ ကလိဂွံလဝ်ဝပ်ဂှ် ဥူဇြဝ်အံၚ်ဝွံ ဒးဂွိၚ်ဒၟံၚ်ကဵုအန္တရာယ်လမျီုတုဲ ဒးလွဳဒၟံၚ် ပ္ဍဲရုၚ်ဂဥုဲဗဂေါ ကာတၟေၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ဒပ်စဵုဒၞါညးဍုၚ်ကွာန် PDF တံ ပန်ပှော်လဝ်လွဟ်ဇၞော်ဏံဏောၚ် ပ္ဍဲချာန်နေဝ်ထလဳဂရာမ် ရဲထံက်ဂလာန်ဒပ်ပၞာန်တံဂှ် တြးဝါဒချူထ္မံက်ထ္ၜးဒၟံၚ်တံ နွံဒၟံၚ်ရ။
ညးတာလျိုၚ် ဂကောံဇြဟတ်ပၠန်ဂတး ဖျေံသ္ဇိုၚ်ကျာ်ထဝ်မွဲတၠဂှ် လ္ပာ်ကံၚ်ဇြဳပၞာန်တံ ကလိလောန်လဝ် ပရေၚ်ပန်ပှော်လွဟ်ဇၞော်တံတုဲ ပ္ဍဲကဵုတ္ၚဲဂှ်ဂှ် က္တဵုဒှ်လဝ်ပေါဲဗ္တိုက်လေဝ် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်ကျာ်ထဝ်ဂှ် စနူသၞာံဏံမံက်တုဲ အရိုဟ်ဒဒှ်တ္ၚဲ ကံၚ်ဇြဳပၞာန်သီအဝဵုတံ ပန်ပှော်ဒၟံၚ်လွဟ်ဇၞော် ပ္ဍဲကွာန်ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ်တုဲ ကောန်အရာပ်ဇီုကပိုက်ချိုတ်တံ နွံဒၟံၚ်ရ။
တုဲကၠုၚ် ပ္ဍဲဂိတုဂျူလာၚ် ၆ တေံဂှ်လေဝ် ပ္ဍဲကဵုပွိုၚ်ဍုၚ်ကျာ်ထဝ် ကွာန်(ငှက်ပျောတော) ဂှ် ဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော်တုဲ ညးဒေသတြဴတၠ ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်မ္ဂး ပ္ဍဲတွဵုရးဍုၚ်မန်ဂှ် ပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုဂျောန် အပ္ဍဲပွိုၚ်တြဴဂိတုဏံ ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော် ကေုာံ မာၚ်တိုပ်တိတံဂှ်တုဲ ကောန်အရာပ် ၇၂ တၠ ချိုတ်တုဲ ၁၃၈ တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ