ရေဝ်၊ ဂျူလာၚ် ၂၆
ဒပ်ကံၚ်ဇြဳပၞာန် ပအပ်ကဵုလဝ်လွဟ် ကုဂကောံပၞာန်ညးဍုၚ်ကွာန်အရုတ်တံၚ် ဂကောံကွာန်အရုတ်တံၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ်ရောၚ် ချူထ္မံက်ထ္ၜးလဝ် ပ္ဍဲချာန်နေဝ်ထလဳဂရာန် ရဲထံက်ဂလာန်ဒပ်ပၞာန်တံရ။
ဂကောံပၞာန်ညးဍုၚ်ကွာန်အရုတ်တံၚ် သ္ကိုပ်အုပ်ဓုပ်ကွာန်အရုတ်တံၚ် လေန်ဥူ သ္ကိုပ်သ္ကဂှ် ပ္ဍဲဂိတုဂျူလာၚ် ၂၄ တေံ ပအပ်ကဵုလဝ်လွဟ် ပ္ဍဲကဵုဍုၚ်ဒပ်ရေဝ် သၟဝ်တဲ ဌာန်ဂအုပ်ပၞာန်ရးအဂၞဲရ။
ဂကောံပၞာန်ညးဍုၚ်ကွာန်အရုတ်တံၚ်ဝွံ ချဳဒရာၚ်ဒၟံၚ် ပ္ဍဲဒေသရေဝ် မွဲဒမြိပ်အရုတ်တံၚ်၊ (နှၚ်းစုံ) ၊ ဒဒန်သၞေဟ်ကာတံဂှ်တုဲ ပံက်သၞေဟ်ကၚ်စၟဳတ်တုဲ ဗက်ဒၟံၚ်လှုဲတံလေဝ် နွံဒၟံၚ်ရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်ဂွံဂှ်မ္ဂး ပ္ဍဲဂကောံပၞာန်ညးဍုၚ်ကွာန်အရုတ်တံၚ်ဂှ် ဇြဟတ် ၇၀ ပြၚ် နွံဒၟံၚ်ရောၚ် ဂွံတီကေတ်ရ။
ညးတာလျိုၚ် ဒပ်ပၠန်ဂတး ဖျေံသ္ဇိုၚ်ရေဝ်တံဂှ်တှ်ေ ဂကောံပၞာန်ညးဍုၚ်ကွာန်အရုတ်တံၚ်ဝွံ အတိုၚ်ကံၚ်ဇြဳပၞာန်စကာ ဒးကၠောန်ဒၟံၚ်တုဲ ပအပ်ကဵုလဝ်လွဟ် ဒှ်မာန်ရောၚ် ဟီုရ။
ပ္ဍဲပွိုၚ်ဍုၚ်ရေဝ် အကြာပၞာန်ညးဍုၚ်ကွာန်အရုတ်တံၚ်ကဵု ဒပ်ပၠန်ဂတးတံဂှ် ပရေၚ်ပန်ပှော်ၜါလ္ပာ်တံ က္တဵုဒှ်ဒၟံၚ် မွဲဏှမွဲဏှ နွံဒၟံၚ်ရ။
အပ္ဍဲကာလသီအဝဵုဏံ ဟိုတ်နူပရေၚ်ဗ္တိုက်ဒပ်ပၠန်ဂတးတံတုဲ ကောန်ပၞာန်ညးဍုၚ်ကွာန်အရုတ်တံၚ် ဟွံအောန်နူကဵု ၇ တၠ ချိုတ်အာလဝ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ကံၚ်ဇြဳပၞာန်ဝွံ ပအပ်ကဵုလွဟ် ကုဂကောံပၞာန်ညးဍုၚ်ကွာန်တံကီု၊ ဇၟာပ်ကွာန်ဇၟာပ်အရာပ် သွက်ဂွံဒက်ပ္တန် ဂကောံပၞာန်ညးဍုၚ်ကွာန်အိုတ်ဂှ် ကဵုဒၟံၚ်ဇြဟတ်ဂရိုဟ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−SBM