ဘာအၚ်၊ ဂျူလာၚ် ၂၅
ပ္ဍဲတွဵုရးကရေၚ် ဟိုတ်နူဗြဲဂူရိုပ်တုဲ ဍုၚ်ဘာအၚ်၊ ဍုၚ်လိုၚ်ဗၠဲတံ မပါလုပ် ဍုၚ်ဟွံအောန်နူကဵု ၅ ဍုၚ် ဍာ်ဇၞော်က္တဵုဒှ်လဝ်တုဲ ဒဒန်လ္ၚဵု လီုအာလဝ်တုဲ ဂၠံၚ်သွံရာန်ဗၞိက်ပယျဵုလ္ၚဵုတံ အာကၠုၚ်ဟွံဂွံဒှ်လဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ဂၠံၚ်ထိုအ်ဂဝ်ကိုဝ် လ္တူဂၠံၚ်တရဴသွံရာန်ဗၞိက်ပယျဵု မြဝတဳ−ဘာအၚ်ဂှ် ဗြဲရိုပ်ဂူလဝ်တုဲ ဍာ်နူဒဵု ဇွောဝ်စှ်ေကၠုၚ်ဒၟံၚ်ဂှ်ရ ပ္ဍဲကဵုဒၞါဲဂၠံၚ်လ္တူဒဵုလ္ၚဵုတံဂှ် စနူဂိတုဂျူလာၚ် ၂၄ တုဲ ဍာ်ကၟိုဟ်ဒၟံၚ်တုဲ တိလာ်တံလေဝ် က္တဵုဒှ်ဒၟံၚ်ဂှ်ရ ကွဳစက်ဂမၠိုၚ် အာကၠုၚ်ဟွံဂွံရတုဲ ဒးကၟာတ်လဝ်ယာယဳရောၚ် ဂွံတီကေတ် ဇရေၚ် KNU/KNLA PC ရ။
ကောန်ဒပ်ကံၚ်ဇြဳၜိုဟ်လလမ်ကရေၚ် KNU/KNLA PC မွဲတၠဂှ် ပ္ဍဲဂၠံၚ်ထိုအ်ဂဝ်ကိုဝ် ကၟာတ်လဝ်ကွဳစက်ဂမၠိုၚ် အခေါၚ်အာကၠုၚ်ယာယဳယျဂှ် ကဵုလဝ်သမ္တီရ။
ပ္ဍဲဒၞါဲသ္ကုတ်ဂၠံၚ် လ္တူဒဵုထိုအ်ဂဝ်ကိုဝ် တိလာ်က္တဵုဒှ်လဝ်ဂှ် ဒပ် KNU/KNLA PC တံ ၚးတးဒၟံၚ်တုဲ ပ္ဍဲဂိတုဂျူလာၚ် ၂၅ ဒဵုကဵုအခိၚ်တ္ၚဲစေၚ်ဂှ် ဟွံဂွံကလေၚ်ပံက်ဂၠံၚ်ဂှ်ဏီပုဟ်ဂှ် ဂွံတီကေတ်ရ။
ဂၠံၚ်ကျာ်ပိ−ထဳမာန်ထိုဝ်−ဒံၚ်ဒဳ−တဂေါန်ဒေၚ်−မုဟ်ဍုၚ် မဒှ်ဂၠံၚ်ပၟိက်ဇၞော် သွက်ပရေၚ်ပလံၚ်ဗစိုပ်ဗၞိက်ပယျဵုတံဂှ်လေဝ် ပ္ဍဲဂိတုဂျူလာၚ် ၂၄ တေံ ဗ္ဒါဲကွာန်ထဳမာန်ထိုဝ်ဂှ် ဍာ်ဇၞော်ဒၟံၚ်တုဲ အာကၠုၚ်ဝါတ်ဂါတ်ဒၟံၚ်ရောၚ် ညးဒေသတံ ဟီုလဝ်ရ။
သ္အာၚ်နူဂှ်ပၠန် သ္ကုတ်ဂၠံၚ်ထဳလုၚ်−တယိတ်တဝ်−နဗူ−ထိုအ်ဂဝ်ကိုဝ် ဒဒန်နံၚ်ခွဳဂှ်ဝွံ ပ္ဍဲဂိတုဂျူလာၚ် ၂၅ အခိၚ်နူဂယးဂှ် ဟိုတ်နူဍာ်ဆၚ်စှ်ေနူဒဵု ထ္ပက်လဝ်တုဲ တၞုၚ်ဒဒန်ဂှ်လေဝ် ဇီုကပိုက်လီုလာ်အာလဝ်တုဲ အာကၠုၚ်ဟွံဂွံရပုဟ်ဂှ် ညးဒေသတံ ဟီုအိုတ်ရ။
အခိၚ်လၟုဟ် ပ္ဍဲတွဵုရးကရေၚ် ဍုၚ်လိုၚ်ဗၠဲ၊ ပိုၚ်ကြုၚ်၊ ကြုၚ်ဒဵု၊ ကျာ်ဍုၚ်တံဂှ်လေဝ် ဍာ်ၜဳဇၞော်ဒၟံၚ်တုဲ ကြပ်အလုံဍုၚ်ကျာ်ဍုၚ်မွဲဂှ် ဍာ်ဇၞော်ဒၟံၚ်ရောၚ် ညးဒေသတံ ဟီုရ။
အတိုၚ်တၚ်လလောၚ်တြး ဌာနစမ်ၜတ်အကာဲအရာဗြဲကျာ ပ္ဍဲဂိတုဂျူလာၚ် ၂၅ အခိၚ်လဒေါဝ်တ္ၚဲဂှ်မ္ဂး ပ္ဍဲဍုၚ်ဘာအၚ် ဍာ်ၜဳသၚ်လောန် ၜက်ဒၟံၚ် ဂၠးမုက်ဍာ်ဍုၚ်ဂှ် ၁ ပေဘာ်ပြၚ်တုဲ ဍာ်ၜဳဏံဝွံ မွဲတ္ၚဲပၠန်မ္ဂး တိုန်ကၠုၚ် ၜိုတ် ၁ ပေဘာ်မာန်တုဲ ရဲမံၚ်ဗ္ဒါဲၜဳ ကေုာံ ရဲမံၚ်ဒၞါဲတိသဝ်ဝ်တံ စွံသတိတုဲ သွက်ဂွံမံၚ်စံၚ်အိုတ်ဂှ် ကဵုလဝ်သမ္တီရ။
ဥူဝေန်နာၚ် ညးလ္ၚတ်သ္ၚဳဂၠိပ် ပရေၚ်အကာဲအရာဗြဲကျာဂှ်လေဝ် ပ္ဍဲဒေသသ္ကုတ်သၠုၚ်ကျာဍုၚ်ဗၟာဂှ် ဗြဲဆက်ဂူဒၟံၚ်တုဲ ဆက်ဒးဆေၚ်အာမုက် ကုအခိၚ်ကာလဍာ်ဇၞော်သ္ကုတ်ကၠာဏံဏီ မဒှ်တုဲ ဗွဲတၟေၚ် သီုဍုၚ်မတ်မလီု မပါလုပ် ပ္ဍဲတွဵုရးဍုၚ်မန်ကဵု တွဵုရးကရေၚ်တံ သွက်ဂွံစွံသတိအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ