ၜၚ်ကံက်၊ အဝ်ဂါတ် ၆
ပ္ဍဲအရာကောပ်ကာဲ ပရေၚ်သၟာကမၠောန်ဆုဲပြံၚ် နွံဍုၚ်သေံတံဂှ် သွက်ဂွံပါဲတးထောံ ကံၚ်ဇြဳပၞာန်ဂှ် အလဵုအသဳညဳသၟဟ်ဂကူ NUG အာတ်မိက်လဝ် ဇရေၚ်အလဵုအသဳသေံရ။ ကံၚ်ဇြဳပၞာန်ဝွံ သွက်အဝဵုဍေံတံရပ်စပ်လဝ် ဂွံတန်တဴအာဍာ်ဇမၠိၚ်ဂှ် ကံက်ဒၟံၚ်အခေါန်ဖလှာ လ္တူကောန်ကလောန်ဆုဲပြံၚ်တံရောၚ် NUG ဟီုရ။
ပ္ဍဲကဵုဍုၚ်သေံဂှ် ကောန်ကလောန်နူကဵုဍုၚ်ဗၟာ နွံကဵုလိက်တၞးစၟတ်သမ္တီမလုပ်သၞောဝ်တံဂှ် ၂ ပြကောဋိကိုဋ်နွံတုဲ လုပ်စိုပ်ကၠောန်ဒၟံၚ်ကလောန် ပ္ဍဲကဵုကဏ္ဍ ပရေၚ်တဵုလွဳ၊ ကမၠောန်တမ္ၚာ၊ ပရေၚ်ကၠောန်ပ္တိတ်ဗၞိက် ကေုာံ ပ္ဍဲကဵုကဏ္ဍတၞဟ်ဟ်တံရ။
ပ္ဍဲဍုၚ်ဗၟာ ကြဴနူသီအဝဵုတုဲ အခိၚ်အကာဲအရာပရေၚ်ပိုန်ဒြပ်ဟွံခိုဟ်ဒၟံၚ်ဂှ် ကောန်ကလောန်ဍုၚ်ဗၟာ စိုပ်ဍုၚ်သေံ ဗွဲမဂၠိုၚ်ဝွံ ဒးကလေၚ်ပြၚ်ဒၟံၚ်သြန်ထံက်ပၚ် သွက်ဂြောဝ်ဂတာညးတံရ။
အတိုၚ်လိက်စၟတ်သမ္တီ အကြာၜါဍုၚ်ဂှ်မ္ဂး ကောန်ကလောန်ဍုၚ်ဗၟာ ဗွဲမဂၠိုၚ်ဂၠေၚ် ကၠုၚ်စိုပ်ကၠောန်ဒၟံၚ် ပ္ဍဲဍုၚ်သေံကီုလေဝ် သက်သဳဟွံမွဲမွဲသာ် ရဲကၠုၚ်စိုပ်ကၠောန်ဒၟံၚ်ကလောန် ပ္ဍဲဍုၚ်သေံတံလေဝ် နွံဒၟံၚ်ရ။
မၞိဟ်ကၠုၚ်စိုပ် နူကဵုဂၠံၚ်ဟွံလုပ်သၞောဝ်သာ်ဏံတံဂှ် အလဵုအသဳသေံ ပ္တိတ်ကဵုဒၟံၚ် CI မကော်ဂး အခေါၚ်ကၠောန်ကလောန် ကေုာံ အခေါၚ်မံၚ်စံၚ် ပ္ဍဲကဵုရုၚ်ကလုတ်ဍုၚ်ဗၟာ နွံၜၚ်ကံက်ဂှ်ရ။
ရုၚ်ကလုတ်ကံၚ်ဇြဳပၞာန် ဟိုတ်နူဂွံဒၟံၚ်အခေါၚ်ပ္တိတ်ကဵုဒၟံၚ် သာ်ဏံဂှ်ရ သွက်ဂွံဍဵုဍိုက်ကောန်ကလောန်တံ သွက်ဂွံရပ်စပ်နာနာသာ်ဂှ် ဂွံဒၟံၚ်အခေါၚ်အရာရောၚ် NUG ဟီုရ။
ပ္ဍဲကဵုဍုၚ်သေံ နွံကဵုဗၠးၜးဗဗွဲဓဝ်ဂှ် နကဵုကံၚ်ဇြဳပၞာန်ဗၟာ ညံၚ်ဟွံဂွံအခေါၚ်ဖံက်ပ္ကဝ်သၞောဝ်၊ သွက်ဂွံကဵုက္ဍိုပ် ကုအခေါၚ်အရာကောန်ကလောန် ကေုာံ သ္ဇိုၚ်အခေါၚ်အရာမၞိဟ်၊ ဒဒှ်ရမိက်ဂွံဖ္တိုက်ဖ္အောဝ် အလဵုအသဳသေံ၊ ညးစၞးကၠတ်ထဝ်၊ ကၠတ်ထဝ် ကေုာံ ဂကောံမဆက်စပ်တၞဟ်သ္အာၚ်ဂမၠိုၚ်၊ ကောန်ဍုၚ်သေံတံဂှ် NUG ထ္မံက်ထ္ၜးလဝ် ပ္ဍဲကဵုတၚ်လလောၚ်တြးမွဲဂှ်ရ။
နကဵုကောန်ကလောန်ဆုဲပြံၚ်ဂမၠိုၚ် သွက်ဂွံဂွံအခေါၚ်မံၚ်စံၚ် ပ္ဍဲဍုၚ်သေံ ဗွဲမလုပ်သၞောဝ်ဂှ် သွက်ဂွံဒုၚ်ကေတ်တဲ တၚ်စၟတ်သမ္တီတံဂှ် ပၟိက်ဇၞော်တုဲ ပ္ဍဲဂိတုတုဲကၠုၚ်တေံ ရုၚ်ပ္တိတ်ကဵုစၟတ်တဲ ၈ ရုၚ်သာ်ဏံဂှ် လ္ပာ်သေံ ကၟာတ်ထောံ ၇ ရုၚ်ဂှ်ရ သွက်သၟာကမၠောန်တံဂှ် အခက်အခုဲ နွံကၠုၚ်ရ။
အခိၚ်လၟုဟ် နကဵုကောန်ကလောန်ဍုၚ်ဗၟာဂမၠိုၚ် ပ္ဍဲကဵုရုၚ်ကလုတ် သမုတ်သာဃောန်ကဵု ၜၚ်ကံက်တံသၟးရ အာတ်ပ္တိုန် CI ဂွံ ဒှ်ဒၟံၚ်ရ။
ကောန်ကလောန် လိက်တၞးစၟတ်သမ္တီ ဟွံမွဲတံဂှ် အခိၚ်ထ္မံက်ဒၟံၚ်ရုပ်ရဴ သၞောတ်ပ္တိတ်ကဵု စၟတ်တဲဒုၚ်သက်သဳ CI ဂှ် နူကဵုရုၚ်ကလုတ်ဂှ် အာတ်မိက်ဒၟံၚ် လိက်တၞးစၟတ်သမ္တီ တၟာဂလိုၚ်ရောၚ် NUG ဟီုရ။
ပ္ဍဲကဵုညးဆုဲပြံၚ်မံၚ်တန်တဴတံဂှ် လိက်တၞးနွံပၟိက်တံ ဍိုက်ပေၚ်မ္ဂး ထေက်ကဵုဒးပ္တိတ်ကဵုညးတံ စၟတ်တဲကၠောံဍုၚ်ထေက်ဂှ် NUG ဟီုလဝ်ရ။
Ref: Rfa