ကိဗ်၊ အဝ်ဂါတ် ၅
က္ၜၚ်ကျာဗ္တိုက် အေဖ်−၁၆ ပ္တိတ်နူအမေရိကာန်ဂှ် ဒဒှ်ရဂွံဒုၚ်ကေတ်တဲ အလန်ကိုပ်ကၠာအိုတ် သမ္မတယူကရုၚ် ဗိုဝ်လိုဝ်ဒဳမာ ဇြဳလာန်သကဳ ဟီုလဝ်ရ။
“အေဖ်−၁၆ စိုပ်ဒၟံၚ်ယူကရုၚ်ယျ။ ပိုယ်တံ ကၠောန်မာန်ယျ” သာ်ဝွံ အပ္ဍဲအခန်ကၞာ မကၠောန်ဗဒှ်လဝ် ပ္ဍဲဗ္ဒိုပ်ဖျေံသ္ဇိုၚ်ဒပ်ကျာ ဟွံထ္မံက်လဝ်ယၟုဂှ် သမ္မတဇြဳလာန်သကဳ စွံလဝ်က္ၜၚ်ကျာဗ္တိုက်ၜါဖ္ဍိုက် သ္ကဲဂှ်တုဲ ဟီုလဝ်ရ။
သ္ပဟိုတ်နူ ရီုဗၚ်ကဵုလဝ် က္ၜၚ်ကျာဗ္တိုက် အေဖ်−၁၆ သာ်ဏံဂှ်တုဲ ဒဒှ်ရတၚ်တဴဂုဏ် ကုမဟာမိတ်တံဂှ်ကီု၊ နကဵုညးတံ ဗွဲကြဴလေဝ် နွံဒၟံၚ်ပၟိက် တၟာဂလိုၚ်ဏီဂှ် သမ္မတ ဇြဳလာန်သကဳ ဟီုလဝ်ရ။
သွက်ယူကရုၚ် ဒးသ္ပပဓာန်ဒၟံၚ် က္ၜၚ်ကျာဗ္တိုက် ခေတ်သဵုဗဳယေတ်တေံသၟးဂှ်တှ်ေ က္ၜၚ်ကျာဗ္တိုက် အေဖ်−၁၆ ဏံဂှ်ဝွံ ပ္ဍဲအရာဗပေၚ်ဇြဟတ် ဒပ်ကျာဂှ် ဒှ်တဴအရီုဗၚ် ပၟိက်ဇၞော်ရ။
ယူကရုၚ်ဂှ် အာတ်မိက်လဝ် က္ၜၚ်ကျာဗ္တိုက် အေဖ်−၁၆ လအ်ယျကီုလေဝ် သွက်ဂွံဒဳဂှ် မၞိဟ်ဒဳပ္ကတ်ပ္ကေၚ်လဝ်ခိုဟ်ဟ် ဟွံမွဲဏီပုဟ်ဂှ် သမ္မတဇြဳလာန်သကဳ ဒုၚ်လဝ်ဝန်ရ။
ကုဒိန်မာတ်၊ နေဝ်တာလာန် ကေုာံ အမေရိကာန်တံဂှ် နကဵုညး တၚ်တဴဂုဏ်ဂှ် ဒဒှ်ရဟီုလဝ်ကီုလေဝ် က္ၜၚ်ကျာဗ္တိုက်တံဂှ် ဍုၚ်တံဏံသီုဖအိုတ် ပလံၚ်ဗစိုပ်လဝ်ကဵုဟာ ဟွံသေၚ်မ္ဂး စိုပ်ကၠုၚ်ယူကရုၚ် မူစိဖ္ဍိုက်ရောဟီုဂှ် ဟီုလဝ်ဗွဲလစှ်ေဟွံမွဲရ။
နကဵုမဟာမိတ်ဥရဝ်ပ မိက်ဂွံရီုဗၚ် ယူကရုၚ်တံဂှ်တှ်ေ ဒဒှ်ရပလံၚ်ဗစိုပ် က္ၜၚ်ကျာဗ္တိုက် အေဖ်−၁၆ တံမာန်ဂှ် ပ္ဍဲသၞာံ ၂၀၂၃၊ ဂိတုအဝ်ဂါတ် ဂှ် အမေရိကာန် ကဵုလဝ်အခေါၚ်တုဲဂှ် ဍုၚ်မဟာမိတ်နေတဝ်ဂမၠိုၚ် ကဵုလဝ်ကတိ သွက်ဂွံပလံၚ်ကဵု က္ၜၚ်ကျာဗ္တိုက် အေဖ်−၁၆ ၆၅ ဖ္ဍိုက်ရ။
က္ၜၚ်ကျာဗ္တိုက် အေဖ်−၁၆ တံဂှ် ဆက်လဝ်မိတ် ပ္ဍဲသၞာံ ၁၉၇၈ တေံတုဲ ဒပ်ပၞာန် နူဍုၚ်ပလိုတ်ဂမၠိုၚ်ဂှ်တှ်ေ ဒၞါဲက္ၜၚ်ကျာဗ္တိုက်ညးတံ အာယုက်လအ်ဒၟံၚ်တံဂှ် ပလေတ်ပလေတ်ဒၟံၚ် သွက်ဂွံထ္ပက်အဇာ ကုက္ၜၚ်ကျာဗ္တိုက် အေဖ်−၃၅ ပ္တိတ်နူအမေရိကာန်တံဂှ်အိုတ်ရ။
နကဵုယူကရုၚ် ကလိဂွံလဝ် က္ၜၚ်ကျာဗ္တိုက် အေဖ်−၁၆ ယိုက်ပ္တိုန်သီုကမ်လှောဝ် မခတိုဟ်တံမာန်ဂှ် အပ္ဍဲတိဍာ် ဒးဒုၚ်သီလဝ်တံဂှ် ကၠောန်သ္ပအာပရေၚ်ဗ္တိုက် ချိုတ်တ်ပၠိုတ်တ်မာန်ရဏောၚ် မဒှ်ရ။
ဒဳမဳထရဳ ပက်သကအ် မဒှ်သၞာဲဒဴလလောၚ်ပရိုၚ် ကရေမ္မလေန် ရုယှာဂှ် က္ၜၚ်ကျာဗ္တိုက် အေဖ်−၁၆ ပ္တိတ်နူဍုၚ်ပလိုတ် မပဝ်ယာန်အာ သွက်ယူကရုၚ်ဂှ် ပန်ဖျေံအာဏောၚ် ဟီုကြီုလဝ်ရ။
Ref: BBC