ၜၚ်ကံက်၊ သေပ်တေမ်ဗာ ၃
အပ္ဍဲပွိုၚ်ပိဂိတုတုဲကၠုၚ်တေံ ရပ်ဒက် ကောန်ဍုၚ်ဗမာ မွဲကိုဋ်ပန်ဠက်ပြၚ်တုဲ ဒဒှ်ရကလေၚ်ပလံၚ်ဖျဴလဝ် ဍုၚ်မိမညးတံဂှ် ဌာနဝန်ဇၞော်သၟာကမၠောန်ဍုၚ်သေံ ဟီုရ။
ကောန်ဍုၚ်ဗမာ ဒးဒုၚ်ပလံၚ်ဖျဴဂမၠိုၚ်ဝွံ ကေတ်အခေါၚ်ခိုဟ်ကဵု အကာဲအရာဟွံညိၚ်ဝတ် ဒှ်ဒၟံၚ်အပ္ဍဲဍုၚ်ညးတံဂှ်တုဲ ဒှ်ညးပ္တိတ်ဇြဟတ် သွက်ဂွံဂွံအခေါၚ်ကၠောန်ကလောန် ပ္ဍဲဍုၚ်သေံတံရောၚ်ဂှ် ဇၞော်သ္ကိုပ်ဒပ်ဗၠာဲသၟိၚ်သေံတံ ဟီုလဝ်ရ။
စနူဂိတုဂျောန်မံက်တုဲကၠုၚ်တေံတုဲ ဒၞါဲကမၠောန်ပရေၚ်ပိုန်ဒြပ်၊ ဒၞါဲဒေသပရေၚ်ပိုန်ဒြပ် ကေုာံ ဒၞါဲညးဂၠါဲကလောန်တံ နွံမာန် အပံၚ်ဖအိုတ် ဗ္ဒါဲ ၁၅၀၀၀၀ ဂှ် သၞာဲဒဴသေံတံ ဂၠိုက်ဂၠါဲစၟဳတ်လဝ်တုဲ ပ္ဍဲကဵုရပ်ဒက်ကောန်ကလောန်ဟွံလုပ်သၞောဝ်တံဂှ် ကောန်ဍုၚ်ဗၟာတံ ဒှ်ဒၟံၚ်ဂၠိုၚ်အိုတ်ရောၚ် ဂွံတီကေတ်ရ။
ပ္ဍဲကဵုဍုၚ်သေံဂှ် ကောန်ဍုၚ်ဗမာ ၜိုတ်ၜါပြကောဋိကိုဋ် ကၠောန်ဒၟံၚ်ကလောန်တုဲ သွက်ပရေၚ်ပိုန်ဒြပ်ဍုၚ်သေံဂှ် သ္ပဒၟံၚ်အထံက်အရီု တၟာဂလိုၚ်ရ။
ကောန်ဍုၚ်ဗၟာ လုပ်စိုပ်ကၠုၚ်ပ္ဍဲဍုၚ်သေံ မဟွံလုပ်သၞောဝ် သွက်ဂွံဂွံကလောန် ပ္ဍဲကမၠောန်တဵုလွဳတံကဵု ကမၠောန်တမ္ၚာတံဂှ်လေဝ် နွံဒၟံၚ်တၟာဂလိုၚ်ဂှ် ညးချဳဒရာၚ်ကတိုၚ်ကၟဟ် အခေါၚ်အရာသၟာကမၠောန်တံ ဟီုရ။
ဟိုတ်သၟတ်ဍုၚ်ဗၟာဂွံစိုပ်ကၠုၚ် ဍုၚ်သေံ ဗွဲမဂၠိုၚ်ဂၠေၚ် မွဲပၠန်ဂှ်တှ်ေ ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် မဂယိုၚ်ပ္တိုန်လဝ်ဂှ် မဒှ်ရ။
လၟုဟ် မၞိဟ်နူဍုၚ်သေံ ဒးဒုၚ်ပလံၚ်ဖျဴ ဍုၚ်ဗၟာတံဂှ်လေဝ် ဒးဒုၚ်ကော်ကဵုဒပ်ပၞာန်ဗၟာ သွက်ဂွံလုပ်ပၞာန်မာန်ဒၟံၚ်ရ။
ပ္ဍဲကဵုကိစ္စပရေၚ်သၟာကမၠောန်ဍုၚ်ဗၟာ နွံပ္ဍဲဍုၚ်သေံတံဂှ် ညံၚ်ကံၚ်ဇြဳပၞာန် လုပ်ပထုဲပလာပ်ဟွံဂွံ သွက်ဂွံတာဒၞါကဵုဂှ် အလဵုအသဳ NUG အာတ်မိက်လဝ် အလဵုအသဳသေံတုဲကီုလေဝ် ပြဝသာ်ဏံ မံက်ကၠုၚ်လဝ်ရ။
အထံက်ဂအုပ်ဗၠာဲသၟိၚ်သေံ အဳတဳပိုဝ်ဂှ် ဗ္တိုက်သ္အးအာ ညးမလုပ်စိုပ်ကၠုၚ်ပ္ဍဲဍုၚ်သေံ ဟွံလုပ်သၞောဝ်တံတုဲ ပ္ဍဲကဵုညးတံ လ္ၚဵုတံဂှ်ဝွံ ကေတ်အခေါၚ်ခိုဟ်ကဵု အကာဲအရာရုသံၚ်ဒၟံၚ် ပ္ဍဲဍုၚ်မိမညးတံဂှ်တုဲ ဒှ်ညးပ္တိတ်ဇြဟတ် သွက်ဂွံဂွံကလောန် ပ္ဍဲဍုၚ်သေံတံရောၚ်ဂှ် ဟီုရ။
ရဲလိက်အုပ်ကၠောံဍုၚ်ဟွံမွဲ ဟွံသေၚ်မ္ဂး ရဲလုပ်စိုပ်ကၠုၚ် ပ္ဍဲဍုၚ်သေံ ဟွံလုပ်သၞောဝ်တံဂှ် ပါဲနူကဵုရပ်ဒက်တုဲ သ္ဇက်ဂွံရုဲစှ်တၞဟ်ဟ်ဟွံမွဲပုဟ်ဂှ် ညးဟီုဗပေၚ်လဝ်ရ။
မၞိဟ် ညးတံပလံၚ်ဖျဴလဝ်တံဂှ်ဝွံ စပ်ကဵုဘဲအန္တရာယ် ဒးဒုၚ်ကော်သ္ပ နဒဒှ်ကောန်ဒပ် ဒပ်ပၞာန်ဗၟာမာန်ဂှ်တုဲ ညးတံ မွဲပါၚ်မှ ဟီုဏာလဝ် ဟွံမွဲရ။
ပ္ဍဲဍုၚ်သေံဂှ် နွံပၟိက်ဒၟံၚ် ကောန်ကလောန်ဆုဲပြံၚ်တံ တၟာဂလိုၚ်ကီုလေဝ် သၠုၚ်ပ္တိုန်အသိၚ် ဗ္တိုက်သ္အးဒၟံၚ် ကောန်ကလောန်ဟွံလုပ်သၞောဝ်တံဂှ်တုဲ ဗွဲတၟေၚ် ကြဴနူဒပ်ပၞာန်သီအဝဵုတုဲ ပရေၚ်ဗ္တိုက်သ္အးတံဏံ သာဂၠိုၚ်ကၠုၚ်ရ။
Ref: Rfa