ယူလာန်ဘာတာ၊ သေပ်တေမ်ဗာ ၄
နကဵုမန်ဂိုဝ်လဳယျာ ကၟာတ်သမ္မတရုယှာ ဗလာဒဳမာပူတေန် အခေါၚ်လုပ်ဍုၚ်တှ်ေကၟာတ် ဟွံကၟာတ်မ္ဂး သွက်ဂွံရပ်ဒက်ဂှ် ဂကောံမၚ်ရံၚ်အခေါၚ်အရာမၞိဟ် ဒဒှ်ရဖ္တိုက်ဖ္အောဝ်လဝ်ဂှ် ပ္ဍဲဂိတုသေပ်တေမ်ဗာ ၂ တေံ မာရဳယျာ အဳလာန်နာ ဗဳဂနဝ်လဳ သၞာဲဒဴကဆံၚ်လ္တူ ဌာနသၞောဝ်ဓဝ် ဂကောံအလဵုအသဳဟွံသေၚ်ဂှ် လလောၚ်ပ္တိတ်လဝ် တၚ်လလောၚ်တြးရ။
နကဵုဍုၚ်လုပ်ဂကောံ ရုၚ်သၞောဝ်ဓဝ်ရာဇဝတ်ဍုၚ်သ္အာၚ် ICC မွဲမ္ဂး မန်ဂိုဝ်လဳယျာဝွံ ဟွံရပ်ဒက်သမ္မတပူတေန်မွဲသာ် ယဝ်ရကဵုအခေါၚ်ကၠုၚ်စိုပ်ဂေတ်ဝေၚ်မ္ဂး ဒှ်သဘဴစှ်ေစးကဵု သၞောဝ်ဍုၚ်သ္အာၚ်ဂှ် မာရဳယျာ အဳလာန်နာ ဗဳဂနဝ်လဳ သၞာဲဒဴကံၚ်ဇြဳသၞောဝ်ဍုၚ်သ္အာၚ် ဂကောံမၚ်ရံၚ်အခေါၚ်အရာမၞိဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးမွဲရ။
ဒုၚ်တၠုၚ် သမ္မတပူတေန် နူကဵု ICC မပ္တိတ်လဝ်လိက်ဝါရာန်ဂှ်ဝွံ ဟွံမွဲကဵုဓဝ်ရှ်ေသှ်ေ လ္တူညးမဒးဒုၚ်ကလိလောန်လဝ် အမှုရာဇဝတ် ဒပ်ရုယှာတံ မကလိလောန်လဝ်ဂှ်သၟးဟွံက တုပ်တဴညံၚ်ရဴ ဖဍိုန်လျဖျေံ မူသ္ဇိုၚ် ပူဂဵုလဵုမွဲမှ ဟွံမွဲလ္တူသၞောဝ်ဂှ်လေဝ် သၞာဲဒဴ ဗဳဂနဝ်လဳ ဟီုလဝ်ရ။
အတိုၚ်တၚ်လလောၚ်တြး နန်ကရေမ္မလေန်ဂှ်မ္ဂး သမ္မတပူတေန်ဝွံ စိုပ်ဍုၚ်ယူလာန်ဘာတာ ဍုၚ်ဇၞော်မန်ဂိုဝ်လဳယျာ ပ္ဍဲဂိတုသေပ်တေမ်ဗာ ၂ တေံတုဲ ပ္ဍဲဂိတုသေပ်တေမ်ဗာ ၃ ဂှ် သွက်ဂွံဆဵုဂဗအာကဵု သမ္မတ ယူချာန်နာဇြေန် ချူရက်သုဂှ် စဳဇန်လဝ်ရောၚ် ဂွံတီကေတ်ရ။
က္ဍိုပ်သ္ကိုပ်မန်ဂိုဝ်လဳယျာ ကော်ဘိက်တုဲ သမ္မတပူတေန် ကၠုၚ်စိုပ်လဝ် သာ်ဏံတုဲ အကြာၜါဍုၚ် ပရေၚ်ပံၚ်တောဲရေၚ်တၠုၚ် ဇြဟတ်ဂွံခိုဟ်ကၠုၚ် သွက်ဂွံကၠောန်အာ ဒဒှ်ရရန်တၟံလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး နန်ကရေမ္မလေန်ရ။
သၞာံ ၂၀၂၂ တေံ ကြဴနူလုပ်ဗ္တိုက်ၜက်ၜေတ် ယူကရုၚ်တုဲဂှ် ကလိလောန်လဝ် အမှုရာဇဝတ်ပၞာန်တုဲ ဟိုတ်နူပလံၚ်ဗစိုပ်လဝ် ကောန်ၚာ်သၟတ်ယူကရုၚ်တံ ပ္ဍဲဍုၚ်ရုယှာ ဟွံလုပ်သၞောဝ်တံဂှ်တုဲ ရုၚ်သၞောဝ်ဓဝ်ဖျေံသ္ဇိုၚ် ဍုၚ်ဒဳဟုက် နွံပၟိက်ဒၟံၚ် သမ္မတပူတေန်ရ။
ဍုၚ်မန်ဂိုဝ်လဳယျာဂှ် ဒှ်ဍုၚ်လုပ်လဝ်ဂကောံ ICC တုဲ ယဝ်ပူတေန်ကၠုၚ်စိုပ်မ္ဂး တာလျိုၚ်မ္ဒးရပ်ဒက် နွံဒၟံၚ်ရ။
ဆ္ဂး ဟိုတ်နူပရေၚ်ဍုၚ်ကေဝ်ဒဒှ်ေဒယှ် အကြာၜါဍုၚ်တုဲ စပ်ကဵုလၟေၚ်တရဴ သမ္မတပူတေန်တုဲ ပရေၚ်ဒှ်ဓဝိၚ်တံ ဟွံမွဲပုဟ်ဂှ် ညးမၞုံအခေါၚ်ဟီုဂး နန်ကရေမ္မလေန် ဒဳမဳထရဳ ပက်သကပ် ဟီုရ။
နကဵုဍုၚ် ထံက်ဂလာန် ရုၚ်သၞောဝ်ဓဝ် ICC မွဲ သွက်ဂွံရပ်ဒက်ကဵု ပူတေန် နကဵုဝါရာန်ရပ်ဍုၚ်သ္အာၚ်ဂှ် ဌာနဝန်ဇၞော်ကာဍုၚ်သ္အာၚ် ယူကရုၚ်လေဝ် ဖ္တိုက်ဖ္အောဝ်လဝ်ရ။
ဒၟါနူဒးသ္ပပဓာန်ဒၟံၚ် လ္တူရုယှာဂှ်ရ ပရေၚ်ဆက်ဆောံ အကြာၜါဍုၚ်ဂှ် လ္ပာ်မန်ဂိုဝ်လဳယျာ ဒုၚ်လီုဟွံသေၚ်ပုဟ်ဂှ် ညးခါတ်အကာဲပရေၚ်ဍုၚ်ကွာန်ဂမၠိုၚ် ဟီုလဝ်ရ။
Ref: Bangkok Post