ဘာပန်၊ သေပ်တေမ်ဗာ ၇
ဒပ်ကံၚ်ဇြဳပၞာန် ဒးဒုၚ်ပူဗိုၚ်ကၟာတ်လဒဵုလဝ် ကဵုဒပ်ပံၚ်ကောံ ဂကောံဇြဟတ်ပၠန်ဂတးတံဂှ်ဝွံ ပ္ဍဲအရာပလံၚ်ဗစိုပ်ဇွောံမ အပ္ဍဲဒေသဘာပန် တွဵုရးကရေၚ်ဂှ် ဒးသ္ပပဓာန်ဒၟံၚ် တရဴကျာသၟးဂှ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ်ရ။
တုဲကၠုၚ် အပ္ဍဲဂိတုအဝ်ဂါတ် ပွိုၚ်မွဲဂိတုဓဝ်ဂှ် ပ္ဍဲကဵုတိဍာ်ဒပ်မဟာ ၅ ခရိုၚ်ဘာပန် KNU ဂှ် ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်စဵုဒၞါကောန်ဂကူကရေၚ် KNDO ၊ ဒပ်ပံၚ်ကောံပၠန်ဂတးတံကဵု အကြာဒပ်ကံၚ်ဇြဳပၞာန်တံဂှ် က္တဵုဒှ်လဝ်ပေါဲဗ္တိုက် ၁၁၅ ဝါရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ဒပ်ကံၚ်ဇြဳပၞာန် ၃၅ တၠ ချိုတ်တုဲ ၁၃ တၠ ဇီုကပိုက်ကလိဂွံလဝ်ဝပ်တုဲ အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ရပ်စပ်က္ၜၚ်ကျာတုဲ ဗ္တိုက်လဝ်နွံကီုလေဝ် လ္ပာ်ဒပ်ပံၚ်ကောံပၠန်ဂတး KNLA KNDO တံဂှ် ဇီုကပိုက်ဒးဟွံမွဲပုဟ်ဂှ် KNU သ္ဂးရ။
သ္အာၚ်နူဂှ်ပၠန် အပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် ဒပ်ကံၚ်ဇြဳပၞာန်ဝွံ ပ္ဍဲအရာပလံၚ်ဗစိုပ်ဇွောံမ သွက်ကောန်ဒပ်ညးတံဂှ် သ္ပပဓာန်ကဵုတရဴကျာသၟးတုဲ ဒးပလံၚ်ဗစိုပ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
အခိၚ်လၟုဟ်ဂှ်လေဝ် ဒပ်ပံၚ်ကောံပၠန်ဂတး KNLA တံ ဆက်ဗိုၚ်ကၟာတ်လဒဵုလဝ် ဒၞါဲလုပ်တိတ် ဗ္ဒိုပ်ဒပ်တမ်ဒပ်သှ်ေဂမၠိုၚ် ပါလုပ်သီုကဵု ဗျူဟာပၞာန်ဘာပန်တံဂှ်ရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် ဟီုရ။
ဍုၚ်ဘာပန် ပ္ဍဲတွဵုရးကရေၚ်ဂှ် တုဲကၠုၚ်ဂိတုဖေဖဝ်ဝါရဳတေံ ဒပ်ပံၚ်ကောံ KNLA တံ ဗ္တိုက်သီဂွံလဝ်ဝုဲ ဆက်ထ္ပက်လဝ်ပၞာန် ကုဌာန်ဂအုပ်တမ်ဒပ် ပါလုပ်သီုကဵုဗျူဟာကံၚ်ဇြဳပၞာန် နွံဗ္ဒါဲဍုၚ်ဘာပန်တံဂှ်တုဲ သီဂွံလဝ် တမ်ဒပ် ၃ တုဲ တမ်ဒပ် ကေုာံ ဗျူဟာ သှ်ေဒၟံၚ်တံဂှ် ဆက်ဗိုၚ်ကၟာတ်လဒဵုလဝ်ဖိုဟ် မဒှ်ရ။
သ္အာၚ်နူဂှ်ပၠန် ဗ္ဒိုပ်ဒပ် (ခေါပုတ်) ဒပ်ကံၚ်ဇြဳပၞာန် လ္ပာ်သ္ကုတ်လ္တူ ဍုၚ်ဘာပန်ဂှ်လေဝ် ဒပ်ပံၚ်ကောံ KNLA တံ ဗိုၚ်လဝ်တုဲ ပ္ဍဲဗ္ဒိုပ်ဒပ် (ခေါပုတ်) ဏံ ကောန်ဒပ်ကံၚ်ဇြဳပၞာန် ထောံလသာဗ္ဒိုပ်ဂြိပ်ကၠုၚ်နူကဵု ပယျဵုတံ ကောံမံၚ်ဒၟံၚ် မဒှ်ရ။
အပ္ဍဲတိဍာ်ခရိုၚ်ဘာပန်ဂှ် အပ္ဍဲသၞာံဏံ လ္ပာ်ကံၚ်ဇြဳပၞာန် ထောံလသာဗ္ဒိုပ် ဂြိပ်တိတ်တံ နွံလဝ် ဗွဲမဂၠိုၚ်ဂၠေၚ်တုဲ ဗ္ဒိုပ်ဒပ်ကံၚ်ဇြဳပၞာန် နွံမွဲဒမြိပ်ၜဳသၚ်လောန် ပယျဵုသေံ သီုဖအိုတ်ဂှ်လေဝ် ဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media