မတ်မလီု၊ သေပ်တေမ်ဗာ ၇
တွဵုရးဍုၚ်မန် ပ္ဍဲဍုၚ်မတ်မလီု ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပကီုပရာပ် ကံၚ်ဇြဳပၞာန် ဒက်ပ္တန်ကဵုလဝ်ဂှ်ဝွံ သ္ပမာန်လ္တူညးဍုၚ်ကွာန် ကေုာံ ကၠောန်သ္ပဒၟံၚ်ညံၚ်ရဴဂိုဏ်မာဖဳယာတံ နွံဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံကောပ်ကာဲဗဟဵု ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပကီုပရာပ်ဂှ် တုဲကၠုၚ်ဂိတုအဝ်ဂါတ် ၁၆ တေံ ကံၚ်ဇြဳပၞာန် စဒက်ပ္တန်လဝ်တုဲ ဒက်ပ္တန်ကၠုၚ် သီုကဵုနေဗျဳဒဝ်၊ စဵုကဵုရးဒေသ၊ တွဵုရး၊ ခရိုၚ်၊ ပွိုၚ်ဍုၚ်၊ အရာပ်၊ ကွာန်ရးတံဂှ်ရ။
ပ္ဍဲကဵုဂကောံဂီုကၠီုညးဍုၚ်ကွာန် ကံၚ်ဇြဳပၞာန် ဒက်ပ္တန်လဝ် ပ္ဍဲဍုၚ်မတ်မလီုဂှ် မၞိဟ်ပရမ် ဒပ်ပၞာန်လွဳလဝ်ဂမၠိုၚ်၊ ရဲထံက်ဂလာန်ဒပ်ပၞာန်တံ၊ ကောန်ဗော်ကျခိုၚ်ယျေတံ ကေုာံ ဂကောံပရေၚ်ဂကူတံ ပါလုပ်ဂၠိုၚ်အိုတ်တုဲ မွဲမွဲကွာန်၊ မွဲမွဲအရာပ်မ္ဂး ဗွဲတွဵုမအောန် ဟွံအောန်နူကဵု ၁၅ တၠ ပါလုပ်ဂှ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
ဂကောံတံဏံဂှ် နူကဵုကၠာတေံရ ကံၚ်ဇြဳပၞာန် ရပ်စပ်စကာလဝ် ပ္ဍဲဒၞါဲဂီုကၠီု ကေုာံ ဂေတ်ကၚ်တံ နဒဒှ်ညးစၚုဟ်လိၚ်တ္ၚဲတုဲ ဗွဲကြဴဏံ စုတ်ထောံလဝ် ပ္ဍဲကဵုဂကောံဂီုကၠီုညးဍုၚ်ကွာန်တံရ။
ညးဒေသလ္တူဍုၚ်မွဲတၠဂှ်တှ်ေ ဂကောံဂီုကၠီုညးဍုၚ်ကွာန် ကံၚ်ဇြဳပၞာန် ဒက်ပ္တန်ကဵုလဝ်ဂှ်ဝွံ နကဵုဗီုပြၚ်ဂွံစလဝ်တိဍာ်အပိုၚ်ဂှ် သ္ပမာန်ဒၟံၚ် လ္တူညးဍုၚ်ကွာန်တံတုဲ ဒှ်ဒၟံၚ်ညံၚ်ရဴ ဂကောံမာဖဳယာတံဂှ်ရ သီုညးဖအိုတ် ဒးဖေက်ဒၟံၚ်အိုတ်ရောၚ် ဟီုရ။
“ ဂီုကၠီုညးဍုၚ်ကွာန်ကဵု ပရေၚ်ဗ္ဂပ်ကဵုလွဟ်တံဂှ် ဒက်ပ္တန်ထောံယျဟီုတှ်ေ ၝတံဏံဂှ် စိုပ်ဗ္တံမ္ဂး သ္ၚိမိက်ဂွံဂၠါဲဂှ် ဂၠါဲပထုဲဒၟံၚ်ရ။ လ္တူဂၠံၚ်လေဝ် ဗီုမိက်ဂွံကၠောန် ကၠောန်ဒၟံၚ်ရ။ ဍေံတံကၠုၚ်တှ်ေ ဟွံပါဲကဵုဂၠံၚ်မ္ဂး ကညာၚ်လက် နူကဵုလ္တူကွဳစက်။ ဂၠါဲသၞ။ ဒှ်ဒၟံၚ်ဗီုပြၚ် ဂွံစလဝ်ဍုၚ်အပိုၚ်ရ။ ဍေံတံကၠုၚ်တှ်ေ ဒးပါဲကဵု။ ရံၚ်ဍေံတံလအ်အာတှ်ေ မုရံၚ်ဂးတုဲ တုပ်ညံၚ်ဂကောံမာဖဳယာတံဟဂှ်ရ။ ဒးဖေက်ဒၟံၚ်ဍေံတံ သီုညးဖအိုတ်ရ” သာ်ဝွံ သ္ဂးရ။
ဂကောံဂီုကၠီုညးဍုၚ်ကွာန် ကံၚ်ဇြဳပၞာန်ဂှ်ဝွံ လ္တူဍုၚ်မတ်မလီုဂှ် ဗီုဒးစိုတ် ကၠောန်ဒၟံၚ်ဂှ်ရ ညးဒေသဂမၠိုၚ်ဝွံ စိုပ်ဗ္တံ ၈ နာဍဳတုဲမ္ဂး ဟွံဂံၚ်တိတ်မ္ၚးသ္ၚိရတုဲ စနူကဵုဆေၚ်ဖျာ ကၟာတ်အာပြဟ်ဟ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ဍုၚ်မတ်မလီုဝွံ ဒှ်ဍုၚ်ကံၚ်ဇြဳပၞာန် ထိၚ်ဒက်လဝ်တုဲ ဂကောံဂီုကၠီုညးဍုၚ်ကွာန် ကံၚ်ဇြဳပၞာန်တံ သ္ပမာန်ဍဵုဍိုက်ဒၟံၚ် လ္တူညးဍုၚ်ကွာန်တံ သာ်ဏံဏောၚ်ဂှ် ညးဒေသတံ ဟီုရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ပ္ဍဲကဵုဂကောံဂီုကၠီုညးဍုၚ်ကွာန် ကံၚ်ဇြဳပၞာန်ဂှ် ရဲပါလုပ်တံဂှ် ထ္မံက်ပ္တိတ်စၟဳတ်တုဲ ကေတ်အာအရေဝ် ပိုတ်တ်သ္ကုတ်တ်ဏောၚ် ဟီုရ။
“နကဵုဂကောံပၠန်ဂတးပိုယ်တံလေဝ် ပြဝကံၚ်ဇြဳပၞာန် အာယုက်ဂွံဂၠိၚ်အာတံကီု၊ တုဲပၠန် ကုပူဂဵုပါလုပ်ရီုဗၚ်ကဵု ဂကောံဂီုကၠီုညးဍုၚ်ကွာန်တံဏံ သီုဖအိုတ်ဂှ် ထ္မံက်ပ္တိတ်စၟဳတ်အာဏောၚ်တုဲ သွက်ဂွံကေတ်အာအရေဝ် ပိုတ်တ်သ္ကုတ်တ်ဂှ် ပိုယ်တံ ကၠောန်လဝ်နွံဒၟံၚ်ရောၚ် တ္ၚဲဏံ ပိုယ်တံ မိက်ဂွံဟီုရ” သာ်ဝွံ သ္ဂးရ။
လအာတုပ်သာ်ဂှ်ကီု ကံၚ်ဇြဳပၞာန်ဝွံ အပ္ဍဲတွဵုရးဍုၚ်မန် ပ္ဍဲကဵုပွိုၚ်ဍုၚ်သှ်ေဒၟံၚ်တံဂှ် သွက်ဂွံဒက်ပ္တန် ဂကောံဂီုကၠီုညးဍုၚ်ကွာန် ဗွဲမပြဟ်ဂှ် ကဵုဒၟံၚ်ဇြဟတ်ဂရိုဟ်တံ နွံဒၟံၚ်တုဲ ပ္ဍဲကဵုပွိုၚ်ဍုၚ်ဍေံတံထိၚ်ဒက်လဝ် ပွိုၚ်ဍုၚ်မတ်မလီု၊ ၜါသွာၚ်၊ ပံၚ် ကေုာံ ပွိုၚ်ဍုၚ်မုဟ်ဍုၚ်တံဂှ် ဒက်ပ္တန်လဝ်တုဲယျဂှ် ဂွံတီကေတ်ရ။
ကံၚ်ဇြဳပၞာန်ဂှ်တှ်ေ ကုညးပါလုပ် ပ္ဍဲဂကောံဂီုကၠီုညးဍုၚ်ကွာန်တံဂှ် ကဵုတန်ဗ္တောန်ကွတ်ပၞာန်ကီု၊ ဗ္ဂပ်ကဵုလွဟ်ကီု၊ ထံက်ပၚ်ပလံၚ်ဗစိုပ် ကေုာံ ဆုဲပြံၚ်ဟံၚ်ပြာ် ကောန်ဒပ်ကလိဂွံဝပ်တံဒှ်တမ် တာလျိုၚ်တံဏံဂှ်လေဝ် သွက်ဂွံပအပ်ကဵုဂှ် စဳဇန်လဝ်ရ။
သ္အာၚ်နူဂှ်ပၠန် ဗွဲမစိုပ်တရဴ သွက်ဂွံလုပ်ပေါဲဗ္တိုက်မာန်ဂှ်လေဝ် ပ္ကတ်ပ္ကေၚ်ကဵု နဲဗျူဟာ မကိတ်ညဳကဵု အကာဲအရာတံဂှ်ကီု၊ ပ္ဍဲကဵုတာလျိုၚ်ဂီုကၠီုတိဍာ် ကေုာံ တာလျိုၚ်စဵုဒၞါ၊ တာလျိုၚ်ပၞာန်ဗလးတိတံဂှ်လေတ် သွက်ဂွံရပ်စပ်စကာအာ ကောန်ဒပ်တံ မဒှ်ရ။
ညးမပံၚ်တောဲပါလုပ် ပ္ဍဲဂကောံဂီုကၠီုညးဍုၚ်ကွာန် ကံၚ်ဇြဳပၞာန်တံဂှ် ကေတ်အာအရေဝ် ပိုတ်တ်သ္ကုတ်တ်ဏောၚ် ဂကောံပၠန်ဂတး သ္ပစၞးဂကူမန် ပန်ဂကောံ လလောၚ်ပ္တိတ်လဝ် လိက်ကဵုသတိ အပ္ဍဲဂိတုသေပ်တေမ်ဗာ သတ္တာဟပထမတေံရ။
ပရိုၚ်−သြၚ်လောန်တိုၚ်(မ်)
ဗီု−MOI