တၞၚ်သဳ၊ သေပ်တေမ်ဗာ ၈
ရးတၞၚ်သဳ ပ္ဍဲကဵုပွိုၚ်ဍုၚ်တၞၚ်သဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံဂကောံဇြဟတ်ပၠန်ဂတးတံဂှ် ပေါဲဗ္တိုက်သ္ကာတ်မြဟ်ဒၟံၚ် အရိုဟ်တ္ၚဲအဆက်က်ရောၚ် ဂွံတီကေတ် ဇရေၚ်ကရောၚ်ပၞာန်ဒပ်ပံၚ်ကောံ ကောဒေံသၠုၚ်ကျာတံရ။
စနူဂိတုအဝ်ဂါတ် ၂၉ တုဲကၠုၚ်တေံတုဲ ဒပ်ကံၚ်ဇြဳပၞာန် နကဵုဇြဟတ် ၉၀ ပြၚ် ထ္ပက်ကၠုၚ်ကရောၚ်ပၞာန် ဇရေၚ်ဗ္ဒိုပ်ဒပ်ပုၚ်တဝ် ပွိုၚ်ဍုၚ်တၞၚ်သဳ သွက်ဂွံသၠာဲဒပ်ဂှ် စဒှ်လဝ်ပေါဲဗ္တိုက် ကုဒပ်ပၠန်ဂတးတံ ဗ္ဒါဲကွာန်(ခြောက်မိုၚ်) ရ။
ကြဴနူဂှ်တုဲ လ္ပာ်ဒပ်ကံၚ်ဇြဳပၞာန် ထပ်ဗပေၚ်ကၠုၚ်ဇြဟတ်အရီုတုဲ ပ္ဍဲကဵုကွာန်ဗာန်လဝ်၊ ညံၚ်ပေန်ကွေန်၊ (ခြောက်မိုၚ်) တံဂှ် ပေါဲဗ္တိုက်က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပေါဲဗ္တိုက်ၜါလ္ပာ်ဝွံ စဵုကဵုဂိတုသေပ်တေမ်ဗာ ၇ ဂှ် ဆက်က္တဵုဒှ်ဒၟံၚ်တုဲ မွဲတ္ၚဲမ္ဂး ပေါဲဗ္တိုက်က္တဵုဒှ် ဟွံအောန်နူကဵုၜါဝါ နွံဒၟံၚ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်ပံၚ်ကောံ ဂကောံဒပ်ကောဒေံသ္ကုတ်သၠုၚ်ကျာ ကိုဝ်သာၚ်ညဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက် ပွိုၚ် ၁၀ တ္ၚဲ က္တဵုဒှ်ဒၟံၚ်ပြဟ်ဟ်ဏံဂှ် လ္ပာ်ကံၚ်ဇြဳပၞာန် ပါလုပ်သီုကဵုသၞာဲဒဴမွဲတၠဂှ် ထပှ်တၠ ချိုတ်အာလဝ်တုဲ ၃၀ တၠပြၚ် ကလိဂွံလဝ်ဝပ်တုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံလေဝ် ကောန်သ္ဂံၚ်ၜါတၠ ကလိဂွံလဝ်ဝပ်ရ။
ဟိုတ်နူပေါဲဗ္တိုက်ၜါလ္ပာ်တံတုဲ ညးဒေသ ၅၀၀၀ ပြၚ် နူကဵုကွာန် (ခြောက်မိုၚ်) ၊ ထုံဒဝ်၊ ဗာန်လဝ်၊ ညံၚ်ပေန်ကွေန် ကေုာံ ကွာန်ယျေခါန်ချံၚ်တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုသေပ်တေမ်ဗာ ၅ တေံဂှ်လေဝ် အပ္ဍဲပေါဲဗ္တိုက်ဗာန်လဝ်ဂှ် ရဲဒဳကွဳစက်ၜါတၠ လ္ပာ်ကံၚ်ဇြဳပၞာန် ကော်ဓဇက်နၚ်တံဂှ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ် နူကဵုတမ်ရိုဟ်ပရိုၚ်ဗလးတိတံရ။
အတိုၚ်လိက်ဒုၚ်စဳရေၚ် ဌာနသုတေသန ဌာန်ကွတ်ပရေၚ်ဍုၚ်ကွာန်ရာမညဂှ်မ္ဂး ပ္ဍဲရးတၞၚ်သဳ အပ္ဍဲဂိတုအဝ်ဂါတ်တုဲကၠုၚ်တေံ မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် နူကဵုကံၚ်ဇြဳပၞာန်တုဲ ညးဍုၚ်ကွာန်ဒေသ ဟွံအောန်နူကဵု ၆၀၀၀ ဒးပါဲလဝ်ဘဲပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−Social Media