နေဗျဳဒဝ်၊ သေပ်တေမ်ဗာ ၈
အပ္ဍဲအခိၚ်ကာလစၟတ်လဝ် ဒၞါဲကံက်စရၚ်လၟိဟ်မၞိဟ်သ္ဂာဗ္တံဟွံမာန်တံဂှ် ကၠာဂွိုအ်စိုပ်ဂိတုဒဳဇြေမ်ဗာ သွက်ဂွံကံက်ပတုဲထောံဂှ် ဒုက္ဍိုပ်သ္ကိုပ်ပၞာန်သီအဝဵု ဒုသ္ကိုပ်ဗိုလ်ဇၞော် သဵုဝေန် စၞောန်ပ္ညုၚ်လဝ်ရ။
တုဲကၠုၚ်ပ္ဍဲဂိတုသေပ်တေမ်ဗာ ၆ အပ္ဍဲကောံဓရီုပ္ညဳပ္ညပ်ကမၠောန် ကမ္မယှေန်စရၚ်လၟိဟ်မၞိဟ်သ္ဂာဗ္တံဗဟဵု အလန်ပဉ္စမ မကၠောန်ဗဒှ်လဝ် ပ္ဍဲနေဗျဳဒဝ်ဂှ် ဒုက္ဍိုပ်သ္ကိုပ်ပၞာန် ကဵုလဝ်စၞောန်ရ။
တ္ၚဲကံက်စရၚ်လၟိဟ်မၞိဟ်သ္ဂာဗ္တံ အလုံဍုၚ်မွဲ သၞာံ ၂၀၂၄ ဂှ် ကံၚ်ဇြဳပၞာန် စၟတ်လဝ် နူဂိတုအံက်တဝ်ဗာ ၁ စဵုကဵု ၁၅ ရ။
အခိၚ်ကာလကံက်စရၚ်လၟိဟ်မၞိဟ်သ္ဂာဗ္တံဂှ် စၟတ်လဝ် ၁၅ တ္ၚဲကီုလေဝ် လ္ဂောံကဵုအကာဲအရာပရေၚ်ဂီုကၠီု ကေုာံ အကာဲအရာဂၠံၚ်ဍာန်တံဂှ်တုဲ ယဝ်ရနွံပၟိက်ဒးဂလိုၚ်ပ္တိုန်တ္ၚဲမ္ဂး သွက်ဂွံပ္တိုန်ထ္ၜးဒုၚ်စဳရေၚ်အိုတ်ဂှ် ဒုက္ဍိုပ်သ္ကိုပ်ပၞာန် စၞောန်ပ္ညုၚ်လဝ်ရ။
စရၚ်လၟိဟ်မၞိဟ်သ္ဂာဗ္တံ ကေုာံ ပရူပရာသ္ၚိကၟိန် သၞာံ ၂၀၂၄ ဂှ် အပ္ဍဲဂိတုဒဳဇြေမ်ဗာဏံ လလောၚ်ပ္တိတ်အာ စရၚ်ပဏာမကၠာတဲဏောၚ်တုဲ နကဵုညးဍုၚ်ကွာန်ဂမၠိုၚ် ဟွံဒေါအ်ဟွံဂွံ သွက်ဂွံပံၚ်တောဲပါလုပ်အိုတ်ဂှ် နွံပၟိက်ရောၚ် ဒုက္ဍိုပ်သ္ကိုပ်ပၞာန် ဟီုရ။
ဂကောံဇြဟတ်ပၠန်ဂတးတံဂှ်တှ်ေ ကံၚ်ဇြဳပၞာန် ကံက်စရၚ်လၟိဟ်မၞိဟ်သ္ဂာဗ္တံဂှ်ဝွံ ဒှ်ပွဒစးဒုၚ်ပလေဝ်ပလေတ် သွက်ပေါဲရုဲမာဲ မဒှ်ပၞော်တိတ်လက္ကရဴအိုတ်ဏောၚ်တုဲ လ္ပပံၚ်တောဲပါလုပ်အိုတ်ဂှ် ဖ္တိုက်ဖ္အောဝ်လဝ်ရ။
အပ္ဍဲပၞာန်ပၠန်ဂတးညးဍုၚ်ကွာန်ဂှ် ကံၚ်ဇြဳပၞာန် ဒးဆောံလေၚ်လဝ် ဍုၚ်ဗ္ဒါဲ ၈၀ ဂှ်ဝွံ ဂွံကံက်စရၚ်လၟိဟ်မၞိဟ်သ္ဂာဗ္တံ ဗ္ၜတ်အလုံဍုၚ်မွဲဂှ် သ္ပဟွံမာန်ပုဟ်ဂှ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
ပ္ဍဲဍုၚ်ဗၟာဏံ အတိုၚ်စရၚ်လၟိဟ်မၞိဟ် ကံၚ်ဇြဳပၞာန် ချိၚ်လလောၚ်ပ္တိတ်လဝ် ပ္ဍဲသၞာံ ၂၀၂၃ ဂိတုအံက်တဝ်ဗာ ၁ ဒုၚ်သ္ဇိုၚ်ကဵု စရၚ်လၟိဟ်မၞိဟ်သ္ဂာဗ္တံ သၞာံ ၂၀၁၄ ဂှ်မ္ဂး အလုံဍုၚ်မွဲ မၞိဟ်တြုံ၊ မၞိဟ်ဗြဴ ၅၆ ပြကောဋိကိုဋ်ပြၚ် နွံဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI