ဇြပ်ဗု၊ သေပ်တေမ်ဗာ ၁၂
ပ္ဍဲပွိုၚ်ဍုၚ်ဇြပ်ဗု တွဵုရးဍုၚ်မန် ပရေၚ်ပၞာန်ၜါလ္ပာ် မသ္ကာတ်မြဟ်ဒၟံၚ်ဂှ် အပ္ဍဲကာလသီအဝဵုဏံ အန္တရာယ်မာၚ်တိုပ်တိ သာဇၞော်ပၟဝ်ကၠုၚ်တုဲ ဟိုတ်နူမာၚ်တိုပ်တိတုဲ ကောန်အရာပ်ဇီုကပိုက်ကလိဂွံဝပ်တံ သၠုၚ်တိုန်ကၠုၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲပွိုၚ်ဍုၚ်ဇြပ်ဗု နူဂိတုအဝ်ဂါတ် ၂၀ စဵုကဵုဂိတုသေပ်တေမ်ဗာ ၁၁ အပ္ဍဲပွိုၚ်ပိသတ္တာဟဂှ် ဟိုတ်နူမာၚ်တိုပ်တိတုဲ ကောန်အရာပ် ဟွံအောန်နူကဵုမသုန်တၠ ဇီုကပိုက်ကလိဂွံလဝ်ဝပ်ရ။
မာၚ်တိုပ်တိဗ္တိုဟ်ထ္ကးဂှ်ဝွံ က္တဵုဒှ်လဝ် ပ္ဍဲပွိုၚ်ဍုၚ်ဇြပ်ဗု ကွာန်ဗ္ဒိုပ်ဇၞော်၊ ကွာန်ယျေဝ်တဂေါန် ကေုာံ ကွာန်အေသာယာတံတုဲ ညးဒေသ အာဗာ်အှော်၊ ပါ်ဗတိုဟ်၊ ခါဲၜုက် ပ္ဍဲဒဵုဂြိုပ် သွက်ပရေၚ်ဗုၚ်ဂၞဴဂြောဝ်ဂတာတံ လိုန်ဒးမံၚ်မာၚ်တိုပ်တိ မဒှ်ရ။
ကွာန် မာၚ်တိုပ်တိဗ္တိုဟ်ထ္ကးဒၟံၚ် မွဲဏှမွဲဏှတံဏံဂှ်ဝွံ မ္ၚးနူကဵုဒပ်ကံၚ်ဇြဳပၞာန်ဂှ် သီုကဵုဒှ်ဒေသ ဇြဟတ်ပၠန်ဂတးတံ ချဳဒရာၚ်ဒၟံၚ်ပရေၚ်ပၞာန်တုဲ ပရေၚ်မာၚ်တိုပ်တိဗ္တိုဟ်ထ္ကးတံဂှ် ညးစောဲစပ်အဲ အဲစောဲစပ်ညး ဒှ်ဒၟံၚ်သာ်ဏံရ။
ပ္ဍဲပွိုၚ်ဍုၚ်ဇြပ်ဗု ဟိုတ်နူမာၚ်တိုပ်တိ ဗ္တိုဟ်ထ္ကးကၠုၚ် မွဲဏှမွဲဏှဂှ်ရ အကြာညးဍုၚ်ကွာန်ဒေသတံဂှ် ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ကၠုၚ်တုဲ သွက်ဂွံၚးတးပသောၚ်ကဵုမာၚ်တံဂှ် ဆန္ဒမၞုံဒၟံၚ်အိုတ်ရ။
အတိုၚ်တၚ်နၚ် နူလိက်လၟေၚ်လ္ဂန်အိန် ကံက်ကပှ်ဂွံလဝ်ဂှ်မ္ဂး သၞာံ ၂၀၂၄ နူဂိတုဂျာန္နဝါရဳ စဵုကဵုဂိတုအဝ်ဂါတ် အပ္ဍဲပွိုၚ် ၈ ဂိတု ပ္ဍဲတွဵုရးဍုၚ်မန် ဟိုတ်နူမာၚ်တိုပ်တိတုဲ ညးဇီုကပိုက်ကလိဂွံဝပ် ၂၀ တၠ ကေုာံ ညးဒးချိုတ်အာ ၂ တၠ နွံလဝ်ရ။
ကြဴနူဒပ်ပၞာန်သီအဝဵုတုဲ ညးဍုၚ်ကွာန်ဂမၠိုၚ်ဝွံ ဒးဂဗကၠုၚ် ဘဲအန္တရာယ်မာၚ်တံဂၠိုၚ်တုဲ ပါဲနူကဵုဘပဠဒၟံၚ် အန္တရာယ်လမျီုဂှ် မွဲလ္ပာ်တေံ ပရေၚ်ဇီုကပိုက်ဆောံလေၚ် စမြိုၚ်ညးဍုၚ်ကွာန်ပိုၚ် မပ္တံကဵု ဂၠံၚ်၊ ဒဒန်တံဂှ်လေဝ် ဇၞော်ဒၟံၚ်ရောၚ် သ္ဂးရ။
ဟိုတ်ဂှ်ရ နကဵုဂကောံရပ်လွဟ် မဆေၚ်စပ်ဂမၠိုၚ် ပ္ဍဲအရာထ္မံက်ရုပ်ရဴပရေၚ်ပၞာန်ဂှ် သွက်ဂွံစဵုဒၞါကဵု ညးဍုၚ်ကွာန်တံ နူကဵုဘဲအန္တရာယ်ကပေါတ်လွဟ်လက်နက်စက် မဗ္တိုဟ်ထ္ကးလေပ်တံ ကေုာံ နူကဵုအန္တရာယ်မာၚ်တိုပ်တိတံဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media