အခိၚ်အမာတ်ကလုတ်သေံကဵု သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်တံ ဆဵုဂဗညးသ္ကအ်ဂှ် မုသဳကၠဳလဝ်ရော

မတ်မလီု၊ သေပ်တေမ်ဗာ ၁၂

သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ် ဥူအံၚ်ကျဳတုၚ် ကေုာံ အမာတ်ကလုတ်ဍုၚ်သေံ စပ်ကဵုဍုၚ်ဗၟာ H.E.Mr.Mongkol Visitstump တံဝွံ ပ္ဍဲဂိတုသေပ်တေမ်ဗာ ၁၀ တေံ ဆဵုဂဗလဝ် ပ္ဍဲကဵုရုၚ်အလဵုအသဳတွဵုရး ဍုၚ်မတ်မလီုရ။

ပ္ဍဲပရေၚ်ဆဵုဂဗဏံ အကြာၜါဍုၚ် ဂွံသၠုၚ်ပ္တိုန် ပရေၚ်ဆာန်ကၟိန်ဒဒှ်ေဒယှ် ကေုာံ ပရေၚ်ပံၚ်တောဲရေၚ်တၠုၚ် ပရေၚ်ပိုန်ဒြပ်၊ ဂွံသၠုၚ်ပ္တိုန် သွာၚ်သွံရာန်ဗၞိက် ကေုာံ ညံၚ်ပရေၚ်သွံရာန်ဗၞိက်ပယျဵု ဇြဟတ်ဂွံခိုဟ်တိုန်ကၠုၚ်ဂှ် သဳကၠဳလဝ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒကံၚ်ဇြဳပၞာန်ရ။

သ္အာၚ်နူဂှ်ပၠန် ကမၠောန်ပရေၚ်ပိုန်ဒြပ် ကေုာံ ပရေၚ်ဓလိုက်တမ်ရိုဟ်တံ ဂွံဖောအ်ဗြေဝ်တောတက်ကၠုၚ်ကီု၊ ဗၞိက်စၞစသုၚ်၊ ကပေါတ်မၞိဟ်အရပ်စပ်တံ မပါလုပ် ဂၠံၚ်တရဴပရေၚ်ပလံၚ်ဗစိုပ် သွက်ကဏ္ဍဗၞိက်ပၠောပ်ဗၞိက်ပ္တိတ်တံ ဂွံပြေပြံၚ် ကလိတ်ကလောတ်ဒၟံၚ်ဂှ်ကဵု သွက်ဂွံသၠုၚ်ပ္တိုန် ကဏ္ဍအာတရဴတံ ကိစ္စတံဏံလေဝ် သဳကၠဳလဝ်ရောၚ် သ္ဂးရ။

လ္ပာ်ရုၚ်ကလုတ်သေံဂှ်တှ်ေ စပ်ကဵုကၠုၚ်စိုပ်ဆဵုဂဗလဝ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ် ဥူအံၚ်ကျဳတုၚ်ဂှ်တုဲ လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။

တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ကံၚ်ဇြဳပၞာန် ၜိုန်ရဟီုဒၟံၚ် ကမၠောန်ပရေၚ်ပိုန်ဒြပ်၊ ပရေၚ်ဓလိုက်တမ်ရိုဟ် ကုဍုၚ်သေံ ဂွံဖောအ်ဗြေဝ်တောတက်ကၠုၚ်ကီုလေဝ် ဟိုတ်နူဍုၚ်ကွာန်ဟွံညိၚ်ဝတ်တုဲ ပရေၚ်ဓလိုက်တမ်ရိုဟ်ဍုၚ်သ္အာၚ်လဵုမှ ဂွံလုပ်စိုပ်ကၠုၚ် ဟွံမွဲပုဟ်ဂှ် ဟီုရ။

“ ဓလိုက်တမ်ရိုဟ်ဟီုဂှ်လေဝ် ဍုၚ်ကွာန်ညိၚ်ဝတ်မှ ဓလိုက်တမ်ရိုဟ်ဂွံဏောၚ်လေဝ်။ ဍုၚ်ကွာန်ဟွံညိၚ်ဝတ်မ္ဂး ဗီုလဵုဂွံဓလိုက်တမ်ရိုဟ်ဂွံဂှ်ရော။ တန်တဴကဵုအကာဲအရာပရေၚ်ဍုၚ်ကွာန်ရ။ ပရေၚ်ဍုၚ်ကွာန်ဟီုဂှ်လေဝ် မုဟွံသေၚ်ပုဟ်။ ဒးပ္ညဳပ္ညပ်ဏောၚ်။ ဂၞန်မွဲ ဗ္တိုက်တှ်ေဗ္တိုက် ဟွံဗ္တိုက်တှ်ေ ဒးပ္ညဳပ္ညပ်ဏောၚ်။ ညအ်ဂှ် ညံၚ်ရိုဟ်ကၞက်ဂွံပိုတ် ကၠောန်ဟွံဂွံပုဟ်။ ပ္ညဳပ္ညပ်ထောံတှ်ေ ကောန်ဍုၚ်သ္အာၚ်တံ ကၠုၚ်ကၠောန်မာန်ဏောၚ်။ ယဝ်ရလ္ပာ်တေံ လ္ပာ်ဏံ ၜိုဟ်သြိုဟ်အာတှ်ေ။ ဟွံၜိုဟ်သြိုဟ်မွဲသာ် ဒၞါဲဗြုမျေၚ်ဒၟံၚ်ဂှ် ကောန်ဍုၚ်သ္အာၚ်လဵုမှ ဟွံကၠုၚ်ပုဟ်။ ညအ်ဂှ် ချိုတ်ပၠိုတ်ရ” သာ်ဝွံ သ္ဂးရ။

လၟေၚ်တရဴတွဵုရးဍုၚ်မန် အမာတ်ကလုတ်သေံဂှ်ဝွံ ကၠုၚ်စိုပ်လ္ၚတ် အကာဲအရာဂီုကၠီုအပ္ဍဲဒေသ၊ ဟိုတ်နူဟိုတ်နာနာသာ်တုဲ ကမၠောန်ဓလိုက်တမ်ရိုဟ်ညးတံ ဒးဒေါအ်ဒေၚ်လဝ်ဂှ် မပါလုပ် နူကဵုပရေၚ်သွံရာန်ဗၞိက်ပယျဵုမွဲကဆံၚ် အကာဲအရာၜါဍုၚ်သွံရာန်ဗၞိက် ဂွံ၊ ဟွံဂွံတံ ဒှ်မာန်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။

သ္ကုတ်ဂၠံၚ်သွံရာန်ဗၞိက်ပယျဵု သေံ−ဗၟာဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ထိၚ်ဒက်လဝ်ဂှ်ရ ကံၚ်ဇြဳပၞာန်ဝွံ နူကဵုဂၠံၚ်ဍာ်မွဲကဆံၚ် ပြံၚ်လှာဲကၠောန်ဒၟံၚ် ပရေၚ်သွံရာန်ဗၞိက်သေံ−ဗၟာတံရ။

ပွမသွံရာန်ဗၞိက် နူကဵုဂၠံၚ်ဍာ်မွဲကဆံၚ်ဂှ်ဝွံ ခရိတ်အိုတ် ဂၠိုၚ်နူကဵု ပလံၚ်ဗစိုပ် နကဵုကွဳစက်ဖ္ဍိုက်ပ္တိုန်ဗၞိက်တံဂှ်တုဲ ပကောံပကေဝ်ကပေါတ်ဗွဲမဂၠိုၚ်တုဲ ဒးပလံၚ်မွဲတဲဓဝ်ဂှ်ရ အခိၚ်လအ်လတံ နွံဒၟံၚ်ရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကပေါတ်ဗၞိက်လုပ်စိုပ်ကၠုၚ် နူကဵုဍုၚ်သေံတံဂှ် ထ္ၜးဟိုတ်ပရေၚ်ဂီုကၠီုတုဲ ပ္ဍဲကဵုသၞေဟ်ကၚ်ပံက်လဝ်တံဂှ် လုပ်စိုပ်ကၠုၚ် ဟွံဗဗွဲကဵုသၞောဝ်ဂးတုဲ ဗီုဒးစိုတ် ရပ်ဒက်ကီု၊ အာတ်ဒၟံၚ်လှုဲတံကီုဂှ် ကၠောန်ၜိုတ်ဒၟံၚ်ရ။

တွဵုရးဍုၚ်မန်ဝွံ ဒှ်တွဵုရးဒးပၠောပ်ပ္တိုန်ဒၟံၚ် ကပေါတ်ဗၞိက်သေံဂမၠိုၚ် မပ္တံကဵု ဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်မၞိဟ်အရပ်စပ် ကေုာံ ကပေါတ်ဗၞိက်အရပ်စပ် ပရေၚ်သိုၚ်ခၞံတံသၟးဟွံက ကပေါတ်ဗၞိက်အရပ်စပ်နာနာတံ အဓိကမွဲရ။

ပရိုၚ်−သြၚ်လောန်တိုၚ်(မ်)

ဗီု−MOI