ဇြပ်ဗု၊ သေပ်တေမ်ဗာ ၁၄
တွဵုရးဍုၚ်မန် ပ္ဍဲပွိုၚ်ဍုၚ်ဇြပ်ဗု အပ္ဍဲပွိုၚ်ပိသတ္တာဟပြၚ်ကၠုၚ်ဏံ ဟိုတ်နူမာၚ်တိုပ်တိတုဲ ကောန်အရာပ်ထပှ်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲပွိုၚ်ဍုၚ်ဇြပ်ဗု နူဂိတုအဝ်ဂါတ် ၂၀ စဵုကဵုဂိတုသေပ်တေမ်ဗာ ၁၂ အပ္ဍဲပွိုၚ်ပိသတ္တာဟတုဲကၠုၚ်တေံ ဟိုတ်နူမာၚ်တိုပ်တိတုဲ ညးဗြဴၜါတၠ ကေုာံ မၞိဟ်တြုံမသုန်တၠ အပံၚ်ဖအိုတ် ထပှ်တၠ ဇီုကပိုက်ကလိဂွံလဝ်ဝပ်ရ။
ပ္ဍဲကဵုဏံ ပ္ဍဲဂိတုသေပ်တေမ်ဗာ ၁၂ တေံ ဥူညာန်ထောန် အာယုက် ၃၇ သၞာံ ဒၟံၚ်ကွာန်ဗဒိုပ်ဇၞော် (အပြၚ်စခန်းကြီး) ပွိုၚ်ဍုၚ်ဇြပ်ဗုဂှ်ဝွံ ပ္ဍဲကၠအ်ထၜိုတ်ညး မာၚ်တိုပ်တိဗ္တိုဟ်ထ္ကးတုဲ ကလိဂွံလဝ်ဝပ်သ္ကာတ်မြဟ်ရ။
ဟိုတ်နူမာၚ်တိုပ်တိဗ္တိုဟ်ထ္ကးတုဲ ဥူညာန်ထောန်ဝွံ ကလိဂွံအာဝပ် စးလ္ပာ်ပုၚ် ၜိုတ် ၆ ၝောံတဲ စာ်ထောၚ်အာတုဲ စးလ္ပာ်ပါဲ စၞာံစာ်ကလိဂွံအာဝပ်တုဲ တိုန်စိုပ်လွဳဒၟံၚ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ဇြပ်ဗုရ။
ပွိုၚ်ဍုၚ်ဇြပ်ဗု ပ္ဍဲကဵုကွာန်ဗဒိုပ်ဇၞော်မ္ၚး၊ ဗဒိုပ်ဇၞော်အပ္ဍဲ၊ ကွာန်ယျေဝ်တဂေါန် ကေုာံ ကွာန်အေသာယာ ဒၞါဲမာၚ်ဗ္တိုဟ်ထ္ကးတံ က္တဵုဒှ်ဒၟံၚ်မွဲဏှမွဲဏှဂှ်ဝွံ ပါဲနူဒပ်ကံၚ်ဇြဳပၞာန်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံလေဝ် ချဳဒရာၚ်ဒၟံၚ်ပရေၚ်ပၞာန်ကီုရ။
ဆ္ဂး ပရေၚ်မာၚ်တိုပ်တိဗ္တိုဟ်ထ္ကး ညးဍုၚ်ကွာန်ကောန်အရာပ် ဇီုကပိုက်ကလိဂွံဝပ် နွံဒၟံၚ်ဏံဂှ်ဝွံ တၠတဲဟွံမံက်မွဲသာ် ဒှ်ဒၟံၚ်ၜါလ္ပာ် ညးစောဲစပ်အဲ အဲစောဲစပ်ညးၜိုတ်ဏံဓဝ်ရ။
အတိုၚ်တၚ်နၚ် နူကဵုလိက်လၟေၚ်လ္ဂန်အိန် ပ္ကောံပ္ကေဝ်ဂွံဂှ်လဝ်ဂှ်မ္ဂး သၞာံဏံ နူဂိတုဂျာန္နဝါရဳ စဵုကဵုဂိတုအဝ်ဂါတ် အပ္ဍဲပွိုၚ်ဒ္စါံဂိတု ပ္ဍဲတွဵုရးဍုၚ်မန် ဟိုတ်နူမာၚ်တိုပ်တိတုဲ ကောန်အရာပ်ၜါတၠ ချိုတ်တုဲ ၂၀ တၠ ဇီုကပိုက်ကလိဂွံလဝ်ဝပ် နွံရ။
ပရိုၚ်−သြၚ်လောန်တိုၚ်(မ်)
ဗီု−Social Media